គម្រោង

ចំណេះដឹងហិរញ្ញវត្ថុអាចផ្តល់នូវផលប៉ះពាល់យ៉ាងជ្រៅទៅក្នុងសមត្ថភាពរបស់បុគ្គលម្នាក់ៗក្នុងការសន្សំដើម្បីអនាគតរបស់ពួកគេ ពួកគេក៏បានដឹងពីការកើនឡើងនូវការប្រថុយប្រថាន​ខ្ពស់​ទាក់ទងនឹង ​បំណុលច្រើននិងការសន្សំតិច។​ អ្នកដែលមានចំណេះដឹងផ្នែកហិរញ្ញវត្ថុអាចធ្វើការសម្រេចចិត្តដោយឆ្លាតវៃទាក់ទងនឹងការសន្សំ ការធ្វើផែនការចូលនិវត្តន៍ ការវិនិយោគ និងការសម្រេចចិត្តផ្សេងៗទៀត។ ការចាប់ផ្តើមផ្តល់នូវការអប់រំចំណេះដឹងហិរញ្ញវត្ថុចាប់ពីនៅក្មេងៗគឺមានសារសំខាន់ណាស់សម្រេចយុវវ័យដើម្បីសុខមាលភាពផ្នែកហិរញ្ញវត្ថុរយៈពេលយូរអង្វែង។
‍
សម្រាប់យុវវ័យ ការទទួលបានជំនាញផ្នែកហិរញ្ញវត្ថុនឹងផ្តល់នូវអត្ថប្រយោជន៍ភ្លាមៗ និងអាចជួយបង្កើនទម្លាប់ល្អទាក់ទងនឹងលុយសម្រាប់រយៈពេលវែង។ ការរៀនសូត្រក្នុងការគ្រប់គ្រងលុយកាក់បានល្អនឹងជួយឱ្យយុវជនមានលទ្ធភាពរស់នៅដោយពេញលេញ និងមានរបៀបរស់នៅដែលមិនមានកង្វល់។
‍
យើងផ្តល់នូវជំនាញទៅសល់សិស្ស និស្សិត និងយុវជន ដែលពួកគេត្រូវការដើម្បីធ្វើសេចក្តីសម្រេចចិត្តដែលឆ្លាតវៃ។ ជាមួយនឹងបណ្តាញអ្នកអប់រំ និងអ្នកជំនាញ ផ្នែកចំណេះដឹងហិរញ្ញវត្ថុ យើងបង្កើននូវកម្មវិធីវគ្គបណ្តុះបណ្តាលចំណេះដឹងហិរញ្ញវត្ថុនៅក្នុងសាលារៀន វិទ្យាល័យ និង សកលវិទ្យាល័យនៅទូទាំងប្រទេសកម្ពុជា។

ចំណេះដឹងហិរញ្ញវត្ថុតាមប្រព័ន្ធឌីជីថល (DFL) គឺត្រូវបានក្លាយជាវិធីសាស្ត្រដ៏មានសារសំខាន់មួយសម្រាប់ការអប់រំ នៅក្នុងយុគបច្ចេកវិទ្យាឌីជីថលនេះ។ នៅក្នុងការអភិវឌ្ឍសេដ្ឋកិច្ច ‘gig’ មានន័យថា បុគ្គលម្នាក់ៗមានទំនួលខុសត្រូវដោយខ្លួនឯងទៅលើការធ្វើផែនការហិរញ្ញវត្ថុ រួមទាំងផែនការចូលនិវត្តន៍ទៀតផង។ ប្រជាជនកម្ពុជាត្រូវការការគ្រប់គ្រងការសន្សំសម្រាប់ការចូលនិវត្តន៍និងសោធនដោយខ្លួនឯងឱ្យកាន់តែច្រើនជាងបច្ចុប្បន្ន។ អ្នកប្រើប្រាស់ត្រូវតែមានចំណេះដឹងទំនើបកម្មផ្នែកហិរញ្ញវត្ថុដើម្បីប្រើប្រាស់ឱ្យមានប្រសិទ្ធភាពនូវផលិតផល និងសេវាកម្មនៃបច្ចេកវិទ្យាហិរញ្ញវត្ថុ (FinTech) និងអាចជៀសវាងបាននូវការក្លែងបន្លំ និងការប្រព្រឹត្តកំហុសដែលបណ្តាលឱ្យខាតបង់។ ចំនុចនៃការអភិវឌ្ឍនេះត្រូវការឱ្យយើងអភិវឌ្ឍន៍កម្មវិធីអប់រំចំណេះដឹងហិរញ្ញវត្ថុដើម្បីបង្កើននូវចំណេះដឹងហិរញ្ញវត្ថុនេះ ដោយផ្តោតទៅលើជំនាញសំខាន់ៗដែលចាំបាច់សម្រាប់អ្នកដែលចូលរួមនៅក្នុងសេដ្ឋកិច្ចឌីជីថល។

នៅឫទ្ធិពល យើងសហការជាមួយដៃគូជាច្រើនក្នុងការអភិវឌ្ឍនូវនិយមន័យដ៏សមស្របនៃអ្វីទៅជា ចំណេះដឹងហិរញ្ញវត្ថុតាមប្រព័ន្ធឌីជីថល ការរៀបចំ និងអនុវត្តនូវឧបករណ៍ដើម្បីប្រើប្រាស់ប្រព័ន្ធនេះ និងរៀបចំនូវយុទ្ធសាស្ត្រនិងកម្មវិធីដើម្បីលើកកម្ពស់ការអប់រំចំណេះដឹងហិរញ្ញវត្ថុតាមប្រព័ន្ធឌីជីថលនេះក៏ដូចជាកម្មវិធីពិសេសៗជាច្រើនទៀតទៅដល់ក្រុមប្រជាជនដែលងាយរងគ្រោះ រួមមានមនុស្សចាស់ជរា អ្នកដែលទទួលបានការសិក្សាទាប ម្ចាស់អាជីវកម្មខ្នាតតូចនិងមធ្យម ក៏ដូចជាអាជីវកម្មដែលទើបចាប់ផ្តើម​ និងស្រ្តីជាដើម។

កម្មវិធីអភិវឌ្ឍន៍បំណិនជីវិតរបស់យើងធ្វើឡើងដើម្បីកសាងសមត្ថភាពបុគ្គលក្នុងការសម្រេចចិត្ត និងធ្វើសកម្មភាពដែលផ្តល់ផលវិជ្ជមានទៅដល់ជីវិតរស់នៅរបស់ពួកគេ និងជីវិតរស់នៅរបស់មនុស្សដែលនៅជុំវិញពួកគេ។ ដើម្បីលូតលាស់ជាបុគ្គលដែលមានសមត្ថភាពគ្រប់គ្រាន់ ការសិក្សាពីបំណិនជីវិតពិតជាមានសារសំខាន់ណាស់សម្រាប់យុវជន។ បំណិនជីវិតរួមមាន ការគិតដោយស៊ីជម្រៅ និងការបង្កើតថ្មី ការធ្វើសេចក្តីសម្រេចចិត្ត ទំនាក់ទំនងប្រកបដោយប្រសិទ្ធភាព ក៏ដូចជាជំនាញក្នុងការអភិវឌ្ឍចំណងទាក់ទងដ៏ល្អ និងការគិតវិជ្ជមានពីខ្លួនឯងផងដែរ។ បំណិនជីវិតជួយដល់មនុស្សឱ្យមានទំនួលខុសត្រូវ និងជ្រើសរើសបានត្រឹមត្រូវ និងអាចជួយឱ្យប្រសើរឡើងនូវរបៀបរបបរស់នៅ និងជំនាញអាជីពផងដែរ។ យោងតាម អង្គការសុខភាពពិភពលោក WHO បំណិនជីវិតមានន័យថា “សមត្ថភាពក្នុងការប្រើប្រាស់អកប្បកិរិយាជាវិជ្ជមាននិងអាចបត់បែនបានដើម្បីដោះស្រាយបាននូវបញ្ហា និងឧបសគ្គនានាដែលកើតមានឡើងនៅក្នុងជីវិតរស់នៅប្រចាំថ្ងៃ”។ សាលារៀនទាំងអស់គួរតែផ្តល់ការសិក្សាជំនាញជីវិតនិងសុខភាពផ្លូវចិត្តនេះផងដែរ។
‍
ទោះជាយ៉ាងនេះក្តី កុមារជាច្រើននៅក្នុងប្រទេសកម្ពុជាមិនទាន់ទទួលបានការអប់រំដែលផ្តល់នូវការ បណ្តុះបណ្តាលជំនាញទាំងនេះទេ។ ពុទ្ធិពលសហការជាមួយដៃគូជាច្រើនក៏ដូចជាក្រសួងអប់រំយុវជននិងកីឡា សាលារៀន អង្គការក្រៅរដ្ឋាភិបាល និងសហគមន៍នានាដើម្បីបង្កើននូវកម្មវិធីនិងវិធីសាស្ត្របង្រៀនស្តីពី បំណិនជីវិត ដើម្បីជួយឱ្យកម្មវិធីអាចរួមបញ្ចូលកាន់តែមានប្រសិទ្ធភាពទៅក្នុងការបង្រៀនជំនាញទៅដល់សិស្ស នៅក្នុងការសិក្សាទាំងក្នុងប្រព័ន្ធ និងក្រៅប្រព័ន្ធ។

ជួបក្មេងប្រុសស្រីតាមរយៈកម្មវិធីអភិវឌ្ឍន៍បំណិនជីវិត ទាំងនៅក្នុង និងនៅខាងក្រៅប្រព័ន្ធអប់រំ បានផ្តល់ឱកាសក្នុងការអភិវឌ្ឍសមត្ថភាពភាពជាអ្នកដឹកនាំ ផ្តល់នូវការបណ្តុះបណ្តាលជំនាញវិជ្ជាជីវៈ និងបានបញ្ជ្រាបចំណេះដឹងផ្សេងៗទៀតដើម្បីលើកកម្ពស់កុមារី និងស្ត្រីវ៏យក្មេងថែមទៀតផង។ កម្មវិធីនេះនឹងជួយជំរុញទាំងក្នុងបរិបទវប្បធម៌ និងបង្កើតនូវការផ្លាស់ប្តូរទៅដល់សង្គមសម្រាប់ក្មេងជំនាន់ក្រោយ។

គ្រួសារណាដែលអាចប្រើប្រាស់នូវសេវាកម្មហិរញ្ញវត្ថុដែលត្រឹមត្រូវ គឺហាក់ដូចជាបានអភិវឌ្ឍន៍ជីវិតរស់នៅមួយ ដែលមាននិរន្តរភាព ពួកគេអាចវិនិយោគកាន់តែច្រើនទៅលើសុខភាព ការសិក្សា និងបានចូលរួម និងទាញយកអត្ថប្រយោជន៍ពីទីផ្សារថែមទៀតផង។
‍
នៅក្នុងប្រទេសកម្ពុជា មានតែ២២%ប៉ុណ្ណោះនៃយុវជនដែលមានគណនីនៅក្នុងគ្រឹះស្ថានហិរញ្ញវត្ថុ ហើយការមិនបានប្រើប្រាស់សេវាហិរញ្ញវត្ថុ គឺកាន់តែមានច្រើនក្នុងចំណោមយុវជន និងស្ត្រីក្រីក្រនៅតាមជនបទ និងប្រជាពលរដ្ឋដែលបាត់បង់ឱកាសដទៃទៀត។ ២៩%នៃប្រជាជនជាយុវវ័យមិនអាចប្រើប្រាស់សេវាកម្មហិរញ្ញវត្ថុទាំងផ្លូវការ និងក្រៅផ្លូវការ។ នៅទីកន្លែងដែលមានដង់ស៊ីតេប្រជាជនតិច ថ្លៃដើមក្នុងការធ្វើប្រតិបត្តិការខ្ពស់ តម្រូវការក្នុងការធ្វើប្រតិបត្តិការតិចតួច, បទដ្ឋានអវិជ្ជមានខ្លះរបស់សង្គម និងការហាមឃាត់តាមរយៈបទបញ្ញត្តនានា គឺជាឧបសគ្គដ៏ធំដល់ការផ្តល់នូវសេវាកម្មហិរញ្ញវត្ថុផ្លូវការដែលមាននិរន្តរភាពនៅក្នុងប្រទេសកម្ពុជា។ ជាក់ស្តែង អ្នកក្រីក្រខ្លាំង ចំណាយ៥%នៃចំណូលប្រចាំឆ្នាំរបស់ពួកគេទៅលើសេវាកម្មហិរញ្ញវត្ថុ ភាគច្រើនគឺទៅលើឧបការណ៍ហិរញ្ញវត្ថុក្រៅផ្លូវការដែលមានហានិភ័យខ្ពស់ និងមានតម្លៃខ្ពស់ជាងផងដែរ ការណ៍នេះកម្រិតនូវលទ្ធភាពរបស់ពួកគេក្នុងការប្រើប្រាស់ទីផ្សារ និងយល់ដឹងពីការវិនិយោគទៅលើសុខភាព ការអប់រំ​ និងអាហារូបត្ថម្ភជាដើម។
នៅពុទ្ធិពល យើងជួយជំរុញក្រុមសន្សំ និងវិនិយោគ តាក់តែងឱ្យមានការជ្រើសរើសសមាជិកក្រុម ដែលអាចឱ្យសមាជិកម្នាក់អាចសន្សំប្រាក់បានជាមួយគ្នា និងអាចទទួលបានកម្ចីពីក្រុមសន្សំនោះវិញ។ ក្រុមសន្សំផ្តល់ឱកាសឱ្យសមាជិកក្រុមអាចសន្សំប្រាក់បានទោះជាចំនួនតិចតួចក្តី ហើយអាចទទួលបានកម្ចីដែលមានលក្ខខណ្ឌងាយស្រួលសមស្រប និងក៏អាចទទួលបានការធានារ៉ាប់រងជាមូលដ្ឋានផងដែរ។ ពួកគេជាម្ចាស់ គ្រប់គ្រង និងដំណើរការក្រុមដោយសមជិកក្រុម ពួកគេធ្វើឱ្យមាននិរន្តរភាពទាំងផ្នែកហិរញ្ញវត្ថុ និងក្រុមរបស់ពួកគេផងដែរ។

ទម្រង់មីក្រូហិរញ្ញវត្ថុដែលមានមូលដ្ឋាននៅតាមសហគមន៍បែបនេះផ្តល់ឱកាសឱ្យប្រើប្រាស់សេវាកម្មហិរញ្ញវត្ថុជាមូលដ្ឋាននៅក្នុងសហគមន៍ វាជាតំណាងឱ្យសំណាញ់សុវត្ថិភាពដែលជួយដល់គ្រួសារដែលមានចំណូលទាបទាំងឡាយដើម្បីប្រើប្រាស់នៅក្នុងគ្រួសារ វិនិយោគ និងបំពេញបានតម្រូវការបន្ទាន់នានា។