ភ្នំពេញ៖ រយៈពេលពេញមួយឆ្នាំ២០២១ «​មូល​និធិ​គន្ធ​បុប្ផា​កម្ពុជា​»​បាន​ទទួល​ថវិកា​បរិច្ចាគ​សរុប​ចំនួន​ប្រមាណ​ ១៨,៥​ លាន​ដុល្លារ​អាមររិក ពី​ប្រភព​នានា​ដូច​ជា​ វិភាគ​ទាន​​របស់​រដ្ឋា​ភិបាល​ កម្រៃ​ពី​ការ​លក់​សំបុត្រ​ចូល​ទស្សនា​​តំ​បន់​រមណីយដ្ឋាន​អង្គរ ​វិភាគ​ទាន​ប្រចាំឆ្នាំ​របស់​កាក​បាត​ក្រហម​ និង​ការ​បរិច្ចាគ​ពី​សប្បុរស​ជន​ទូទៅ​។ នេះបើតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំក្រុមប្រឹក្សាបរធនបាលនៃមូលនិធីគន្ធបុប្ផាកម្ពុជា កាលពីថ្ងៃទី៨ ខែកម្ភៈ ឆ្នាំ២០២២។

យោងតាមវឌ្ឍនភាពនៃការទទួលថវិកាបរិច្ចាគនិងរបាយណ៍ហិរញ្ញវត្ថុ របស់មូលនិធីគន្ធបុប្ផាកម្ពុជា បង្ហាញថា ​ថវិកា​បរិច្ចាគដែលទទួលបានក្នុងឆ្នាំ២០២១ សរុប​​ប្រមាណ ​១៨,៥​លាន​ដុល្លារនេះ ប្រៀបធៀបនឹងឆ្នាំ២០២០ កើនឡើង ១១,៦% ដោយទទួលបានសមាជិកសរុបចំនួនជាង ១ម៉ឺន៥ពាន់នាក់។ ជាមួយគ្នានេះ ក្នុងឆ្នាំ២០២១ មូលនិធិគន្ធបុប្ផាកម្ពុជា បានបង្វែរថវិកាជូនមន្ទីរពេទ្យគន្ធបុប្ផាចំនួនប្រមាណ ៤,៥លានដុល្លារ។

នៅក្នុងកិច្ចប្រជុំដែលដឹកនាំដោយឯកឧត្តម​អគ្គ​បណ្ឌិត​សភា​ចា​រ្យ ​អូន ព័ទ្ធ​មុនីរ័ត្ន ឧបនាយរដ្ឋមន្ត្រី​ក្រួសួង​សេដ្ឋកិច្ច​ និង​ហិរញ្ញ​វត្ថុ​ ​ជា​ប្រធាន​ក្រុម​ប្រឹក្សា​បរធនបាល​នៃ​«មូល​និធិ​គន្ធបុប្ផាកម្ពុជា» និងមានការចូលរួមពីរដ្ឋមន្ត្រីក្រសួងសុខាភិបាល និងភាគីពាក់ព័ន្ធផងនោះ ក៏បានពិភាក្សាពីសកម្មភាពផ្សព្វផ្សាយ និងទិសដៅក្នុងការកៀរគរការបរិច្ចាគថវិកាតាមប្រព័ន្ធឌីជីថលបែប E-donation ផងដែរ។ សកម្មភាពបំផុតចលនារបស់លេខាធិការដ្ឋានមូនិធីគន្ធបុប្ផាកម្ពុជានេះ គឺដោយសារការរីករាលដាលនៃជំងឺកូវីដ-១៩ ។

បើតាមរបាយការណ៍ដដែល ស្ថានភាពមន្ទីរពេទ្យគន្ធបុប្ផាទាំង ៥ ទីតាំង ចំនួនអ្នកជំងឺកុមារមកពិគ្រោះ និងព្យបាលនៅផ្នែកពិគ្រោះជំងឺក្រៅមានចំនួន ៣៨៥៥១៩នាក់, អ្នកជំងឺកុមារចូលមកសម្រាកព្យាបាលក្នុងមន្ទីរពេទ្យមានចំនួន ៨០ ៦៧២នាក់, ស្ត្រីមានផ្ទៃពោះបានពិនិត្យ និងព្យាបាលនៅផ្នែកពិគ្រោះជំងឺក្រៅសម្ភព (មន្ទីរពេទ្យជ័យវ័រ្មនទី៧) មានចំនួន ៦២ ៥៣៩នាក់, ស្ត្រីមានផ្ទៃពោះបានសម្រាក និងសម្រាលកូនមានចំនួន ១៩ ៥០៦នាក់, សម្រាកព្យាបាលជំងឺកូវីដ-១៩ មានចំនួន២ ៩០០នាក់, អ្នកជំងឺគ្រុនឈាមធ្ងន់ធ្ងរមានចំនួន ៦៧០នាក់ និងវះកាត់មានចំនួនសរុប ២៣៨៥៥នាក់៕