ភ្នំពេញ៖ សម្តេចនាយករដ្ឋមន្ត្រី ហ៊ុន សែន សម្រេចពន្យារកាលបរិច្ចេទកំណត់ដាក់ឱ្យអនុវត្តពន្ធលើចំណេញមូលលធនរយៈពេល ២ឆ្នាំបន្ថែមទៀត ដោយកំណត់យកចាប់ពីថ្ងៃទី០១ ខែមករា ឆ្នាំ២០២៤។ នេះបើតាមការជូនដំណឹងរបស់អគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី០៩ ខែមិនា ឆ្នាំ២០២២។

ចំណារស្តីពីការស្នើសុំពន្យារពេលអនុវត្តពន្ធលើចំណេញមូលធនរបស់ក្រសួងសេដ្ឋកិច្ចនិងហិរញ្ញវត្ថុនេះ ត្រូវបានសម្តេចនាយករដ្ឋមន្ត្រីចារឯកភាពនៅថ្ងៃទី២១ ខែកុម្ភៈ ឆ្នាំ២០២២។ នៅក្នុងលិខិតរបស់អគ្គនាយកដ្ឋានពន្ធដារ បានបញ្ជាក់ថា ការពន្យារពេលអនុវត្តពន្ធនេះ ក្នុងគោលដៅចូលរួមអនុវត្តក្របខណ្ឌយុទ្ធសាស្រ្តនិងកម្មវិធីស្តារនិងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ របស់រដ្ឋាភិបាលដើម្បីជំរុញការវិនិយោគ៕