ភ្នំពេញ៖ ធនាគារជាតិនៃកម្ពុជាចេញសេចក្តីជូនដំណឹងពី៖ «វិធីសាស្រ្តនៃការកំណត់អត្រាប្ដូរប្រាក់ផ្លូវការ» នៅថ្ងៃទីទី០២ ខែសីហា ឆ្នាំ២០២២។ ការជូនដំណឹងនេះ ធនាគារជាតិនៃកម្ពុជាបានដាក់ឲ្យប្រើប្រាស់ប្រព័ន្ធជួញដូរប្រាក់រៀលអន្តរធនាគា (NBCP) ចាប់ពីឆ្នាំ២០១៨ ក្នុងគោលដៅបង្កើនប្រសិទ្ធភាពនិងតម្លាភាពក្នុងទីផ្សារប្តូរប្រាក់នៅក្នុងប្រទេសកម្ពុជា។

ដោយពិនិត្យឃើញថា ប្រព័ន្ធជួញដូរប្រាក់រៀលអន្តរធនាគារ (NBCP) នាពេលបច្ចុប្បន្នកំពុងដំណើរការកាន់តែសកម្មដោយមានគ្រឹះស្ថានធនាគារនិងហិរញ្ញវត្ថុជាច្រើនបានចូលរួម ជាមួយនឹងទំហំដោះដូរកើនឡើងជាលំដាប់ ដែលកត្តានេះនាំឲ្យអត្រាប្តូរប្រាក់អន្តរធនាគារនៅក្នុងប្រព័ន្ធ NBCP បានឆ្លុះបញ្ចាំងពីអត្រាប្តូរប្រាក់ទីផ្សារបានល្អប្រសើរ។ធនាគារជាតិនៃកម្ពុជា បានសម្រេចកំណត់អត្រាប្តូរប្រាក់ផ្លូវការ ជារៀងរាល់ព្រឹកដោយប្រើប្រាស់អត្រាមធ្យមថ្លឹងផ្អែកលើបរិមាណជួញដូរនៅក្នុងប្រព័ន្ធជួញដូរប្រាក់រៀលអន្តរធនាគារ (NBCP) ដែលទទួលបាននៅថ្ងៃចុងក្រោយបំផុតចាប់ពីថ្ងៃជូនដំណឹងនេះតទៅ៕