ភ្នំពេញ៖ ម្រោងបង្កើតវិទ្យាស្ថានស្រាវជ្រាវម្ហូបអាហារ (FTC) នៅកម្ពុជា នឹងចូលរួមចំណែកពង្រឹងសមត្ថភាពប្រកួតប្រជែង ស្រាវជ្រាវ និងអភិវឌ្ឍន៍វិស័យឧស្សាហកម្មចំណីអាហារ។ គ្រោងដែលមានរយៈពេល៥ឆ្នាំនេះ នឹងអនុវត្តចាប់ពីខែឧសភា ឆ្នាំ២០២៣ ដល់ចុងឆ្នាំ២០២៧ និងមានខ្លឹមសារលម្អិតនៃគម្រោងចំនួន៦ចំណុច។ ឯកឧត្តម ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ នាជំនួបជាមួយនឹងលោក Kim Young Chan នាយកគ្រប់គ្រងគម្រោងនៃវិទ្យាស្ថានគ្រប់គ្រងម្ហូបអាហារកូរ៉េ បានឱ្យដឹងថា គម្រោងដែលបានលេចជារូបរាងនេះ កំពុងរង់ចាំការសម្រេចពីសភាកូរ៉េនៅចុងឆ្នាំ២០២២នេះ។

បើតាមការចុះផ្សាយរបស់ក្រសួងឧស្សាហកម្មវិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី១៩ ខែតុលា ឆ្នាំ២០២២នេះ របាយការណ៍របស់ភាគីកូរ៉េ បានឲ្យដឹងថា គម្រោងបង្កើតវិទ្យាស្ថានស្រាវជ្រាវម្ហូបអាហារ (FTC) នៅកម្ពុជា មានគោលបំណងពង្រឹងសមត្ថភាពប្រកួតប្រជែងជាសកលនៃឧស្សាហកម្មចំណីអាហារនិងពង្រឹងសមត្ថភាពស្រាវជ្រាវ និងអភិវឌ្ឍន៍ (R&D) និងវិទ្យាសាស្ត្រ បច្ចេកវិទ្យា និងនវានុវត្តន៍ក្នុងវិស័យកែច្នៃចំណីអាហារតាមរយៈការសាងសង់មជ្ឈមណ្ឌលកែច្នៃចំណីអាហារកម្ពុជា។

ចំពោះ គោលដៅរយៈពេលវែង៥ឆ្នាំ របស់គម្រោង នឹងអនុវត្តចាប់ពីខែឧសភា ឆ្នាំ២០២៣ ដល់ចុងឆ្នាំ២០២៧ ដើម្បីធានាឲ្យបាននូវលទ្ធភាពប្រកួតប្រជែងផ្នែកបច្ចេកវិទ្យារបស់ក្រុមហ៊ុនចំណីអាហារធុនតូចនិងមធ្យម ធានាឲ្យបាននូវការផលិតចំណីអាហារមានគុណភាព និងសុវត្ថិភាពបង្កើនប្រព័ន្ធគ្រប់គ្រង និងត្រួតពិនិត្យសុវត្ថិភាពកម្រិតអន្តរជាតិរបស់ក្រុមហ៊ុននិងបង្កើតច្បាប់មូលដ្ឋាន និងប្រព័ន្ធដើម្បីអភិវឌ្ឍវិស័យឧស្សាហកម្មចំណីអាហារ។

សម្រាប់ខ្លឹមសារនៃគម្រោងទី១គឺសាងសង់មជ្ឈមណ្ឌលកែច្នៃម្ហូបអាហារ FTC កម្ពុជា គម្រោងទី២ ការផ្តល់ជំនួយឧបករណ៍ និងសម្ភារៈគម្រោងទី៣ ការដំណើរការមជ្ឈមណ្ឌលវិភាគចំណីអាហារ គម្រោងទី៤ដំណើរការកម្មវិធីផ្តល់ជំនួយដល់ក្រុមហ៊ុន គម្រោងទី៥ ដំណើរការនិងអភិវឌ្ឍកម្មវិធីអប់រំ និងគម្រោងទី៦ ពង្រឹងសមត្ថភាព និងបណ្តាញ (Networking) ។

ឯកឧត្តមកិតិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានសម្តែងនូវការស្វាគមន៍ និងរីករាយបំផុតដែលគម្រោងនេះបានលេចជារូបរាង ដោយរង់ចាំការសម្រេចពីសភាកូរ៉េ នៅចុងឆ្នាំ២០២២ ខាងមុខនេះ នឹងបានវាយតម្លៃខ្ពស់ចំពោះរបាយការណ៍ដែលមានលក្ខណៈលំអិត និងមានសារៈសំខាន់របស់ភាគីកូរ៉េ ក៏ប៉ុន្តែ គម្រោងនេះ មិនមានបញ្ចូលការសាងសង់រោងចក្រគំរូ (Pilot Plant) ជាបន្ទុករបស់ភាគីកូរ៉េទេ។

ដូច្នេះ​ ឯកឧត្តម ចម ប្រសិទ្ធិ បានផ្តល់ជម្រើសពីរទៅឲ្យភាគីកូរ៉េ ទី១ ប្រើប្រាស់អគារ ៧ជាន់ចំនួន ២អគាររបស់អគ្គនាយកដ្ឋាន និងវិទ្យាស្ថានជាតិ វិទ្យាសាស្ត្រ បច្ចេកវិទ្យា និងនវានុវត្តន៍របស់ក្រសួង (អគារមួយប្រើប្រាស់ទាំងស្រុង និងអគារមួយទៀតប្រើប្រាស់មួយចំណែកណាមួយ) សម្រាប់កែច្នៃជារោងចក្រគំរូ ទីតាំងការិយាល័យ ទីតាំងបំពាក់ឧបករណ៍និងថ្នាក់បណ្តុះបណ្តាល និងទី២ បើមានថវិកាគម្រោងសាងសង់រោងចក្រគំរូក្រសួងរក្សាការផ្តល់ដីទំនេរនៅទីតាំងអគារខាងលើជូនដើម្បីសាងសង់និងអាចប្រើប្រាស់ចំណែកណាមួយនៃអគារ ៧ជាន់ ទាំងពីរខាងលើបានថែមទៀតធ្វើយ៉ាងណាឲ្យគម្រោងនេះឆាប់ចេញជារូបរាងបានឆាប់បំផុត។

ភាគីកូរ៉េបានសម្តែងនូវទឹកចិត្តរីករាយ និងអរគុណជាខ្លាំងចំពោះការផ្តល់ជម្រើសដ៏ល្អទាំងពីរខាងលើ ដោយខិតខំសម្រេចការងារនេះឲ្យបានឆាប់បំផុតតាមដែលអាចធ្វើបាន។

គួរបញ្ជាក់ផងដែរថា ដោយសារទំហំនៃទីផ្សារចំណីអាហារ ត្រូវបានគេប៉ាន់ប្រមាណថា មានប្រមាណ៨ពាន់លានដុល្លារ នៅឆ្នាំ២០១៨ ហើយអត្រាកំណើនត្រូវបាន គេរំពឹងថានឹងស្ថិតនៅកំរិត ៧,១% រហូតដល់ឆ្នាំ ២០២៣ ហើយក្រុមហ៊ុន ៣៧% គឺជាសហគ្រាសផលិតចំណីអាហារ ដែលជាស្នូលដ៏សំខាន់នៃវិស័យឧស្សាហកម្ម។ ប៉ុន្តែ ៩៥% ជាសហគ្រាសធុនតូចនិងមធ្យម ដូចនេះ ការប្រកួតប្រជែងរបស់ពួកគេនៅមានកម្រិតនៅឡើយទើបកម្ពុជាត្រូវការកម្មវិធីជំនួយផ្សេងៗដើម្បីពង្រឹងលទ្ធភាពប្រកួតប្រជែងរបស់ក្រុមហ៊ុនក្នុងស្រុក៕