ភ្នំពេញ៖ សម្តេច ហ៊ុន សែន បានសម្រេចបញ្ចេញថវិកាសន្សំរបស់រដ្ឋាភិបាលចំនួន ៣០លានដុល្លារបន្ថែមទៀត ដាក់ជាមូលនិធិបំផ្លាញចោលនូវគ្រាប់មីននិងគ្រាប់មិនទាន់ផ្ទុះ។ ការសម្រេចចិត្តនេះ ធ្វើឡើងក្រោយពេលថវិកាចំនួន ១៨,៤៧៣,៥៧០ដុល្លារ ដែលចេញពីរាជអំណោយរបស់ព្រះមហាក្សត្រនិងសម្តេចម៉ែនិងសប្បុរសជន សម្រាប់ការដោះមីនត្រូវចំណាយអស់នៅត្រឹមព្រឹកថ្ងៃទី១ ខែធ្នូ ឆ្នាំ២០២២។​

សម្តេចនាយករដ្ឋមន្ត្រី ហ៊ុន សែន បានបញ្ជាក់តាមហ្វេស៊ុករបស់សម្តេចកាលពីថ្ងៃទី០១ ធ្នូនេះ ថា ដើម្បីធានាថាឆ្នាំ២០២៥ កម្ពុជានឹងអស់គ្រាប់មីន សម្តេចបានពិភាក្សាជាមួយឯកឧត្តម អូន ពន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយឱ្យបញ្ចេញថវិកាសន្សំរបស់រាជរដ្ឋាភិបាលចំនួន ៣០លានដុល្លារ​ ដាក់ទៅជាមូលនិធិបំផ្លាញចោលគ្រាប់មីននិងគ្រាប់មិនទាន់ផ្ទុះគ្រប់គ្រងដោយក្រសួងសេដ្ឋកិច្ចនិងហិរញ្ញវត្ថុ។

ថវិកាសន្សំរបស់រដ្ឋាភិបាលរួមជាមួយថវិកាពីដៃគូរអភិវឌ្ឍអាចបន្តប្រើប្រាស់បានក្នុងឆ្នាំ២០២៣។ ក្នុងករណីដែលខ្វះខាតថវិកាសម្រាប់ឆ្នាំ២០២៤ និង ២០២៥ អាជ្ញាធរមីន​ ត្រូវធ្វើការជាមួយក្រសួងសេដ្ឋកិច្ចនិងហិរញ្ញវត្ថុក្នុងការរៀបចំថវិកាប្រចាំឆ្នាំដើម្បីធានាថាឆ្នាំ២០២៥ កម្ពុជានឹងអស់គ្រាប់មីន។

«ដើម្បីឲ្យឆ្នាំ២០២៥កម្ពុជាគ្មានមីន ការផ្តល់ដីដោយសុវត្តិភាពនិងដោយស្នាមញញឹមខ្ញុំសូមអំពាវនាវសប្បុរសជនមេត្តាបន្តចូលរួមឧបត្ថម្ភទៅតាមលទ្ធភាព។ សូមឲ្យឆ្នាំ២០២៥ ក្លាយជាឆ្នាំគ្មានមនុស្សស្លាប់របួស និងជាឆ្នាំប្រកបដោយស្នាមញញឹមបន្ទាប់ពីរងគ្រោះដោយគ្រាប់មីន រយៈពេល៥៥ឆ្នាំ (១៩៧០.២០២៥)»។ នេះជាការអំពាវនាវនិងបួងសួងរបស់សម្តេចនាយករដ្ឋមន្ត្រី ហ៊ុន សែន។

ទាក់ទងនឹងការទម្លាក់ថវិកាសន្សំបន្ថែមនេះ ឯកឧត្ដម​ទេសរដ្ឋមន្រ្តី​លី​ ធុជ​ អនុប្រធាន​ទី​១​ នៃអាជ្ញាធរ​មីន ថ្លែងអំណរគុណដល់រដ្ឋាភិបាលដែលបាន​ទម្លាក់​ថវិកា​បន្ថែម​ចំនួន​​ ៣០​លាន​ដុល្លារ​អាមេរិក ​ក្នុង​ផែនការ​បោសសម្អាត​មីន​ក្នុង​គោលដៅ​ផ្តល់​សុខ​សុវត្ថិភាព​ លើក​កម្ពស់​ជីវភាពរស់នៅ​របស់ប្រជាពលរដ្ឋគ្រប់លំដាប់ថ្នាក់គ្រប់វ័យ គ្រប់​កាលៈទេសៈ​ និងគ្រប់ទីកន្លែង។

អនុប្រធាន​ទី​១​ នៃអាជ្ញាធរ​មីន រូបនេះ បានបញ្ជាក់ថា អាជ្ញាធរមីននឹងបន្តសហការជាមួយកងទ័ពជើងគោកមជ្ឈមណ្ឌលជាតិកងរក្សាសន្តិភាព និងមជ្ឈមណ្ឌលសកម្មភាពកំចាត់មីនកម្ពុជា ដោយប្រើប្រាស់ថវិកា ៣០លានដុល្លារនេះធ្វើការបោសសម្អាតមីនឲ្យចំគោលដៅជាអាទិភាព និងឆ្លើយតបនឹងតម្រូវការជាក់ស្តែងរបស់សហគមន៍ក្នុងគោលបំណងចូលរួមពន្លឿនផ្តល់ដីសុវត្ថិភាព។ ជាមួយ​គ្នា​នេះ​ក្រុម​ការងារ​បច្ចេកទេស​របស់​ អាជ្ញាធរ​មីន​កំពុង​ធ្វើការ​ជាមួយ​តំណាង​ក្រសួង​សេដ្ឋកិច្ច​ និង​ហិរញ្ញវត្ថុ​ ដើម្បី​រៀបចំ​គោលនយោបាយ​ពាក់ព័ន្ធ​។

សូមបញ្ជាក់ថា គិតត្រឹមខែតុលា ឆ្នាំ២០២២ កម្ពុជានៅសល់ផ្ទៃដីសង្ស័យមានមីននិងសំណល់ជាតិផ្ទុះពីសង្គ្រាមចំនួន ២,០០១ គីឡូម៉ែត្រក្រឡា។ ក្នុងនោះផ្ទៃដីមានមីនចំនួន ៧០៣គីឡូម៉ែត្រក្រឡានិងសំណល់ជាតិផ្ទុះពីសង្គ្រាមចំនួន ១,២៩៨គីឡូម៉ែត្រក្រឡារាប់បញ្ចូលទាំងគ្រាប់បែកចង្កោម។ ក្នុងរយៈពេលជាង ៣០ឆ្នាំនេះ រាជរដ្ឋាភិបាលបានផ្ដល់ថវិកាជាង ២០០លានដុល្លារអាមេរិក សម្រាប់ចូលរួមក្នុងការងារសកម្មភាពកម្ចាត់មីននៅកម្ពុជាស្របតាមផែនការយុទ្ធសាស្ត្រជាតិ៕