ភ្នំពេញ៖ នាពិធីបើកការដ្ឋានសាងសង់និងលើកកម្រិតផ្លូវជាតិលេខ៣១ និងផ្លូវជាតិលេខ៣៣ ដែលមានប្រវែងសរុប ១០៦,១គីឡូម៉ែត្រ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ថវិកាដែលយកមកសាងសង់នេះ គឺជាឥណទានសម្បទានពីរដ្ឋាភិបាលចិនជាង ១២១លានដុល្លារ រួមជាមួយប្រាក់បដិភាពរបស់រដ្ឋាភិបាលកម្ពុជា សម្រាប់ការដោះស្រាយផលប៉ះពាល់និងពន្ធអាការផ្សេងៗ។ សម្រាប់ការសាងសង់និងពិនិត្យបច្ចេកទេស គឺធ្វើឡើងដោយក្រុមហ៊ុនចំនួន២ ដែលគ្រោងនឹងបញ្ចប់ការសាងសង់នៅក្នុងឆ្នាំ២០២៦។

ផ្លូវជាតិទាំងពីរខ្សែដែលត្រូវបើកការដ្ឋានសាងសង់នេះ គឺផ្លូវជាតិលេខ៣១ មានប្រវែងសរុបប្រមាណ ៥៣,៥៣គីឡូម៉ែត្រ គិតចាប់ពីថ្នល់បែកគុស (ចំណុចប្រសព្វផ្លូវជាតិលេខ៣) រហូតទៅដល់ស្រុកកំពង់ត្រាច(ចំណុចតភ្ជាប់ផ្លូវជាតិលេខ៣៣) ដោយឆ្លងកាត់ខេត្តតាកែវ និងខេត្តកំពត។ ចំណែកផ្លូវជាតិលេខ៣៣ មានប្រវែងសរុបប្រមាណ ៥២,៥៧គីឡូម៉ែត្រ គិតចាប់ពីក្រុងកំពត រហូតដល់ច្រកលក(ព្រំដែនកម្ពុជា-វៀតណាម) រួមទាំងផ្លូវតភ្ជាប់ក្នុងក្រុងកំពត (ផ្លូវក្រុងលេខ ៧០៩)ដោយឆ្លងកាត់ខេត្តកំពត និងខេត្តកែប។

ឯកឧត្តម ស៊ុន ចាន់ថុល នៅក្នុងពិធីបើកការដ្ឋានកាលពីថ្ងៃទី៣០ ធ្នូ ឆ្នាំ២០២២ បានលើកឡើងថា ក្រោយបញ្ចប់ការសាងសង់ ផ្លូវជាតិទាំងពីរខ្សែនេះនឹងផ្តល់អត្ថប្រយោជន៍ដល់សេដ្ឋកិច្ចជាតិ និងសេដ្ឋកិច្ចគ្រួសារតាមរយៈការសម្រួលដល់ការធ្វើដំណើររបស់ប្រជាពលរដ្ឋ និងការដឹកជញ្ជូនគ្រប់ប្រភេទដែលនឹងប្រែក្លាយតំបន់ដែលមានហេដ្ឋារចនាសម្ព័ន្ធផ្លូវថ្នល់ល្អប្រសើរ​ ដើម្បីរួមចំណែកនៅក្នុងការជំរុញការផ្លាស់ប្តូរពាណិជ្ជកម្ម ការវិនិយោគនិងទាក់ទាញភ្ញៀវទេសចរ ព្រមទាំងជាខ្សែផ្លូវតភ្ជាប់គ្នាដ៏មានសក្តានុពលដែលស្ថិតក្នុងតំបន់ប៉ូលសេដ្ឋកិច្ចនៃខេត្តភាគនិរតីថែមទៀតផង។

ឯកឧត្តមទេសរដ្ឋមន្ត្រីស៊ុន ចាន់ថុលបានរំលេចពីទិសដៅការងារបន្តក្នុងការអភិវឌ្ឍហេដ្ឋារចនាសម្ព័ន្ធផ្លូវ-ស្ពានសំខាន់ៗ ដែលបាននិងកំពុងសិក្សា និងគម្រោងសំខាន់ៗមួយចំនួន ដែលត្រៀមបើកការដ្ឋានសាងសង់បន្តទៀត។