ភ្នំពេញ៖ «គម្រោងធានាឥណទានដើម្បីស្តារអាជីវកម្ម» ដែលមានទំហំទឹកប្រាក់២០០លានដុល្លារ ត្រូវបានក្រសួងសេដ្ឋកិច្ចនិងហិរញ្ញវត្ថុ សម្រេចឱ្យសាជីវកម្មធានាឥណទានកម្ពុជា (CGCC)​ បន្តដាក់ឱ្យដំណើរការចាប់ពីថ្ងៃទី០១ ខែមករា ឆ្នាំ២០២៣នេះ រហូតដល់គម្រោងត្រូវបានប្រើប្រាស់អស់។ នេះបើតាមសេចក្តីប្រកាសព័ត៌មានរបស់ CGCCនៅថ្ងៃទី០៤ មករា។

គម្រោងឥណទានស្តារអាជីវកម្មនេះ បានដាក់ឱ្យដំណើរការដំបូងនៅខែមីនាឆ្នាំ២០២១ ដល់ចុងឆ្នាំ២០២២ ក្នុងទំហំកម្ចីប្រមាណ ៨៩លានដុល្លារ ដែលដែលភាគច្រើនជាកម្ចីដែលខ្វះទ្រព្យធានា ប៉ុន្តែត្រូវបានធានាដោយ CGCC ក្រោមគម្រោងធានាឥណទាន ដើម្បីស្តារអាជីវកម្ម។ ទឹកប្រាក់ដែលនៅសល់ប្រមាណ ១១១លានដុល្លារទៀត បន្តឱ្យកម្ចីចាប់ពីដើមឆ្នាំ២០២៣នេះ ​រហូតដល់គម្រោងនេះ ត្រូវបានប្រើប្រាស់អស់។

បើតាមសេចក្តីប្រកាសព័ត៌មានរបស់ CGCC នៅថ្ងៃទី០៤ ខែមករានេះ គម្រោងធានាឥណទាន ដើម្បីស្តារអាជីវកម្ម ជាគម្រោងធានាឥណទានដែលមានគោលដៅគាំទ្រអាជីវកម្ម ទាំងអាជីវកម្មខ្នាតមីក្រូសហគ្រាសខ្នាតតូច និងមធ្យម និងសហគ្រាសខ្នាតធំ ក្នុងការបង្កើនលទ្ធភាពទទួលបានហិរញ្ញប្បទានពីគ្រឹះស្ថានហិរញ្ញវត្ថុចូលរួម (PFIs) សម្រាប់ធ្វើជាទុនបង្វិល, ការវិនិយោគនិងការពង្រីកអាជីវកម្ម។

ការសម្រេចឲ្យបន្តដាក់ណើរការគម្រោងធានាឥណទានដើម្បីស្តារអាជីវកម្មនេះ ត្រូវបានកែសម្រួលលក្ខខណ្ឌមួយចំនួនឲ្យមានភាពប្រសើរឡើងដូចជា សុពលភាពនៃគម្រោងការកំណត់និយមន័យនៃអាជីវកម្មខ្នាតមីក្រូ សហគ្រាសខ្នាតតូច និងមធ្យមនិងសហគ្រាសខ្នាតធំ និងការកំណត់ទំហំជាអតិបរមាសម្រាប់កម្ចីនីមួយៗ។

គួរបញ្ជាក់ថា ការធានាឥណទានរបស់សាជីវកម្មធានាឥណទានកម្ពុជា ក្រោមគម្រោងធានាឥណទានដើម្បីស្តារអាជីវកម្មនឹងបន្តដើរតួជាទ្រព្យធានាចាប់ពី ៧០% ដល់ ៨០% នៃទំហំឥណទានដែលផ្តល់ដោយ (PFIs)នឹងជួយកាត់បន្ថយតម្រូវការទ្រព្យធានាពីអាជីវកម្មដែលស្នើកម្ចី។សម្រាប់ព័ត៌មានលម្អិតសូមចូលទៅកាន់គេហទំព័ររបស់ CGCC www.cgcc.com.kh ៕