ភ្នំពេញ៖ រយៈពេល២ខែ ដើមឆ្នាំ២០២៣នេះ កម្ពុជាបាននាំចេញអង្ករទៅកាន់ទីផ្សារអន្តរជាតិជិត ១០ម៉ឺនតោន និងនាំចេញស្រូវបានចំនួនជាង ៨.៧ម៉ឺនតោន ដែលគិតជាទឹកប្រាក់សរុបបានប្រមាណ ២៩០,៤៩លានដុល្លារ។ នេះបើតាមការឲ្យដឹងរបស់សហព័ន្ធស្រូវអង្ករកម្ពុជា នៅថ្ងៃទី១០ ខែមីនា ឆ្នាំ២០២៣។

សហព័ន្ធស្រូវអង្ករកម្ពុជា បានឲ្យដឹងថា ការនាំចេញអង្ករទៅកាន់ទីផ្សារអន្តរជាតិចំនួន ៣៨ប្រទេស គិតជាទឹកប្រាក់សរុបបានចំនួន ៧២,៦៧លានដុល្លារ។ ក្នុងនោះ ការនាំចេញអង្ករទៅកាន់ប្រទេសចិន និងតំបន់ស្វយ័តហុងកុងបានចំនួន ៤៩ ០៥៦តោន ស្មើនឹង ៥០,៣៣% គិតជាទឹកប្រាក់ប្រមាណ ៣៣,៩៣លានដុល្លារ។ ចំណែកប្រទេសក្នុងទ្វីបអឺរ៉ុបចំនួន ២១ ការនាំចេញអង្ករបានចំនួន ៣៨ ៤៥៦តោន ស្មើនឹង ២៧,២៦លានដុល្លារ។ រីឯ ប្រទេសម៉ាឡេស៊ី និងសិង្ហបុរី នាំចេញអង្ករបានចំនួន ៤៤០៩តោន ស្មើនឹង ៣,០២លានដុល្លារ និងប្រទេសផ្សេងៗ នៅអាហ្វ្រិកអូស្ត្រាលី តួគី រុស្ស៊ី សហរដ្ឋអាមេរិក និងបណ្តាប្រទេសផ្សេងៗ នាំចេញអង្ករបានចំនួន៥ ៥៤៦តោន ស្មើនឹង ៨,១៤លានដុល្លារ។

ជាមួយគ្នានេះ កម្ពុជា ក៏បាននាំចេញអង្ករក្រអូបប្រណិតមានពូជស្រូវផ្ការំដួលបានចំនួន ៤៩ ៣៨១តោនអង្ករ, សែនក្រអូបបានចំនួន ៣៦ ៤៩៥តោន, អង្ករសបានចំនួន ៦ ៤៦១តោន, អង្ករចំហុយបានចំនួន ២៨៩០តោន, អង្ករសរីរាង្គបានចំនួន ២ ២៨៤តោន និងនាំចេញស្រូវបានប្រមាណ ៨៧១ ៣១៩តោន៕