ភ្នំពេញ៖ ភ្ញៀវទេសចរជាតិ និងអន្តរជាតិសរុបប្រមាណជាង ១៣លាននាក់ ក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ចាប់ពីថ្ងៃទី១៤-១៥-១៦ ខែមេសា​ ឆ្នាំ២០២៣ បានធ្វើដំណើររកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស​។ ក្នុងនោះក៏ក្រសួងទេសចរណ៍ បានរាប់បញ្ចូលទាំងចំនួនប្រជាជនដែលបានចូលរួមលេងកម្សាន្តនៅតាមទីតាំង ដែលមានការរៀបចំកម្មវិធីសង្រ្កាន្ត ព្រមជាមួយការលេងកម្សាន្តនៅតាមភូមិស្រុក និងកន្លែងជួបជុំនានាផងដែរ។

តាមរបាយការណ៍ដែលក្រសួងទទួលបានពីមន្ទីរទេសចរណ៍រាជធានី-ខេត្តទាំង២៥ រយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៣នេះ មានភ្ញៀវទេសចរសរុប ១៣,១៨៧,៧៧១នាក់ក្នុងនោះ ភ្ញៀវជាតិមានចំនួន ១៣,១៣២,០៨០នាក់ និងភ្ញៀវអន្តរជាតិចំនួន ៥៥,៦៩១នាក់។

គោលដៅទេសចរណ៍សំខាន់ៗរយៈពេល០៣ថ្ងៃនេះ ដែលមានភ្ញៀវលេងកម្សាន្តច្រើនជាងគេ​ រួមមាន៖ ខេត្តសៀមរាប ចំនួន ២,១២០,៣៧៣នាក់, ខេត្តបាត់ដំបង ចំនួន ១,៥០០,១៦៨នាក់, ខេត្តកំពង់ចាម ចំនួន ១,៤០៨,៨១១នាក់, រាធានីភ្នំពេញ ចំនួន ១,០៨០,៥០៩នាក់, ខេត្តព្រះសីហនុ ចំនួន ៨៨៧,៨៩៣នាក់, ខេត្តកំពត ចំនួន ៨៧០,៣៩៩នាក់, ខេត្តស្វាយរៀង ចំនួន ៧៦០,៣៩៩នាក់, ខេត្តកំពង់ឆ្នាំង ចំនួន ៧៣៩,១៥៩នាក់, ខេត្តបន្ទាយមានជ័យ ចំនួន ៦៥០,០១៣នាក់ ​និងខេត្តកំពង់ស្ពឺ ចំនួន ៥១២,៨៩៨នាក់។

ក្រសួងទេសចរណ៍ បានកត់សម្គាល់ថា ខួប១០ឆ្នាំនៃព្រឹត្តិការណ៍អង្គរសង្រ្កាន្ត, ការរៀបចំកម្មវិធីសង្រ្កាន្តនៅគ្រប់រាជធានីខេត្ត ពិសេសនៅតាមទីប្រជុំជនទីរួមខេត្តទីរួមស្រុក តំបន់គោលដៅទេសចរណ៍សំខាន់ៗ វត្តអារាម និងនៅតាមភូមិស្រុកនានា គឺជាកត្តាដែលបានទាក់ទាញឲ្យភ្ញៀវទេសចរ និងប្រជាពលរដ្ឋដើរកម្សាន្តច្រើនកុះករ។ ក្រសួងបានបញ្ជាក់ថា ពីមួយថ្ងៃទៅមួយថ្ងៃនៃពិធីបុណ្យ៣ថ្ងៃនេះ បណ្តារាជធានីខេត្តបានបង្កើនទំហំនៃការជួបជុំកម្សាន្តកម្មវិធីសង្រ្កាន្តនៅតាមទីប្រជុំជនសំខាន់ៗ ដូចជាការបន្ថែមឡានទឹកសម្រាប់បាញ់ទឹកកម្សាន្ត និងការប្រគុំតន្រ្តីបន្ថែមជាដើម ក៏ជាហេតុទាក់ទាញទេសចរច្រើនលើសពីការរំពឹងទុកបែបនេះផងដែរ៕