ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចឱ្យក្រុមហ៊ុនចំនួន២ទៀត បោះទុនវិនិយោគប្រមាណ ១០លានដុល្លារ ដើម្បីបង្កើតរោងចក្រកាត់ដេរ នៅរាធានីភ្នំពេញ និងខេត្តកំពង់ស្ពឺ។ ការអនុញ្ញាតតាមសំណើសុំវិនិយោគរបស់ក្រុមហ៊ុនទាំង២នេះ គឺធ្វើឡើងតាមរយៈគណៈកម្មាធិការវិនិយោគកម្ពុជា របស់ CDC ។

បើតាមការចុះផ្សាយរបស់ CDC នៅថ្ងៃទី០៥​​ ខែឧសភា ឆ្នាំ២០២៣នេះ ក្រុមហ៊ុនទាំង២ ដែលគណៈកម្មាធិការវិនិយោគកម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគនោះ ទី១ មានឈ្មោះ Z.S.M GARMENT(CAMBODIA) CO., LTD វិនិយោគបង្កើតរោងចក្រកាត់ដេរសម្លៀកបំពាក់នៅក្នុងខណ្ឌពោធិ៍សែនជ័យរាជធានីភ្នំពេញ ក្នុងទំហំទុនប្រមាណ ៥,១លានដុល្លារ ដែលអាចបង្កើតការងារបានចំនួន១.៨៨៦កន្លែង។

សម្រាប់ក្រុមហ៊ុនទី២ មានឈ្មោះ SUXINGMAXGARMENT (CAMBODIA) CO., LTD គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងស្រុកសំរោងទង ខេត្តកំពង់ស្ពឺ បានបោះទុនវិនិយោគប្រមាណ ៥,០៤លានដុល្លារ និងអាចបង្កើតការងារបានចំនួន ១.១៨៦កន្លែង៕