ភ្នំពេញ៖ ធនាគារ ABA បានរម្លឹកដល់អតិថជនរបស់ខ្លួនអំពីសកម្មភាពឆបោកកាលពីពេលថ្មីៗនេះ​ ពាក់ព័ន្ធនឹងការបន្លំកូដ QR នៅតាមហាង ដោយជនឆបោកបានព្រីនកូដ QR ផ្ទាល់ខ្លួន ហើយយកទៅបិទពីលើកូដ QR របស់ម្ចាស់ហាង។ ការណ៍ធ្វើបែបនេះ ទឹកប្រាក់ដែលអតិថិជនបង់ នឹងចូលទៅគណនីរបស់ជនខិលខូចទាំងនោះ។

ដើម្បី​ធានា​នូវ​សុវត្ថិភាព​ទាំង​អ្នក​បង់ប្រាក់​និង​អ្នក​ទទួល​ប្រាក់​ធនាគារ នៅថ្ងៃទី១៩ ខែឧសភា ឆ្នាំ២០២៣នេះ ធនាគារ ABA បាន​ណែនាំ​នូវ​គោលការណ៍​សំខាន់ៗ​ ដល់អតិថជនឱ្យ​អនុវត្ត​នៅពេលដែល​ទូទាត់​តាម​កូដ​QR​ ម្តងៗ​។ សម្រាប់​អ្នក​បង់ប្រាក់​/​អតិថិជន​ ABA ឱ្យត្រួតពិនិត្យ​អត្តសញ្ញាណ​របស់​ម្ចាស់​គណនី​ទទួល​ ដោយ​មើល​ឈ្មោះ​និង​លេខ​គណនី​របស់​គាត់​ឲ្យ​បាន​ច្បាស់លាស់​សិន​មុន​នឹង​ធ្វើ​ប្រតិបត្តិការ​ណាមួយ​បន្ត​ទៀត​។​

​ផ្ទៀងផ្ទាត់​ឡើង​វិញ​នូវ​ឈ្មោះ​អ្នក​ទទួល​ប្រាក់​ពី​លោក​អ្នក​ ដែល​បង្ហាញ​នៅ​លើ​អេ​ក្រង់​អេប​ ABA​ Mobile​ មុន​នឹង​ធ្វើ​ប្រតិបត្តិការ​ណាមួយ​។​ បន្ទាប់​ពី​បញ្ចប់​ប្រតិបត្តិការ​ដោយ​ជោគជ័យ​រួច​សូម​ប្រាប់​ឲ្យ​អ្នកលក់​/​អាជីវករ​ ពិនិត្យ​គណនី​របស់​ពួក​គាត់​ឬ​ពិនិត្យ​សារ​ជូនដំណឹង​ ដើម្បី​ប្រាកដ​ថា​ អ្នកលក់​ពិតជា​បាន​ទទួល​ប្រាក់​ប្រាកដ​មែន​។​

ចំពោះ ​អ្នក​ទទួល​ប្រាក់​/​ពាណិជ្ជករ​ ABA ឱ្យ​ត្រួតពិនិត្យ​ជាប់​ជា​និច្ច​ថា​ទឹកប្រាក់​ពិតជា​បាន​ចូល​គណនី​របស់​អ្នក​ ដោយ​ពិនិត្យ​មើល​របាយការណ៍​គណនី​ និង​/​ឬ​សារ​ជូនដំណឹង​បញ្ជាក់​ពី​ការ​ទទួល​ប្រាក់​។​ ប្រើប្រាស់​មុខងារ​ផ្តល់​សារ​ជូនដំណឹង​តាម​គ្រុប​Telegram​ ពី​យើងខ្ញុំ​។​ តាម​រយៈ​ការ​ភ្ជាប់​សារ​បញ្ជាក់​ការ​ទូទាត់​ប្រាក់​ទៅ​ក្នុង​គ្រុប​ Telegram ​លោក​អ្នក​នឹង​ទទួល​បាន​សារ​បញ្ជាក់​ភ្លាមៗ​រាល់ពេល​អតិថិជន​បង់ប្រាក់​ ឬ​ទូទាត់​រួច​។​ មុខងារ​នេះ​នឹង​អនុញ្ញាត​ឲ្យ​លោក​អ្នក​ ក៏​ដូច​ជា​សមាជិក​គ្រុប​ និង​បុគ្គលិក​តាមដាន​រាល់​ប្រតិបត្តិការ​ទាំងអស់​រួម​គ្នា​។​សូម​មើល​ពី​របៀប​ភ្ជាប់​សារ​បញ្ជាក់​ការ​ទូទាត់​ក្នុង​គ្រុប​ Telegram​ ទី​នេះ (https://youtube.com/shorts/-NlWukJT9UE?feature=share)​។

ទោះយ៉ាងណា ធនាគារ ABA បញ្ជាក់ថា ​ភាគី​ទាំង​ពីរ​ចាំបាច់ត្រូវបង្កើន​ការ​ប្រុង​ប្រយ័ត្ន​ខ្ពស់​បំផុត​និង​អនុវត្ត​នូវ​វិធានការ​ចាំបាច់​ ដើម្បី​ការពារ​ខ្លួន​កុំ​ឲ្យ​ក្លាយជា​ជន​រង​គ្រោះ​នៃ​សកម្មភាព​ឆ​បាក​ទាំងនោះ​៕