ភ្នំពេញ៖ គណៈ​កម្មាធិការ​តំបន់​សេដ្ឋកិច្ច​ពិសេសកម្ពុជា នៃក្រុម​ប្រឹក្សាអភិវឌ្ឍន៍កម្ពុជា (CDC) បាន​សម្រេច​ចេញវិញ្ញាបនបត្រ​ចុះ​បញ្ជីគម្រោង​វិនិយោគ​ជូនដល់​ក្រុមហ៊ុនចំនួន​៣ បោះទុនវិនិយោគ​ប្រមាណ ១៦លានដុល្លារ ដើម្បី​បង្កើត​រោង​ចក្រ​នៅ​ក្នុង​តំបន់​សេដ្ឋកិច្ច​ពិសេស​ខេត្ត​ស្វាយរៀង ដែល​អាចបង្កើតការងារ​បានជិត ៣៥០០កន្លែង។

បើតាម​ CDC នៅថ្ងៃទី​០៩ ខែមិថុនា ឆ្នាំ២០២៣នេះ គណៈ​កម្មាធិការ​តំបន់​សេដ្ឋកិច្ច​ពិសេស​កម្ពុជា នៃក្រុម​ប្រឹក្សាអភិវឌ្ឍន៍កម្ពុជា (CDC) បានសម្រេចចេញ​វិញ្ញាបនបត្រចុះ​បញ្ជីគម្រោង​វិនិយោគ​ជូន​ដល់​ក្រុមហ៊ុនចំនួន​៣ ដើម្បី​បង្កើត​រោងចក្រ​នៅ​ក្នុង​តំបន់​សេដ្ឋកិច្ច​ពិសេសខេត្តស្វាយរៀង​ដូចគ្នា។ មាន​ក្រុមហ៊ុន Qingdao Zhongmian (Cambodia) Knitting Co., Ltd បោះទុន​ប្រមាណ ៦,៨​លានដុល្លារ គម្រោង​បង្កើ​ត​រោង​ចក្រ​កាត់​ដេរ​ និងចាក់ស​ម្លៀក​បំពាក់​ ដែល​ស្ថិតនៅ​ក្នុង​តំបន់​សេដ្ឋកិច្ច​ពិសេស​ ឈីលូ ជាន ពុ ចាយ ខេត្ត​ស្វាយ​រៀង ដែល​អាច​បង្កើត​ការងារ​បាន​ប្រមាណ ២៤១០កន្លែង។ រីឯ ក្រុមហ៊ុន Huiyao Yaoxing Plastic Packaging Products (Cambodia) Co., Ltd បោះទុន​ចំនួន​ ៥,៧​លានដុល្លារ គម្រោង​បង្កើ​ត​រោង​ចក្រ​ផលិត​បា​វ​ និង​សម្ភារៈ​វេច​ខ្ចប់​គ្រប់​ប្រភេទ​ ដែល​ស្ថិត​នៅ​ក្នុង​តំបន់​សេដ្ឋកិច្ច​ពិសេស​​ ឈីលូ ជាន​ ពុ​ ចាយ​ ខេត្ត​ស្វាយ​រៀង​ និង​អាច​បង្កើត​ការងារ​បាន​ចំនួន​ ៤៩៥កន្លែង។

ចំណែក​ ក្រុមហ៊ុន Dong Wang Paper industry (Cambodia) Co., Ltd បោះទុន​ប្រមាណ ៣,៥លានដុល្លារ គម្រោង​បង្កើត​រោង​ចក្រ​ផលិត​កេស​កាតុង​ និង​សម្ភារៈ​វេច​ខ្ចប់​ ដែល​ស្ថិត​នៅ​ក្នុង​តំបន់​សេដ្ឋកិច្ច​ពិសេស ហាយ-ផាក​ ខេត្ត​ស្វាយ​រៀង ដែលអាច​បង្កើត​ការងារ​បាន​ប្រមាណ ៥៨៦កន្លែង។