ភ្នំពេញ៖ រដ្ឋាភិបាលជប៉ុនបានផ្តល់ឥណទានសម្បទានសម្រាប់អនុវត្តគម្រោងចំនួន២ ដែលមានទឹកប្រាក់សរុបប្រមាណ ១៨៨,១១លានដុល្លារ។ គម្រោងទី១ មានទឹកប្រាក់ចំនួន ២៣,៦៩២លានយ៉េន (ប្រមាណ ១៧២,៩៣លានដុល្លារ)សម្រាប់អនុវត្ត «គម្រោងកែលម្អការតភ្ជាប់ផ្លូវជនបទ» និងគម្រោងទី២ មានទឹកប្រាក់ចំនួន ២,០៨១លានយ៉េន(ប្រមាណ ១៥,១៨លានដុល្លារ) សម្រាប់អនុវត្ត «គម្រោងពង្រីកសមត្ថភាពផ្គត់ផ្គង់ទឹកស្អាតខេត្តសៀមរាប ដំណាក់កាលទី៣»។

បើតាមការចេញផ្សាយរបស់ក្រសួងការបរទេសនិងសហប្រតិបត្តិការអន្តរជាតិបានឲ្យដឹងថា គម្រោងទាំងពីរខាងលើ ត្រូវបានចុះហត្ថលេខារួមគ្នា លើលិខិតប្តូរសារនិងឯកសារពាក់ព័ន្ធ ដោយឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសនិងសហប្រតិបត្តិការអន្តរជាតិ នៃកម្ពុជា ជាមួយនិងឯកឧត្តម Ueno Atsushi ឯកអគ្គរាជទូតជប៉ុនប្រចាំកម្ពុជា កាលពីថ្ងៃទី២០ ខែមិថុនា ឆ្នាំ២០២៣នេះ៕