ភ្នំពេញ៖ ករណីមានការចោទប្រកាន់លើការដាក់សម្ពាធជ្រុលហួសហេតុពីមន្ត្រីឥណទាននៅក្នុងខេត្តរតនៈគិរីត្រូវបានសមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) ចេញសេចក្តីថ្លែងការណ៍ឆ្លើយបំភ្លឺមួយនៅរសៀលថ្ងៃទី០៩ ខែសីហា ឆ្នាំ២០២៣។

សេចក្តីថ្លែងការណ៍នោះបានសរសេរថា សមាគមទាំងពីរ កំពុងយកចិត្តទុកដាក់ទៅលើ​ការ​ចោទ​ប្រកាន់​​ទាក់ទងទៅនឹងការធ្វើ​អត្តឃាតនិង​ការប៉ុនប៉ង​ធ្វើ​អត្តឃាត ​ដោយសារ​ការបង្ខំលើការប្រមូលបំណុលពីមន្រ្តីឥណទាននៃគ្រឹះស្ថានធនាគារនិងហិរញ្ញវត្ថុនៅក្នុងខេត្តរតនៈគិរី។ ករណីការចោទប្រកាន់នេះ សមាគម បានស្នើឱ្យគ្រឹះស្ថាននីមួយៗដែលមានឈ្មោះនៅក្នុងរបាយការណ៍នោះ ធ្វើការត្រួតពិនិត្យឱ្យបានហ្មត់ចត់ទៅលើករណីចោទប្រកាន់ទាំងអស់នោះ។

សមាគមទាំងពីរ បានលើកឡើងថា ដើម្បីធានាបាននូវភាពត្រឹមត្រូវនិង ភាពមិនលម្អៀងលើលទ្ធផលនៃការរកឃើញចំពោះបញ្ហានេះ ចាំបាច់នឹងមានការស៊ើបអង្កេតឯករាជ្យមួយផ្សេងទៀត។ប្រសិនបើ ពិតជាមានការប្រព្រឹត្តិខុសពីសំណាក់គ្រឹះស្ថានហិរញ្ញវត្ថុជាសមាជិកមែននោះ សមាគមទាំងពីរនឹងគាំទ្រយ៉ាងខ្លាំងក្លាចំពោះចំណាត់ការវិន័យលើ​គ្រឹះស្ថានធនាគារ និងមីក្រូហិរញ្ញវត្ថុឬបុគ្គលពាក់ព័ន្ធ។វិធានការដ៏ម៉ឺងម៉ាត់នេះ គឺជាការចាំបាច់ដើម្បីរក្សាកេរ្តិ៍ឈ្មោះនិងទំនុកចិត្តសាធារណជនមកលើប្រព័ន្ធធនាគាររបស់យើង។

សមាគមធនាគារនៅកម្ពុជានិងសមាគមមីក្រូហិរញ្ញវត្ថុកម្ពុជា សូមអរគុណចំពោះការយកចិត្តទុកដាក់ពីសំណាក់អង្គការមិនមែនរដ្ឋាភិបាលលើបញ្ហានេះហើយសមាគមទាំងពីរសង្ឃឹមថានៅពេលអនាគត យើងនឹងអាចធ្វើការជាមួយគ្នាប្រកបដោយប្រសិទ្ធភាព ដើម្បីការពារផលប្រយោជន៍អ្នកប្រើប្រាស់៕