ភ្នំពេញ៖ កម្ពុជា បាននាំផ្លែមៀនស្រស់ជាង ១ម៉ឺនតោនទៅកាន់ទីផ្សារប្រទេសចិន ដោយគិតចាប់ពីខែមករា ដល់ថ្ងៃទី២៧ ខែតុលា ឆ្នាំ ២០២៣នេះ។នេះបើតាមការឱ្យដឹងពីលោកជំទាវ អ៊ឹម រចនា អ្នកនាំពាក្យក្រសួងកសិកម្ម​។

អនុរដ្ឋលេខាធិការ និងជាអ្នកនាំពាក្យក្រសួងកសិកម្មលោកជំទាវ អ៊ឹម រចនា កាលពីនៅថ្ងៃទី២៧ ខែតុលា ឆ្នាំ ២០២៣ ឱ្យដឹងថា ក្នុងរយៈពេលមួយឆ្នាំកន្លងនេះអគ្គនាយកដ្ឋានកសិកម្មបានចុះបញ្ជីចម្ការមៀននិងរោង​ចក្រវេច​ខ្ចប់​សម្រាប់នាំ​ចេញផ្លែមៀនស្រស់កម្ពុជាទៅកាន់ប្រទេសចិន​បានចំនួន៩៧ក្រុមហ៊ុន/ម្ចាស់​ចម្ការ និង១២រោង​ចក្រវេចខ្ចប់និងទទួលបានការអនុម័តទទួល​ស្គាល់ជាផ្លូវ​ការពីអគ្គរដ្ឋបាលគយ​នៃសាធារណ​រដ្ឋ​ប្រជាមានិតចិន(GACC)។

នៅក្នុងឆ្នាំ២០២៣នេះ ដោយគិតចាប់ពីខែមករាដល់ថ្ងៃទី២៧ ខែតុលា ឆ្នាំ២០២៣ កម្ពុជា បាននាំចេញផ្លែមៀនស្រស់ទៅប្រទេសចិនមានចំនួន១១ ៤០៣,២៣តោន។ ចំណែកឯ ការនាំចេញផ្លែមៀនស្រស់​កម្ពុជា ទៅប្រទេសចិន ចាប់ពីថ្ងៃទី២៧ខែតុលា ឆ្នាំ២០២២ ដល់ថ្ងៃទី២៧ ខែតុលា ឆ្នាំ២០២៣ មានចំនួនសរុប ១៤ ៣៤៥,៧៤តោន ក្នុងនោះ នៅឆ្នាំ២០២២ ចាប់ពីថ្ងៃទី២៧ ខែតុលា ដល់ដំណាច់ខែធ្នូឆ្នាំ២០២២ កម្ពុជាបាននាំចេញផ្លែមៀនស្រស់ទៅប្រទេសចិន មានចំនួន ២ ៩៤២,៥១តោន។

ក្រៅពីការនាំចេញទៅកាន់ទីផ្សារប្រទេសចិនសហគ្រាសនៅកម្ពុជាកំពុងកែច្នៃផ្លែមៀនស្រស់​របស់ខ្មែរ ទៅជាដំណាប់មៀន ផ្លែមៀនកំប៉ុងទឹកមៀនកៀប និងស្រាមៀន។ នេះជាការឱ្យដឹងបន្ថែមពីអ្នកនាំពាក្យក្រសួងកសិកម្ម​រុក្ខាប្រមាញ់ និងនេសាទ ដដែល។

លោកជំទាវ អ៊ឹម រចនា បញ្ជាក់ថា ក្រសួងកសិកម្មរុក្ខាប្រមាញ់ និងនេសាទ​ បន្តលើកទឹកចិត្តនិងគាំទ្រសហគ្រាសទាំងអស់ចំពោះ​កិច្ចខិតខំប្រឹងប្រែងនៅក្នុងការកែច្នៃផលិតផលកសិកម្មខ្មែរឲ្យមានតម្លៃបន្ថែមខ្ពស់ហើយក្រសួងនឹង​សហការជាមួយភាគីពាក់ព័ន្ធដើម្បីផ្សព្វផ្សាយនិងរុញផលិតផលដែលមានគុណភាពទាំងអស់នេះ ទៅកាន់ទីផ្សារពិភពលោក៕