ភ្នំពេញ៖ រដ្ឋ រកចំណូលបានពីវិស័យព្រៃឈើប្រមាណ៩២ម៉ឺនដុល្លារ ក្នុងរយៈពេល១២ខែ ឆ្នាំ២០២៣។ ចំណូលទាំងនោះបានមកពីការងារព្រៃឈើ, ការងារអភិរក្សសត្វព្រៃ, កសិដ្ឋានចិញ្ចឹមបង្កាត់ពូជស្វាក្តាម និងការសង្រ្គោះសត្វព្រៃ, ការងារដាំដើមឈើ,ការងារនីតិកម្ម និងវិវាទ, ការងារឧស្សាហកម្មនិងពាណិជ្ជកម្ម។ នេះបើតាមរបាយការណ៍ស្តីពី«សភាពការណ៍កសិកម្មរុក្ខាប្រមាញ់ និងនេសាទ ប្រចាំឆ្នាំ២០២៣»។

សំណុំរឿងបទល្មើសព្រៃឈើ សត្វព្រៃនិងកាប់រានដីព្រៃមានចំនួនសរុប ៥៩២ករណីក្នុងនោះសំណុំរឿងបទល្មើសព្រៃឈើត្រូវពិន័យអន្តរការណ៍ចំនួន ១៧០ករណីខណៈដែលសំណុំរឿងបទល្មើសព្រៃឈើត្រូវបញ្ជូនទៅតុលាការចំនួន ៤២២ករណី។ ក្នុងរបាយការណ៍ស្តីពីសភាពការណ៍កសិកម្មប្រចាំឆ្នាំ២០២៣ រយៈពេល១ឆ្នាំ២០២៣ ក៏បានលើកឡើងពីករណីបទល្មើលព្រៃឈើដូច្នេះផងដែរ។

របាយការណ៍ដដែល បានឱ្យដឹងពីវត្ថុតាងនៃបទល្មើសព្រៃឈើឃាត់និងដកហូតបាន ឈើមូល-ឈើអារចំនួន ៥២៧ម៉ែត្រគីប, ឈើក្រាក់ធ្នង់ ១ម៉ែត្រគីប, ឈើជន្លង់ម្រេចចំនួន ១០៩៨ដើម, ធ្យូងចំនួន ៩៩ ៧៧៩គីឡូក្រាម និង ៨៩០ការ៉ុង, កូនឈើចំនួន ៩៧០ដើម, សត្វព្រៃចម្រុះចំនួន ៤៨៤ក្បាល,សាច់សត្វព្រៃទម្ងន់ ៣៤៣គីឡូក្រាម, ផ្ទៃដីព្រៃឈើបានកាប់រានទំហំ២ ៦៦១ហិកតា, អនុផលព្រៃឈើ និងឧបករណ៍សម្ភារផ្សេងៗមួយចំនួនទៀត៕