រដ្ឋាភិបាលជប៉ុន ផ្តល់ជំនួយជាង៧ម៉ឺនដុល្លារ ដល់ CWBF សម្រាប់សាងសង់ដំបូលទីលានបាល់បោះរទេះជនពិការ ក្នុងខេត្តបាត់ដំបង
ភ្នំពេញ៖ សហព័ន្ធកីឡាបាល់បោះរទេះជនពិការកម្ពុជា(CWBF) ទទួលបានជំនួយឥតសំណងចំនួន ៧៦ ៣៣៣ដុល្លារ ពីរដ្ឋាភិបាលជប៉ុន សម្រាប់សាងសង់ដំបូលនៅទីលានបាល់បោះរទេះជនពិការ ក្នុងខេត្តបាត់ដំបង។ ថវិកាដែលផ្តល់ឱ្យនេះ ធ្វើឡើងតាមរយៈគម្រោងគម្រោងទ្រង់ទ្រាយតូចវប្បធម៌គូសាណូណិរបស់ប្រទេសជប៉ុន។
ឯកអគ្គរាជទូត អ៊ូអិណុ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា បានឱ្យដឹងថា ជំនួយឥតសំណងនេះ នឹងចូលរួមចំណែកនាំឱ្យក្រុមកីឡាបាល់បោះរទេះជនពិការ ទទួលបានលទ្ធផលកាន់តែល្អប្រសើរជាងមុនក្នុងការប្រកួតអន្តរជាតិនានា។ បន្ថែមពីនេះ គឺទាក់ទាញចំណាប់អារម្មណ៍របស់មនុស្សឱ្យចូលរួមលេងកីឡាកាន់តែច្រើន ដើម្បីនាំមកនូវសង្គមដែលមានសុខភាពល្អនាពេលអនាគត។
បើតាមការចុះផ្សាយរបស់ស្ថានទូតជប៉ុនប្រចាំកម្ពុជា នាថ្ងៃទី២១ ខែមីនា ឆ្នាំ២០២៤ ជំនួយនេះត្រូវបានចុះហត្ថលេខាដោយលោកឯកអគ្គរាជទូត អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងអ្នកម្នាង ស៊ីសុវត្ថិ កន្ធីរ៉េត ប្រធានសហព័ន្ធកីឡាបាល់បោះរទេះជនពិការកម្ពុជា(CWBF)៕