ភ្នំពេញ៖ មូលនិធិគន្ធបុប្ផាកម្ពុជា បានចុះអនុស្សរណៈនៃការយោគយល់គ្នាជាមួយ គ្រឹះស្ថានមីក្រូហិរញ្ញវត្ថុ អម្រឹត ម.ក. ដើម្បីផ្តល់ភាពងាយស្រួល និងជម្រើសថ្មីមួយទៀតដល់សប្បុរសជននានា ដែលមានបំណងបរិច្ចាគថវិកាជូនមូលនិធិគន្ធបុប្ផាកម្ពុជា។

តាមរយៈអនុស្សរណៈនៃការយោគយល់គ្នា នារសៀលថ្ងៃទី២៥ ខែមីនា ឆ្នាំ២០២៤ សប្បុរសជនអាចផ្តល់វិភាគទានសប្បុរសធម៌ដល់មូលនិធិគន្ធបុប្ផាកម្ពុជា នៅតាមទីតាំងបញ្ជរនៅគ្រប់សាខាទាំងអស់របស់គ្រឹះស្ថានមីក្រូហិរញ្ញវត្ថុ អម្រឹត ម.ក. នៅទូទាំងប្រទេស ឬប្រើប្រាស់សេវាធនាគារអេទ្បិចត្រូនិច (E-Banking), ឬដោយការស្កែន QR Code តាមទូរសព្ទដោយមិនគិតថ្លៃសេវា។

បើតាមការចុះផ្សាយរបស់មូលនិធិគន្ធបុប្ផាកម្ពុជា គ្រឹះស្ថានមីក្រូហិរញ្ញវត្ថុ អម្រឹត ម.ក. ក៏នឹងបន្ដសហការជាមួយអង្គភាពប្រតិបត្តិនៃមូលនិធិគន្ធបុប្ផាកម្ពុជា ក្នុងយុទ្ធនាការផ្សព្វផ្សាយផ្សេងៗ ដើម្បីកៀរគរការបរិច្ចាគថវិកាជូនមូលនិធិគន្ធបុប្ផាកម្ពុជាបន្ថែមទៀតផងដែរ៕