ចំណេះដឹង និង ព័ត៌មាន

រដ្ឋមន្ត្រីក្រសួងប្រៃសណីយ៍ បានលើកពីសក្តានុពលនិងពង្រីកទំនាក់ទំនងរវាងអ្នកអភិវឌ្ឍន៍សុសវែរ និងបច្ចេកវិទ្យាឌីជីថលដើម្បីលើកកម្ពស់កិច្ចសហការ និងការផ្លាស់ប្តូរបទពិសោធជំរុញការរីកចម្រើន នៃវិស័យឌីជីថលនៅកម្ពុជា។ការជំរុញវិស័យឌីជីថលនៅកម្ពុជាឱ្យកាន់តែខ្លាំងនេះ ស្ថិតនៅក្នុងបញ្ចកោណទី៥ នៃ«យុទ្ធសាស្រ្តបញ្ចកោណ»ដំណាក់កាលទី១។

វេទិកា«ផ្គូផ្គងរវាងអ្នកផលិតនិងអ្នកទិញនិងការតាំងបង្ហាញផលិតផលក្នុងស្រុក» រៀបចំធ្វើនៅផ្សារទំនើបបឺកស៊ី ក្រុងប៉ោយប៉ែតខេត្តបន្ទាយមានជ័យ ចាប់ពីថ្ងៃទី៨-១០ ខែកញ្ញា ឆ្នាំ២០២៣នេះ។វេទិកានេះ បង្កើតឱកាសទីផ្សារសម្រាប់សហគ្រាសធុនមីក្រូ តូច និងមធ្យមនិងអ្នកផលិតក្នុងស្រុក ដើម្បីជួបអ្នកទិញសក្តានុពលនិងចូលរួមក្នុងការពិភាក្សាប្រកបដោយផ្លែផ្កាលើលក្ខខណ្ឌផ្គត់ផ្គង់និងតម្រូវការផ្សេងៗ ដែលរួមចំណែកអភិវឌ្ឍសេដ្ឋកិច្ចក្នុងស្រុកប្រកបដោយបរិយាប័ន្ននិងនិរន្តរភាព។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា(CDC) បានសម្រេចឱ្យក្រុមហ៊ុនចំនួន១០ បោះទុនវិនិយោគក្នុងទំហំទឹកប្រាក់ ១៤៦.៤៥លានដុល្លារដែលអាចបង្តើតការងារជិត១.៥ម៉ឺនកន្លែង។ នេះបើតាមការចុះផ្សាយរបស់ CDC នៅថ្ងៃទី០៧ ខែកញ្ញា ឆ្នាំ២០២៣នេះ។

រដ្ឋបាលរាជធានីភ្នំពេញ ដាក់ឱ្យអនុវត្តន៍សាកល្បងការផ្តល់សេវារដ្ឋបាលតាមប្រព័ន្ធអនឡាញ(Online)លើវិស័យអាទិភាពចំនួន ៤ ដើម្បីផ្តល់សេវាសាធារណៈដល់ប្រជាពលរដ្ឋឱ្យបានកាន់តែឆាប់ រហ័យជាងមុន សន្សំសំចៃកម្រៃ និងចំណេញពេលវេលា។ នេះបើតាមសេចក្តីជូនដំណឹងរបស់រដ្ឋបាលរាជធានីភ្នំពេញកាលពីថ្ងៃទី០៦ ខែកញ្ញា ឆ្នាំ២០២៣នេះ។

អគ្គនាយកដ្ឋានពន្ធដារកោះហៅម្ចាស់ក្រុមហ៊ុនចំនួន១១ ឲ្យចូលខ្លួនដោះស្រាយបំណុលពន្ធជូនរដ្ឋតាមកាលកំណត់ដោយមិនឲ្យលើសពី ១៥ថ្ងៃ បន្ទាប់ពីការជូនដំណឹងរបស់អគ្គនាយកដ្ឋានពន្ធដារកាលពីថ្ងៃទី០១ខែកញ្ញា ឆ្នាំ២០២៣នេះ ដោយផ្អែកតាមច្បាប់ស្តីពីសារពើពន្ធនិងប្រកាសស្តីពីការគ្រប់គ្រងបំណុលពន្ធ។

ក្នុងខែសីហា ឆ្នាំ២០២៣នេះ កម្ពុជារកចំណូលបានប្រមាណ ២ ៧៧៤ ៥៨៦ដុល្លារ ពីការលក់សំបុត្រចូលទស្សនារមណីយដ្ឋានអង្គរដោយទទួលបានភ្ញៀវទេសចរបរទេសសរុបប្រមាណ ៥៩ ១៤៨នាក់។ បើធៀបនឹងរយៈពេលដូចគ្នាក្នុងឆ្នាំ២០២២ចំនួនភ្ញៀវទេសចរបរទេសទិញសបុត្រចូលទស្សនាអង្គរមានចំនួន ១២១,៤០% និងរកចំណូលបានប្រមាណ ១៥៨,៤០%។

អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម និងក្រុមហ៊ុន ភីធីធី (ខេមបូឌា) បានសហការគ្នាអនុវត្តគម្រោងជំរុញការលក់ផលិតផលខ្មែរក្រោមកម្មវិធីស្តីពី៖ «កិច្ចសហការជំរុញនិងបង្កើនការលក់ផលិតផលខ្មែរ» នៅតាមស្ថានីយ៍ប្រេងឥន្ធនៈភីធីធីតាមបណ្តារាជធានី-ខេត្ត។ ការអនុវត្តគម្រោងនេះដើម្បីលើកកម្ពស់ផលិតផលខ្មែរដែលជាផលិតផលលក្ខណៈគ្រួសារតូចៗ លើកកម្ពស់ទីផ្សារក្នុងស្រុកនិងផលប្រយោជន៍សហគមន៍។

ក្រសួងពាណិជ្ជកម្មបានបញ្ជាក់ពីតម្លៃលក់រាយប្រេងឥន្ធនៈ នៅតាមបណ្ដាស្ថានីយនានាក្នុងប្រទេសកម្ពុជាចាប់ពីថ្ងៃទី០១-១០ ខែកញ្ញា ឆ្នាំ២០២៣។ បើតាមសេចក្តីជូនដំណឹងរបស់ក្រសួងពាណិជ្ជកម្ម អំពីការកំណត់តម្លៃប្រេងឥន្ធនៈថ្មីនេះ គឺប្រេងសាំងធម្មតាចុះថ្លៃ ៥០រៀល ដែលមានតម្លៃ ៤,៦០០រៀល ក្នុងមួយលីត្រ។ ចំណែក ប្រេងម៉ាស៊ូតឡើង ៥០រៀល ដែលមានតម្លៃ ៤,៧៥០រៀល ក្នុងមួយលីត្រ។

ធនាគារជាតិនៃកម្ពុជា សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជានិងភាគី​ពាក់​ព័ន្ធ បាន រៀបចំស្តង់ដាកិច្ចសន្យាឥណទាន និងខចែងស្តង់ដានៃកិច្ចសន្យាឥណទាន​សម្រាប់ដាក់ឱ្យ​ប្រើប្រាស់នៅក្នុងគ្រឹះ​ស្ថាន​ធនា​គារ និង​ហិរញ្ញវត្ថុ។ ស្តង់ដានេះ នឹងរួមចំណែក​កិច្ចការពារអតិថិជនក៏ដូច​ជាបរិយាបន្នហិរញ្ញវត្ថុនៅកម្ពុជា។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា(CDC) បានសម្រេចផ្តល់វិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន១០ ដែលបានស្នើសុំវិនិយោគបង្កើតរោងចក្រនៅក្នុងរាជធានី-ខេត្តគោលដៅចំនួន៣ មានដើមទុនសរុប៥៩.៨លានដុល្លារ។នេះបើតាមការចុះផ្សាយរបស់ CDC នៅថ្ងៃទី៣០ ខែសីហាឆ្នាំ២០២៣នេះ ដោយគម្រោងបង្កើតរោងចក្រទាំងនេះ នឹងផ្តល់ឱកាសការងារដល់កម្ពុជាជិត១ម៉ឺន២ពាន់នាក់។