ចំណេះដឹង និង ព័ត៌មាន

ក្រុមប្រឹក្សាអភិវឌ្ឍន៍កម្ពុជា (CDC) ត្រឹមរយៈពេលកន្លះខែដើមឆ្នាំ២០២៤ បានអនុម័តគម្រោង វិនិយោគចំនួន១០ដែលមានទុនវិនិយោគជាង ៦០លានដុល្លារ តាមសំណើរបស់ក្រុមហ៊ុនវិនិយោគ។ តាមសេចក្តីប្រកាសព័ត៌មានរបស់CDC នៅថ្ងៃទី១៧ ខែមករានេះ គម្រោងទាំង១០នោះ គ្រោងនឹងបង្កើតរោងចក្រនៅក្នុងខេត្តកំពង់ស្ពឺចំនួន៥,ភ្នំពេញចំនួន២, ខេត្តតាកែវចំនួន២ និងខេត្តកណ្តាលចំនួន១ដែលអាចបង្កើតការងារសរុបជាង១២ម៉ឺនកន្លែង។

សហភាពអឺរ៉ុប (EU) គ្រោងនឹងផ្តល់ហិរញ្ញប្បទានឥតសំណងចំនួន ៨៦លានអឺរ៉ូ ស្មើនឹងប្រមាណ៩៤លានដុល្លារ សម្រាប់កម្មវិធីសំខាន់ៗចំនួន៤ នៅកម្ពុជា។ ជំនួយនេះស្ថិតនៅក្នុងក្របខណ្ឌGlobal Gateway ដែលជាយុទ្ធសាស្រ្តថ្មីរបស់ EU ក្នុងគោលបំណងកៀរគរការវិនិយោគបន្ថែមសម្រាប់ប្រទេសជាដៃគូដើម្បីបង្កើនវិសាលភាព ប្រសិទ្ធភាព និងប្រសិទ្ធផល នៃកិច្ចអន្តរាគមន៍របស់ខ្លួន។

កម្ពុជា-បារាំង បានចុះអនុស្សរណៈយោគយល់គ្នាលើគម្រោងចំនួន៦ក្នុងគោលដៅជំរុញការអភិវឌ្ឍសេដ្ឋកិច្ចកម្ពុជា និងគាំទ្រដល់ធុរកិច្ចប្រទេសនិយាយភាសាបារាំងដោយមានសកម្មភាពរៀបចំជំនួបពាណិជ្ជកម្ម សន្និសីទ សិក្ខាសាលានិងព្រឹត្តិការណ៍ធុរកិច្ចផ្សេងៗមួយចំនួនទៀត។

IDEAS Project Cambodia កាលពីថ្ងៃទី១២ ខែមករា ឆ្នាំ២០២៤ បានប្រកាសជ្រើសរើសសហគ្រិនជាស្រ្ដីជាលើកទី២ចូលរៀនវគ្គបណ្តុះបណ្តាល ជំនាញឌីជីថល និងការធ្វើពាណិជ្ជកម្មតាមប្រព័ន្ធអេឡិចត្រូនិច(E-Commerce)។

រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ប្រាប់ពីរដូវត្រូវត្រីប្រហុកជាលើកទី២ ដោយចាប់ផ្តើមសម្បូរពីថ្ងៃទី១៥-២១ មករា ឆ្នាំ២០២៤នេះ ក្នុងភូមិសាស្រ្តរាធានីភ្នំពេញ និងខេត្តកណ្តាល។

ក្រសួង និងស្ថាប័នពាក់ព័ន្ធចំនួន១០ ចេញសេចក្តីប្រកាសរួមគ្នាដោយដាក់ឱ្យដំណើរការមុខងារចំនួន៥ សម្រាប់ចុះបញ្ជី និងកែប្រែព័ត៌មានក្រុមហ៊ុន និងសហគ្រាសលើប្រព័ន្ធចុះបញ្ជីអាជីវកម្ម តាមរយៈថ្នាលបច្ចេកវិទ្យាព័ត៌មាន (Single​ Portal) ចាប់ពីថ្ងៃទី១៥ ខែមករា ឆ្នាំ២០២៤ នេះតទៅ។

អង្គភាពអ្នកនាំពាក្យរាជរដ្ឋាភិបាល ប្រកាសលទ្ធផលពីដំណោះស្រាយទាក់ទងនឹងតម្លៃសេវាប្រើប្រាស់ផ្លូវចូល-ចេញអាកាសយានដ្ឋានអន្តរជាតិសៀមរាប-អង្គរ និងតម្លៃចំណតយានយន្តសាជាថ្មី ដោយភាគីក្រុមហ៊ុនសម្រេចបញ្ចុះតម្លៃចាប់ពី៣៣%ដល់ ៥០% ចាប់ពីឆ្នាំ២០២៤ ដល់ឆ្នាំ២០២៥។

ក្រសួងពាណិជ្ជកម្ម និងក្រសួងកសិកម្ម បានចេញសេចក្តីប្រកាសរួមចាត់វិធានការហាមឃាត់ការនាំចូលជាបណ្តោះអាសន្ននូវគ្រឿងក្នុង និងបំណែកសាច់បង្កក តាមសេចក្តីសម្រេចរបស់សម្តេចធិបតីនាយករដ្ឋមន្ត្រី ហ៊ុន ម៉ាណែត ដែលចុះថ្ងៃទី០៩ ខែមករា ឆ្នាំ២០២៤។ ការប្រកាសរួមរបស់ក្រសួងទាំងពីរនេះ គឺដាក់បម្រាមការនាំចូលជាបណ្តោះអាសន្ន ក្នុងរយៈពេល៦ខែ ដោយចាបផ្តើមពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤។

ដ្ឋ រកចំណូលបានពីវិស័យព្រៃឈើប្រមាណ៩២ម៉ឺនដុល្លារ ក្នុងរយៈពេល១២ខែ ឆ្នាំ២០២៣។ ចំណូលទាំងនោះបានមកពីការងារព្រៃឈើ, ការងារអភិរក្សសត្វព្រៃ, កសិដ្ឋានចិញ្ចឹមបង្កាត់ពូជស្វាក្តាម និងការសង្រ្គោះសត្វព្រៃ, ការងារដាំដើមឈើ,ការងារនីតិកម្ម និងវិវាទ, ការងារឧស្សាហកម្មនិងពាណិជ្ជកម្ម។ នេះបើតាមរបាយការណ៍ស្តីពី«សភាពការណ៍កសិកម្មរុក្ខាប្រមាញ់ និងនេសាទ ប្រចាំឆ្នាំ២០២៣»។

ថ្លែងក្នុងកម្មវិធីសម្ពោធស្ពានកោះយ៉និងសំណេះសំណាលជាមួយកម្មករ និយោជិតជាង១ម៉ឺននាក់ ក្នុងខេត្តកោះកុងកាលពីថ្ងៃទី៨ខែមករា ឆ្នាំ២០២៤ សម្ដេចធិបតី ហ៊ុន ម៉ាណែត ថា ក្នុងរយៈពេល ៣ខែកន្លងមកនេះរាជរដ្ឋាភិបាល បានចំណាយថវិកាជិត ៥លានដុល្លារ ឧបត្ថម្ភដល់កម្មការិនីមានផ្ទៃពោះ។