ចំណេះដឹង និង ព័ត៌មាន

គណៈកម្មការគ្រប់គ្រងល្បែងពាណិជ្ជកម្មកម្ពុជា(គ.ល.ក.) ឱ្យប្រតិបត្តិករល្បែងពាណិជ្ជកម្ម និងអ្នកផលិតមាតិកាដែលទាក់ទងនឹងល្បែងស៊ីសងខុសច្បាប់តាមអនឡាញទាំងអស់បញ្ឈប់សកម្មភាពផ្សព្វផ្សាយ រហូតដល់តែមានការជូនដំណឹងជាថ្មី។ ការហាមប្រាមនេះក្រោយពីឃើញមានសកម្មភាពផ្សព្វផ្សាយដែលមានខ្លឹមសារអូសទាញពលរដ្ឋ ឱ្យចូលលេងល្បែងដែលផ្ទុយនឹងច្បាប់និងបង្កឱ្យមានផលប៉ពាល់ធ្ងន់ធ្ងរដល់សន្តិសុខ សណ្ឋាប់ធ្នាប់និងរបៀបរៀបរយសង្គម។

ការកំណត់ប្រាក់ឈ្នួលកម្មករលើវិស័យកាត់ដេរសម្រាប់ឆ្នាំ២០២៤នៅ​តែមិនទាន់មានចំណុចរួមគ្នារវាងភាគីសហជីព និងភាគីថៅកែរោងចក្រឡើយគិតត្រឹមការប្រជុំលើកទី៥ នាថ្ងៃទី១៨ ខែកញ្ញា ឆ្នាំ២០២៣នេះ។ ភាគីថៅកែរោងច្រកដំឡើង០.៥ដុល្លារ លើការចរចាលើកទី៣ចំនួន២០១ដុល្លារ ពោលគឺ កើនបាន ២០១.៥ដុល្លារ, ភាគីរាជរដ្ឋាភិបាលទើបបញ្ចេញតួលេខរបស់ខ្លួនគឺ ២០២ដុល្លារ។ ចំណែក ភាគីសហជីពតំណាងកម្មករបានស្នើតួលខ២ផ្សេងទៀត គឺទី១ តួលេខ ២០៤ដុល្លារ និងទី២ តួលេខ ២១៣ដុល្លារ ​​ខណៈកាលពីការចរចាលើកទី៣ សហជីពបានស្នើ ២១៥ដុល្លារ។

ធនាគារជាតិនៃកម្ពុជា នឹងបន្តគ្រប់គ្រងសម្ពាធលើអត្រាប្តូរប្រាក់បន្ថែមទៀតដើម្បីជួយដល់ការពង្រឹងអំណាចទិញរបស់ប្រាក់រៀល ក្រោយពីឃើញប្រសិទ្ធិភាពនៃការដាក់ឱ្យដេញថ្លៃលក់ប្រាក់ដុល្លារអាមេរិកចំនួន ៤លើកកាលពីពេលថ្មីៗនេះ ដែលធ្វើឱ្យអត្រាប្តូរប្រាក់រៀលធៀបនឹងដុល្លារអាមេរិកបានធ្លាក់មកដល់កម្រិតសមស្របតាមស្ថានភាពទីផ្សារ។ 

ជលផលរបស់កម្ពុជា កំពឹសទឹកសាប និង អន្ទង់បាននាំចេញទៅទីផ្សារប្រទេសចិន ជាលើកដំបូងចំនួន១០តោន កាលពីថ្ងៃទី១៤ កញ្ញា ឆ្នាំ២០២៣។ការនាំចេញជលផលធម្មជាតិរបស់ប្រជានេសាទខ្មែរនាពេលនេះ បានជួយបង្កើនជីវភាពរបស់ពួកគេនិងវិស័យវារីវប្បករកាន់តែរីកចម្រើនមួយកម្រិតទៀត។

គណៈកម្មាធិការសេដ្ឋកិច្ចនិងធុរកិច្ចឌីជីថល (គ.ស.ធ.ឌ.) ប្រកាសបើកឱ្យចូលវគ្គបណ្តុះបណ្តុះបណ្តាលស្តីពី«ការធ្វើទីផ្សារបែបឌីជីថលសម្រាប់សហគ្រាសនៅកម្ពុជា»ដោយឥគគិតថ្លៃ រយៈពេល៧សប្តាហ៍ ដោយរៀនតាមអនឡាញនិងនៅក្នុងថ្នាក់ផ្ទាល់។វគ្គបណ្តុះបណ្តាលនេះ រៀបឡើងដើម្បីពង្រឹងសមត្ថភាព និងជំនាញធ្វើទីផ្សារឌីជីថលទៅកាន់ម្ចាស់អាជីវកម្ម ឬ សហគ្រាសធុនតូច និង មធ្យមនៅកម្ពុជា។

ពន្ធដារ​ ប្រមូលចំណូលពន្ធអាករ បានចំនួន១០ ៣២៩,៧៨ ប៊ីលានរៀល ប្រមាណ ២.៥ពាន់លានដុល្លារ ក្នុងរយៈពេល៨ខែ ឆ្នាំ២០២៣ ដែលចំណូលពន្ធនេះស្មើនឹងជាង៧១% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។នេះបើតាមការបង្ហាញរបស់ឯកឧត្តម គង់ វិបុល អគ្គនាយកនៃអគ្គនាយកកដ្ឋានពន្ធដារ នៅថ្ងៃទី១៤ខែកញ្ញានេះ ដោយបានបញ្ជាក់ថា ការប្រមូលបំណុលពន្ធរយៈពេល៨ខែនោះ ធ្លាក់ចុះ ២២,៦៧% ធៀបនឹងរយៈពេលដូចគ្នាក្នុងឆ្នាំ២០២២។

ក្រុមហ៊ុនចំនួន០៦ ត្រូវបានគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) សម្រេចចេញវិញ្ញាបនបត្រចុះបញ្ជីគម្រោងវិនិយោគ ដល់ក្រុមហ៊ុនចំនួន 0៦តាមសំណើរបស់ក្រុមហ៊ុនទាំងនោះ ដែលមានទំហំទឹកប្រាក់វិនិយោគជិត ៣៥លានដុល្លារនឹងអាចបង្កើតការងារបានប្រមាណ ៧,៥៨៤ កន្លែងក្នុងទីតាំងភូមិសាស្រ្តចំនួន០៣។

កម្លាំងប៉ុស្តិ៍នគរបាលវាលវង់ នៃអធិការដ្ឋាននគរបាលខណ្ឌ៧​ មករាបានកោះហៅសិស្សស្រី ០១ក្រុម មកសាកសួរបន្ទាប់ពីទទួលបានព័ត៌មានបង្ហោះតាមបណ្តាញសង្គម នៅយប់ថ្ងៃទី១៣ ខែកញ្ញា ឆ្នាំ២០២៣ ចំពោះករណីសិស្សស្រី ០១ក្រុម រងការចោទប្រកាន់ថាជាជើងកាងដែលបានវាយទៅកាន់សិស្ស ០១ក្រុមទៀត និងគំរាមវាយបើហ៊ានចូលរៀននៅក្នុងវិទ្យាល័យបាក់ទូក ខណ្ឌ៧មករា រាជធានីភ្នំពេញ។

កម្មវិធីពានរង្វាន់ប្រកួតប្រជែងស្តីពី«ការអប់រំចំណេះដឹងហិរញ្ញវត្ថុ»ប្រចាំឆ្នាំ(FECA) រដូវកាលទី៣ ក្រោមប្រធាន«ស្វែងយល់ពីបច្ចេកវិទ្យាហិរញ្ញវត្ថុ» តាមរយៈការផលិតមាតិកាវីដេអូខ្លីបានស្វែងយកម្ចាស់ជ័យលាភីចំនួន៣ក្រុម ក្នុងចំណោមបេក្ខជនចំនួន៣៨ក្រុម ដែលបានដាក់ពាក្យចូលរួមប្រកួត។គោលគំនិតនៃប្រធានបទឆ្នាំ២០២៣នេះ ផ្តោតលើបច្ចេកវិទ្យាហិរញ្ញវត្ថុ ដែលនាំឱ្យយុវជនស្វែងយល់គិតគូ និងនាំគ្នាផលិតមាតិកាបែបនេះ ដើម្បីដើម្បីឱ្យប្រជាពលរដ្ឋ ជាពិសេសយុវជនចាប់អារម្មណ៍ និងទទួលបានចំណេះដឹងទាក់ទងនឹងបច្ចេកវិទ្យាហិរញ្ញវត្ថុ​ដែលនាំឱ្យពួកគាត់មិនងាយក្នុងការចាញ់ការបោកបញ្ចោតណាមួយ ដែលនាំឱ្យខាតបង់ប្រាក់។

នាយករដ្ឋមន្ត្រីកម្ពុជា សម្តេចធិបតីហ៊ុន ម៉ាណែត បានចេញសេចក្តីសម្រេច ដោយផ្អាកការផ្តល់សេវារដ្ឋបាលមួយចំនួនរបស់រដ្ឋបាលក្រុង ស្រុក ខណ្ឌ ពាក់ព័ន្ធនឹងការបំពេញបែបបទធ្វើអាជីវកម្មដើម្បីសម្រាលបន្ទុកចំណាយរបស់អាជីវកម្មតូចតាចទាំងនោះដែលស្ថិតនៅក្នុងសេដ្ឋកិច្ចក្រៅប្រព័ន្ធ។