ចំណេះដឹង និង ព័ត៌មាន

រដ្ឋាលខេត្តសៀមរាប នឹងរៀបចំពិព័រណ៌ផលិតផលក្នុងស្រុក«ភូមិមួយផលិតផលមួយ»ក្នុងទីតាំងបរិវេណសួនព្រះរាជដំណាក់ ចាប់ពីថ្ងៃទី២៦-៣០ កញ្ញាខាងមុខ ក្នុងឱកាសប្រារព្វទិវាពិភពលោកស្អាតលើកទី៦និងទិវាទេសចរណ៌ពិភពលោកឆ្នាំ២០២៣។

ក្រសួងសុខាភិបាលបានសហការជាមួយអាជ្ញាធរពាក់ព័ន្ធ ចុះបិទទីតាំងអគារលក់ឱសថបុរាណរបស់លោក ស៊ូ សេងហ៊ួនិងណែនាំឲ្យលោកលុបវីដេអូផ្សព្វផ្សាយការព្យបាលជំងឺប្រាស់ចាកពីការពិតទាំងអស់ចេញពីបណ្តាញសង្គមជាបន្ទាន់បន្ទាប់ពីរូបលោកនៅតែបន្តសកម្មភាពផ្សព្វផ្សាយតាមបណ្តាញសង្គមហ្វេកបុកនូវកាព្យាបាលជំងឺមិនប្រក្រតីនិងលក់ឱសថបុរាណដោយគ្មានច្បាប់អនុញ្ញាតពីក្រសួងសុខាភិបាល។

ក្រសួងសុខាភិបាលបានសម្រេចលុបបញ្ជិកាផលិតផលបំប៉នសុខភាពឈ្មោះ Ginseng Pro., B/ Bott./ 30Caps មានលេខបញ្ជិកា CAM N0019IH-23 និង Ginseng Pro., B/ Bott./ 60 Caps មានលេខាបញ្ជិកា CAM N0001IH-23 ដោយផ្អែកតាមការវិភាគគុណភាពចុះថ្ងៃទី២២ ខែសីហា ឆ្នាំ២០២៣របស់មជ្ឈមណ្ឌលជាតិពិសោធន៍សុខាភិបាល ដែលបានបញ្ជាក់ថាផលិតផលបំប៉នសុខភាពទាំងពីរប្រភេទនេះ មានផ្ទុកសារធាតុ Dexamethasone និង Prednisolone ដែលអាចបង្កឲ្យមានផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់។

ធនាគារអភិវឌ្ឍន៍អាស៊ី (ADB) ទម្លាក់ការព្យាករណ៍សម្រាប់ឆ្នាំ២០២៣នេះ ពី៥,៥% មក៥,៣% វិញ ដោយសារតែកំណើនវិស័យឧស្សាហកម្មធ្លាក់ចុះជាងការទំពឹកទុកក្នុងឆ្នាំទីមួយប៉ុន្តែ នៅឆ្នាំ២០២៤ខាងមុខ ADB បានព្យាករណ៍ពីកំណើនសេដ្ឋកិកិច្ចរបស់កម្ពុជាមាន ៦% ។ នេះបើតាមសេចក្តីប្រកាសព័ត៌មានរបស់ ADB នៅថ្ងៃទី២១ខែកញ្ញា ឆ្នាំ២០២៣នេះ។

កម្ពុជានិងអូស្ត្រាលី បានដាក់ឲ្យដំណើរការភាពជាដៃគូថ្មីលើវិស័យកែច្នៃចំណីអាហារនៅកម្ពុជាដើម្បីគាំទ្រដល់សហគ្រាសធុនតូច និងមធ្យម ឲ្យអភិវឌ្ឍនូវផលិតផលថ្មីៗទទួលបានស្តង់ដារសុវត្ថិភាពចំណីអាហារ និងពង្រីកទីផ្សាររបស់ម្ចាស់សហគ្រាស។ នេះបើតាមសេចក្តីប្រកាសព័ត៌មានរួមគ្នារបស់ក្រសួងសេដ្ឋកិច្ចនិងហិរញ្ញវត្ថុ សហគ្រិនខ្មែរ និង Australian Embassy Cambodia នាថ្ងៃទី២២ ខែកញ្ញា ឆ្នាំ២០២៣នេះ។

នាថ្ងៃទី១៨ ខែកញ្ញា ឆ្នាំ២០២៣ក្រុមហ៊ុនអេមរុរ៉ាយស៍ បានចុះហត្ថលេខាលើកិច្ចសន្យាទិញស្រូវដែលរំពឹងទុកជាទិន្នផលមានចំនួន ១៦០០០តោន គិតជាទឹកប្រាក់ប្រមាណ ៤,៣០០,០០០ដុល្លារ ពីសហគមន៍កសិកម្មចំនួន ៨សហគមន៍និងក្រុមផលិតស្រូវចំនួន ៤៧ក្រុមហ៊ុន នៅខេត្តបាត់ដំបង និងខេត្តបន្ទាយមានជ័យ។ការចុះកិច្ចសន្យានេះ ដើម្បីបង្កើនការលើកកម្ពស់ជីវភាពរបស់ប្រជាកសិករនិងរួមចំណែកអភិវឌ្ឍជាតិស្របតាមគោលនយោបាយរបស់រដ្ឋាភិបាលលើកិច្ចសន្យាកសិកម្ម។

លក្ខខណ្ឌតម្រូវ«ភូតគាមអនាម័យ»សម្រាប់ការនាំចេញផ្លែដូងស្រស់ពីកម្ពុជាទៅកាន់ប្រទេសចិន​ត្រូវបានក្រសួងកសិកម្ម និងអគ្គរដ្ឋបាលគយយចិន ចុះហត្ថលេខាព្រមព្រៀងនៅថ្ងៃទី១៥ ខែកញ្ញាឆ្នាំ២០២៣នេះ។ នាពេលនេះ ក្រសួងកសិកម្មកំពុងធ្វើកិច្ចការងារជាមួយនឹងម្ចាស់ចម្ការដូងសហគមន៍កសិកម្មដូងក្រអូប និងម្ចាស់កែច្នៃនិងវេចខ្ចប់ផ្លែដូងស្រស់ឱ្យស្រប់នឹងស្តង់ដារកំណត់របស់ចិន។

ឯកឧត្តមឧបកនាយរដ្ឋមន្ត្រី ស សុខាបញ្ជាឱ្យផ្អាកសកម្មភាព ស្រាវជ្រាវ ស៊ើបអង្កេត និងបង្ក្រាបផលិតផលក្លែងក្លាយដែលស្ថិតក្នុងសមត្ថកិច្ចរបស់ក្រសួងមហាផ្ទៃ និងឱ្យបើកការស៊ើបអង្កេតលើមន្ត្រីប្រយុទ្ធប្រឆាំងផលិតផលក្លែងក្លាយដែលទទួលពាក្យបណ្ដឹងពីពលរដ្ឋ។

ក្រសួងរ៉ែ និងថាមពល ដាក់ដំណោះស្រាយភ្លាមៗដល់ម្ចាស់អាជីវកម្មនៅក្នុងផែ្នកឧហ្សាហកម្មនិងកសិកម្ម តាមការស្នើសុំរបស់សម្តេចធិបតីនាយករដ្ឋមន្ត្រី ហ៊ុន ម៉ាណែតនាឱកាសជួបជាមួយនឹងកម្មកររោងចក្រជិត២ម៉ឺននាក់ ខេត្តតាកែវ កាលពីថ្ងៃទី១៩ កញ្ញាម្សិលមិញ។ក្រសួងរ៉ែ និងថាមពល និងអគ្គិសនីកម្ពុជា បានឆ្លើយតបដោយសម្រេចបញ្ចុះតម្លៃពី១០% ទៅ ២០% ប៉ុត្តែស្ថិននៅក្នុងលក្ខខណ្ឌដែលមានភ្ជាប់។

គណៈកម្មាធិការតំបន់សេដ្ឋកិច្ចពិសេសកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តឱ្យក្រុមហ៊ុនចំនួន៨ក្នុងទំហំទឹកប្រាក់សរុបចំនួន ៦៤.៣លានដុល្លារ និងអាចបង្កើតការងារប្រមាណ៤ពាន់នាក់។នេះបើតាមការចុះផ្សាយរបស់ CDC នៅថ្ងៃទី២០ កញ្ញានេះ ដោយបញ្ជាក់ថាក្រុមហ៊ុនទាំង៨ គ្រោងបង្កើតរោងចក្រនៅក្នុងបំបន់សេដ្ឋកិច្ចពិសេសនៅក្នុងខេត្តព្រះស៊ីហនុ និងខេត្តស្វាយរៀង។