ចំណេះដឹង និង ព័ត៌មាន

សម្តេច ហ៊ុន សែន នាយករដ្ឋមន្ត្រីជិតផុតអាណត្តិបានស្នើឱ្យក្បាលម៉ាស៊ីនរាជរដ្ឋាភិបាលថ្មីនាអាណត្តិទី៧ ដែលមានឯកឧត្តមកិត្តិទេសាភិបាលបណ្ឌិតហ៊ុន ម៉ាណែត ជានាយករដ្ឋមន្ត្រី ត្រូវយកចិត្តទុក្ខដាក់ចុះជួបប្រជាពលរដ្ឋឱ្យបានច្រើនដើម្បីដឹងពីសុខទុក្ខរបស់ពលរដ្ឋ។ ទន្ទឹមនឹងនេះ គឺត្រូវយកចិត្តទុកដាក់ដោះស្រាយលើបញ្ហាសន្តិសុខ សណ្ដាប់ធ្នាប់ ជាពិសេសបង្កើននូវកំណើនសេដ្ឋកិច្ច និងការអភិវឌ្ឍលើគ្រប់វិស័យ។

ការបង់ពន្ធលើអចលនទ្រព្យ ឬពន្ធលើដីធ្លីមិនបានប្រើប្រាស់សម្រាប់ឆ្នាំ២០២៣ នឹងត្រូវផុតកំណត់នៅថ្ងៃទី៣០ ខែកញ្ញាខាងមុខនេះ។ ចំពោះការមិនបានបង់ទាន់ពេលកំណត់ ម្ចាស់អចលនទ្រព្យ នឹងត្រូវរងនូវទណ្ឌកម្មរដ្ឋបាលតាមច្បាប់ស្តីពីសារពើពន្ធជាធរមាន។ នេះបើតាមសេចក្តីជូនដំណឹងរបស់អគ្គនាយកដ្ឋានពន្ធនៅថ្ងៃទី១១ ខែសីហានេះ។

ក្រសួងពាណិជ្ជកម្មបានបញ្ជាក់ពីតម្លៃលក់រាយប្រេងឥន្ធនៈ នៅតាមបណ្ដាស្ថានីយនានាក្នុងប្រទេសកម្ពុជាចាប់ពីថ្ងៃទី១១-២០ ខែសីហា ឆ្នាំ២០២៣។ បើតាមសេចក្តីជូនដំណឹងរបស់ក្រសួងពាណិជ្ជកម្មអំពីការកំណត់តម្លៃប្រេងឥន្ធនៈថ្មីនេះគឺប្រេងសាំងធម្មតានៅថេរ ដែលមានតម្លៃ៤,៥៥០រៀលក្នុងមួយលីត្រខណៈប្រេងម៉ាស៊ូតឡើង២៥០រៀល ដែលមានតម្លៃ ៤,៧០០រៀលក្នុងមួយលីត្រ។

កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះនិងកុមារអាយក្រោម២ឆ្នាំ ដែលបានដំឡើងកម្រិត និងផ្តល់ការឧបត្ថម្ភបន្ថែមត្រូវបានចាប់ផ្តើមអនុវត្តពីថ្ងៃទី០១ ខែសីហា ឆ្នាំ២០២៣តទៅ។ការផ្តល់ជូនេះគឺចំពោះស្រ្តី នៃគ្រួសារដែលមានបណ្ណសមធម៌, កម្មករនិយោជិតជាស្រ្តី ដែលជាសមាជិក ប.ស.ស និងមន្ត្រីរាជការមន្ត្រីកម្មសិក្សា និងមន្ត្រីជាប់កិច្ចសន្យា ក្នុងអំឡុងពេលមានផ្ទៃពោះ, ពេលសម្រាល និងក្រោយពេលសម្រាល រហូដល់កូនមានអាយុ ២ឆ្នាំ។

មន្ត្រីនៃក្រសួងសាធារណការ និងដឹកជញ្ជូនសិក្សាស្វែងយល់ពីការប្រើប្រាស់បច្ចេកវិទ្យាចុងក្រោយលើការគ្រប់គ្រងគម្រោងឱ្យមានប្រសិទ្ធភាពគុណភាព និងសន្សំសំចៃថវិកា ពីកម្មវិធី« Trimble Days in Asia 2023» នៅក្រុងបាងកក​ ប្រទេសថៃ រយៈពេល២ថ្ងៃ។

រដ្ឋបាលគយ នៃប្រទេសចិន បានអនុញ្ញាតឲ្យកម្ពុជានាំចេញជលផលចំនួន ៤មុខ រួមមាន បង្កងប៉ាក អន្ទង់ ត្រីដំរី និងខ្យង ចូលទៅទីផ្សារចិន ដោយផ្អែកតាមពាណិជ្ជកម្មប្រពៃណីដែលមានស្រាប់រវាងចិននិងកម្ពុជា ខណៈពេលដែលជលផលកម្ពុជា បានបញ្ចប់នីតិវិធីក្នុងការនាំចេញទៅកាន់ប្រទេសចិនរួចរាល់ហើយ។

រដ្ឋមន្ត្រីក្រសួងកសិកម្ម ឯកឧត្តម ឌិតទីណា បានពិភក្សាការងារជាមួយនឹងពាណិជ្ជករចិនរបស់ក្រុមហ៊ុន Danong Development Group លើការងារវិនិយោគកសិ-ឧស្សាហកម្ម នៅកម្ពុជានៅទីស្តីការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី០៨ ខែសីហា ឆ្នាំ២០២៣នេះ។

កម្មវិធីគាំទ្រសហគ្រាសជលផលខ្នាតតូចនិងមធ្យម (VCIS) ប្រកាសផ្តល់ការគាំទ្រផ្នែកសម្ភារបរិក្ខារនិងផ្នែកបច្ចេកទេស ក្រោមកញ្ចប់វិនិយោគចំនួន២ ដែលមានថិវកា៣ម៉ឺនដុល្លារ និង១០ម៉ឺនដុល្លារ។សម្រាប់សហគ្រាសជលផលក្រោយប្រមូលផល ឬតួអង្គពាក់ពន្ធ័ក្នុងខ្សែច្រវ៉ាក់តម្លៃជលផល ក្រោយប្រមូលផលអាចដាក់ពាក្យស្នើសុំជំនួយថវិកាវិនិយោគពីកម្មវិធីគាំទ្រសហគ្រាសជលផលខ្នាតតូចនិងមធ្យម (VCIS) សម្រាប់ជុំទី២ ចាប់ពីថ្ងៃនេះរហូតដល់ថ្ងៃទី៣១ ខែសីហា ឆ្នាំ២០២៣នេះបាន។

រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ស្នុំសុំឱ្យមូលនិធិរូបិយវត្ថុអន្តរជាតិ ជួយពិនិត្យឡើងវិញលើក្របខណ្ឌ និងយន្តការនៃការគ្រប់គ្រងបំណុលសាធារណៈប្រកបដោយនិរន្ដរភាព និងគាំទ្រជំនួយបច្ចេកទេសនិងការបណ្ដុះបណ្តាលបន្ថែមដល់មន្ត្រីជំនាញរបស់ក្រសួង។ ការស្នើសុំនេះធ្វើឡើងក្នុងជំនួបជាមួយលោកYasuhisa Ojima ប្រធានស្ថានតំណាងមូលនិធិរូបិយវត្ថុអន្តរជាតិប្រចាំកម្ពុជា កាលពីថ្ងៃទី០៩ ខែសីហានេះ។

សម្តេច ម៉ែន សំអន បានបង្ហាញសង្ឃឹមចំពោះអ្នកវិនិយោគចិនថានឹងទទួលបានសក្តានុពល និងអាចរកដៃគូក្នុងស្រុក ដើម្បីវិនិយោគក្នុងវិស័យជាច្រើនជាពិសេស វិស័យដែលមាននៅក្នុងគម្រោង«ការផ្តួចផ្តើមខ្សែក្រវាត់ និង វិថី» ដែលអាចហុចឱកាសដ៏ល្អសម្រាប់អនាគត។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា(AKP)។