ចំណេះដឹង និង ព័ត៌មាន

គយកម្ពុជា ចូលរួមក្នុងកម្មវិធីសប្តាហ៍គយកូរ៉េឆ្នាំ២០២៣ ស្តីពី«កិច្ចសហប្រតិបត្តិការគយ និងឌីជីថលគយជាសាកល» ជាមួយនឹងប្រតិភូគយនៃប្រទេសចំនួន ៧៥ រួមទាំងអង្គការអន្តរជាតិ និងវិស័យកជនទទាក់ទងនឹងផ្នែកគយផងដែរ នៅទីក្រុងសេអ៊ូល ប្រទេសកូរ៉េ កាលពីចុងខែមេសាកន្លេងទៅ។

គយកម្ពុជា និងគយកូរ៉េ បានប្រជុំទ្វេភាគីនិងចុះហត្ថលេខាលើអនុស្សរណៈយោគយល់គ្នាដើម្បីពង្រឹងកិច្ចសហប្រតិបត្តិការនិងជួយគ្នាទៅវិញទៅមក ពាក់ព័ន្ធនឹងការងារគយ កាលពីចុងខែមេសាកន្លងទៅ។ គយនៃប្រទេសទាំង បានបន្តពង្រឹងកិច្ចសហប្រតិបត្តិការរវាងរដ្ឋបាលគយទាំងពីរ ទាំងក្នុងកម្រិតទ្វេភាគី តំបន់ និងពហុភាគី។

ក្រសួងពាណិជ្ជកម្មនឹងបន្តរៀបចំពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា លើកទី១៦ កម្រិតអន្តរជាតិ នាថ្ងៃទី១៥-១៨ ខែធ្នូ ឆ្នាំ២០២៣ខាងមុខ នៅមជ្ឈមណ្ឌលតាំងពិព័រណ៍និងសន្និបាតកោះពេជ្រ រាជធានីភ្នំពេញ។ ពិព័រណ៍នេះមានគោលបំណងជំរុញសកម្មភាពពាណិជ្ជកម្ម និងវិនិយោគនៅកម្ពុជាជាពិសេសជំរុញការនាំចេញផលិតផល និងសេវាឲ្យដល់ទីផ្សារគោលដៅ ដែលជាផ្នែកមួយជំរុញកំណើនសេដ្ឋកិច្ចជាតិព្រមទាំងផ្តល់នូវកាលានុវត្តភាពថ្មីក្នុងការតភ្ជាប់ទំនាក់ទំនងពាណិជ្ជកម្មក្នុងស្រុករវាងរាជធានី-ខេត្តទូទាំងកម្ពុជានិងរវាងកម្ពុជាជាមួយអន្តរជាតិ។

ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចឱ្យក្រុមហ៊ុនចំនួន២ទៀត បោះទុនវិនិយោគប្រមាណ ១០លានដុល្លារ ដើម្បីបង្កើតរោងចក្រកាត់ដេរ នៅរាធានីភ្នំពេញ និងខេត្តកំពង់ស្ពឺ។ ការអនុញ្ញាតតាមសំណើសុំវិនិយោគរបស់ក្រុមហ៊ុនទាំង២នេះ គឺធ្វើឡើងតាមរយៈគណៈកម្មាធិការវិនិយោគកម្ពុជា របស់ CDC ។

ក្នុងត្រីមាសទី១ ឆ្នាំ២០២៣ កម្ពុជានិងតួកគី សម្រេចបានទំហំពាណិជ្ជកម្មទ្វេភាគីប្រមាណ ៥២លានដុល្លារ ជាមួយនឹងកំណើន ៨០% បើធៀបនឹងរយៈពេលដូចគ្នាក្នុងឆ្នាំ២០២២។ ទំនិញសក្តានុពលនាំចេញពីកម្ពុជាទៅតួកគី រួមមាន៖ សម្លៀកបំពាក់ កង់ ស្វាយ មៀនកៅស៊ូ ដំឡូងមី ពោត ម្រេច អង្ករ គីមីសរីរាង្គ និងថ្នាំជក់។ ចំណែកទំនិញសក្តានុពលនាំចូលពីតួកគីមកកម្ពុជាវិញ រួមមាន៖ វាយនភ័ណ្ឌនិងសម្លៀកបំពាក់គ្រឿងម៉ាស៊ីននិងបរិធានអគ្គិសនី យានយន្តនិងគ្រឿងបន្លាស់និងវត្ថុផ្សេងៗធ្វើពីស្ពាន់។

ក្រសួងសេដ្ឋកិច្ច និងហិរញ្ញវត្ថុ បានសម្រេចដាក់ឲ្យអនុវត្តនូវ«កម្មវិធីប្រតិបត្តិករសេដ្ឋកិច្ចបានទទួលការអនុញ្ញាត» ចាប់ពីថ្ងៃទី០១ ខែឧសភា ឆ្នាំ២០២៣ តទៅ ដើម្បីចូលរួមអនុវត្តនូវកាតព្វកិច្ចរបស់កម្ពុជា ក្នុងក្របខ័ណ្ឌព្រមព្រៀងរបស់អង្គការពាណិជ្ជកម្មពិភពលោក។ កិច្ចព្រមព្រៀងនោះ គឺសម្រួលពាណិជ្ជកម្ម និងដើម្បីលើកទឹកចិត្តដល់ធុរជនមានអនុលោមខ្ពស់ស្របតាមគោលនយោបាយពាណិជ្ជកម្មអន្តរជាតិ រដ្ឋាភិបាលកម្ពុជា ក៏ដូចជាឧត្តមានុវត្តអន្តរជាតិផងដែរ។

អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម និងក្រុមហ៊ុនភីធីធី (ខេមបូឌា) បានសហការគ្នាអនុវត្តគម្រោងជំរុញការលក់ផលិតផលខ្មែរ ក្រោមកម្មវិធីស្តីពី៖ «កិច្ចសហការជំរុញ និងបង្កើនការលក់ផលិតផលខ្មែរ» នៅស្ថានីយ៍ប្រេងឥន្ធនៈភីធីធី តាមបណ្តារាជធានី-ខេត្ត។ ការអនុវត្តគម្រោងនេះ ដើម្បីលើកកម្ពស់ផលិតផលខ្មែរដែលជាផលិតផលលក្ខណៈគ្រួសារតូចៗលើទីផ្សារក្នុងស្រុកការអភិវឌ្ឍវិស័យពាណិជ្ជកម្មកម្ពុជា នៅលើមូលដ្ឋាននៃតម្លាភាព និងផលប្រយោជន៍សហគមន៍។

ធនាគារអភិវឌ្ឍន៍អាស៊ី (ADB) បានប្រកាសកម្មវិធីថ្មីស្តីពី «ហិរញ្ញវត្ថុច្នៃប្រឌិតសម្រាប់អាកាសធាតុនៅអាស៊ីនិងប៉ាស៊ីហ្វិក» (IF-CAP) ដែលជាកម្មវិធីដ៏សំខាន់មួយ ដែលបង្កើនធនធានរាប់ពាន់លានដុល្លារ ដល់ហិរញ្ញប្បទានបម្រែបម្រួលអាកាសធាតុ និងអាចបង្កើនការគាំទ្រយ៉ាងទូលំទូលាយ សម្រាប់តំបន់ក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ ការប្រកាសនេះ ធ្វើឡើងដោយប្រធាន ADB លោក Masatsugu Asakawa ក្នុងថ្ងៃបើកកិច្ចប្រជុំប្រចាំឆ្នាំលើកទី៥៦របស់ ADB នៅទីក្រុង Incheon សាធារណរដ្ឋកូរ៉េកាលពីថ្ងៃទី០២ ខែឧសភា ឆ្នាំ២០២៣នេះ។

នាថ្ងៃទី៣ ខែឧសភា ឆ្នាំ២០២៣ ស្អែកនេះ ក្រសួងការបរទេស និងសហប្រតិបត្តិការអន្តរជាតិ នៃកម្ពុជានឹងរៀបចំកិច្ចប្រជុំពិគ្រោះយោបល់លើកទី៣ រវាងរដ្ឋាភិបាលកម្ពុជា (RGC) និងអង្គការមិនមែនរដ្ឋាភិបាលបរទេស (FNGOs) ក្រោមប្រធានបទ៖«ការពង្រឹងការអនុវត្តច្បាប់ស្តីពី គណនេយ្យ និងសវនកម្ម»នៅទីស្តីការក្រសួង។

សម្តេចនាយករដ្ឋមន្ត្រី ហ៊ុន សែន បានចុះពិនិត្យការសាងសង់ស្ថានីយ៍ប្រព្រឹត្តិកម្មទឹកកខ្វក់លើកទី៣​​ កាលពីថ្ងៃទី៣០ខែមេសាកន្លងទៅ។ ស្ថានីយ៍ប្រព្រឹត្តិកម្មនៅខេត្តព្រះសីហុននោះ ចាប់ផ្តើមសាងសង់តាំងពីអំឡុងខែកញ្ញាឆ្នាំ២០២១ ក្នុងទំហំទឹកប្រាក់ប្រមាណ២០លានដុល្លារ នឹងសាងសង់រួចរាល់ក្នុងអំឡុងខែមិថុនា ឆ្នាំ២០២៣នេះ។