ចំណេះដឹង និង ព័ត៌មាន

ក្រសួងទេសចរណ៍ បានឲ្យដឹងថាមានការីទេសចរណ៍ និងភ្នាក់ងារទេសចរណ៍ចំនួន៣បានមកដាក់ពាក្យស្នើសុំបិទអាជីវកម្មរបស់ខ្លួន។ ហេតុនេះ ក្រសួងទេសចរណ៍នឹងដំណើរការតាមនីតិវិធីក្នុងការអនុវត្តឲ្យបិទអាជីវកម្មការីទេសចរណ៍ និងភ្នាក់ងារទេសចរណ៍រយៈពេល១ខែទៀត ក្រោយពេលដែលម្ចាស់អាជ្ញាបណ្ណទេសចរណ៍បានចុះផ្សាយជាសាធារណៈស្តីពីការបិទអាជីវកម្មរបស់ខ្លួនតាមរយៈសារព័ត៌មាននានា។នេះបើតាមសេចក្តីជូនដំណឹងរបស់ក្រសួងទេសចរណ៍កាលពីថ្ងៃទី១៤ ខែមេសា ឆ្នាំ២០២៣នេះ។

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ (គ.ជ.ប.អ) នឹងផ្តល់ជូនសំបុត្រឥតគិតថ្លៃចំនួន ៣០០០សំបុត្រជូនដល់ប្រជាជនខ្មែរដែលរស់នៅក្រៅប្រទេសដើម្បីអាចចូលទស្សនានាពិធីបើកនិងបិទព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ដែលពិធីបើកប្រព្រឹត្តិទៅនាថ្ងៃទី៥ ខែឧសភា ឆ្នាំ២០២៣ និងពិធីបិទនឹងប្រព្រឹត្តិទៅនាថ្ងៃទី១៧ ខែឧសភា ឆ្នាំ២០២៣ ខាងមុខនេះ។

រដ្ឋាភិបាល បានបន្ថែមថវិកាចំនួន៧លានដុល្លារទៀត លើគម្រោងចំណាយចាស់ដែលមានថវិកាចំនួន ១២៤លានដុល្លារ ខណៈដែលព្រឹត្តិការណ៍ស៊ីហ្គេមដែលសល់តែរយៈពេល ១១ថ្ងៃទៀតតែប៉ុណ្ណោះ គិតត្រឹមថ្ងៃទី ២៤ខែមេសា ឆ្នាំ២០២៣នេះ។

ក្រុមប្រឹក្សាភិបាល នៃមជ្ឈមណ្ឌលពិព័រណ៍ពាណិជ្ជកម្ម Ptak Warsaw Expo នៃប្រទេសប៉ូឡូញ តាមរយៈក្រសួងការបរទេសនិងសហប្រតិបត្តិការអន្តរជាតិ បានអញ្ជើញកម្ពុជាឲ្យចូលរួមព្រឹត្តិការណ៍ពិព័រណ៍ចំនួន២ នាពេលខាងមុខ នៅសាធារណៈរដ្ឋប៉ូឡូញ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្មនៅថ្ងៃទី២១ ខែមេសា ឆ្នាំ២០២៣នេះ។

ក្រុមហ៊ុន ភីធីជី សហការជាមួយក្រុមហ៊ុន OCIC ដោយមានការគាំទ្រនិងសម្របសម្រួលពីក្រសួងពាណិជ្ជកម្ម នឹងរៀបចំព្រឹត្តិការណ៍«ផ្សារណាត់ផលិតផលគុណភាព» នាថ្ងៃទី៥-២១ខែឧសភា ឆ្នាំ២០២៣ (ចំនួន១៧ថ្ងៃ) នៅវិមានអាហារទីក្រុងរណបជ្រោយចង្វារ ផ្លូវ OCIC (ផ្លូវទៅកាន់ពហុកីឡដ្ឋានមរតកតេជោ) រាជធានីភ្នំពេញ។

និយ័តករបរធនបាលកិច្ច (ន.ប.ធ) បានផ្តល់អាជ្ញាបណ្ណដល់ធនាគារ អេស៊ា-ប៉ាស៊ីហ្វិក ឌីវេឡុបមេន ម.ក ជាប្រតិបត្តិការបរធនបាលផ្តល់សេវារក្សាសុវត្ថិភាពឬសេវារក្សាទុក (Escrow Services) ក្នុងវិស័យបរធនបាលកិច្ចសម្រាប់ប្រតិបត្តិការបរធនបាលកិច្ចពាណិជ្ជកម្ម និងបរធនបាលកិច្ចសង្គមដោយក្រុមហ៊ុននេះបានបំពេញតាមលក្ខខណ្ឌតម្រូវគ្រប់គ្រាន់តាមច្បាប់និងបទប្បញ្ញត្តិជាធរមាន។

ក្នុងវេទិកាវិស័យដឹកជញ្ជូននិងភស្តុភារកម្ម ឆ្នាំ២០២៣ កាលពីថ្ងៃទី២០ មេសា ឯកឧត្តមទេសរដ្ឋមន្ត្រី ស៊ុន ចាន់ថុល បានលើកឡើងថា ការអភិវឌ្ឍលើវិស័យហេដ្ឋារចនាសម្ព័ន្ធដឹកជញ្ជូននៅតែជាយុទ្ធសាស្រ្តចម្បងរបស់រាជរដ្ឋាភិបាលកម្ពុជា ក្នុងការលើកកម្ពស់សេដ្ឋកិច្ចជាតិ។ យុទ្ធសាស្រ្តនេះ រដ្ឋាភិបាល បានផ្តល់អាទិដល់ក្រសួងសាធារណការ​ និងដឹកជញ្ជូន ដោយស្វាស់ស្វែងរកជំនួយពីប្រទេសដៃគូ និងបានបញ្ចេញថវិការបស់រដ្ឋជាច្រើនសន្ទឹកសន្ទាប់ផងនោះ ដើម្បីកែលម្អ អភិវឌ្ឍន៍ និងពង្រីកវិសាលភាពនៃវិស័យសាធារណការនិងដឹកជញ្ជូននៅកម្ពុជា។

«ការកើនឡើងនៃសកលភាវូបនីយកម្ម និងការរីកចម្រើនផ្នែកបច្ចេកវិទ្យាបានធ្វើឱ្យកាន់តែងាយស្រួលក្នុងការផ្ទេរប្រាក់ឆ្លងកាត់ព្រំដែន ហើយបង្កើតឱកាសជាច្រើនសម្រាប់ឧក្រិដ្ឋជនក្នុងការសម្អាតប្រាក់និងធ្វើប្រតិបត្តិការខុសច្បាប់»។ នេះគឺជាការលើកឡើងលោក សែ សុឃន អគ្គនាយករង នៃអគ្គនាយកដ្ឋានគយនិងរដ្ឋាករកម្ពុជាអគរ និងជាប្រធានក្រុមការងារប្រឆាំងការសម្អាតប្រាក់និងហិរញ្ញប្បទានភេរវកម្មប្រចាំ អគរ ។

រដ្ឋមន្ត្រីសាធារណការ បានឱ្យដឹងថាគម្រោងផ្លូវល្បឿនលឿនភ្នំពេញ-បាវិត នឹងត្រូវបើកការដ្ឋានសាងសង់ នៅថ្ងៃទី៧ ខែមិថុនា ឆ្នាំ២០២៣ខាងមុខ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន។ គម្រោងដែលនឹងបើការដ្ឋានសាងសង់នេះ មានទំហំទឹកប្រាក់១៤០០លានដុល្លារ ហើយគ្រោងបញ្ចប់ការសាងសង់ក្នុងអំឡុងឆ្នាំ២០២៧។

ការប្រើប្រាស់រថយន្តអគ្គិសនីមានតម្លៃធូរថ្លៃជាងរថយន្តមួយទឹកមួយចំនួន ប្រើប្រាស់ដោយបានសន្សំសំចៃបានច្រើន និងបានរួមចំណែកថែរក្សាបរិស្ថានផងដែរ។ នាពេលថ្មីៗនេះ រាជរដ្ឋាភិបាល បានអនុញ្ញាតឱ្យក្រសួងសាធារណការនិងដឹកជញ្ជូន ដឹកនាំបង្កើតក្រុមការងារពិសេសន្តរក្រសួង ដើម្បីរៀបចំតាក់តែងសេចក្តីព្រាងច្បាប់ពាក់ព័ន្ធនឹងរថយន្តអគ្គិសនីដើម្បីជំរុញលើកទឹកចិត្តឱ្យពលរដ្ឋមានការប្រើប្រាស់កាន់តែទូលំទូលាយ។