ចំណេះដឹង និង ព័ត៌មាន

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន៦ បោះទុនប្រមាណ ៧៣,៩លានដុល្លារ ដើម្បីបង្កើតរោងចក្រនិងវិនិយោគដែលអាចបង្កើតការងារបានប្រមាណ ១៧២១កន្លែង។

ក្នុងត្រីមាសទី១ ឆ្នាំ២០២៣នេះ អគ្គនាយកដ្ឋានគយនិងរដ្ឋាករកម្ពុជា ប្រមូលចំណូលបានប្រមាណ ២ ៣០២,៩ ប៊ីលានរៀល (ប្រមាណ ៥៦៤,១លានដុល្លារ) ថយចុះប្រមាណ ៥,២% ធៀបនឹងចំណូលប្រមូលបានក្នុងត្រីមាសទី១ ឆ្នាំ២០២២។ លទ្ធផលនេះ សម្រេចបាន ២០,៥%នៃផែនការដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។

ក្រសួងសាធារណការ ចុះកិច្ចព្រមព្រៀងសេវាទីប្រឹក្សាហិរញ្ញវត្ថុជាមួយសាជីវកម្មហិរញ្ញវត្ថុអន្តរជាតិ​ក្នុងការសិក្សាសមិទ្ធិលទ្ធភាព គម្រោងមជ្ឈមណ្ឌលភ័ស្តុភារកម្មក្រុងព្រះសីហនុ នៅថ្ងៃទី១៩ខែមេសា ឆ្នាំ២០២៣នេះ។

លោកជំទាវបណ្ឌិត ជា សិរី ទេសាភិបាលរង ធនាគារជាតិនៃកម្ពុជាបានចុះហត្ថលេខាលើអនុស្សរណៈយោគយល់ (MOU) ជាមួយស្ថាប័ន​ NPCI International Payments Limited (NIPL) ស្តីពីកិច្ចសហប្រតិបត្តិការលើការទូទាត់ និងការផ្ទេរប្រាក់ឆ្លងដែនរវាងប្រទេសកម្ពុជា និងប្រទេសឥណ្ឌា ដើម្បីជំរុញកិច្ចសហប្រតិបត្តិការលើការទូទាត់និងការផ្ទេរប្រាក់ឆ្លងដែនជាមួយគ្នា។

ក្នុងឆ្នាំ២០២២ ទំហំពាណិជ្ជកម្មអន្តរជាតិកម្ពុជាមាន ២២៧.១៩៥ ប៊ីលានរៀល (៥៥.១៨៥ លានដុល្លារអាមេរិក) ក្នុងនោះការនាំចេញមាន ៩៥.៤៣០ ប៊ីលានរៀល កើនឡើង ១៨,៧%ធៀបនឹងឆ្នាំមុន ស្របពេលដែលការនាំចូលមាន ១៣១.៧៦៥ ប៊ីលានរៀល កើនឡើង ៤,២%។

ធនាគារជាតិនៃកម្ពុជា ចុះ MoU ជាមួយនឹងធនាគារកណ្តាលរវ៉ាន់ដា ស្តីពីកិច្ចសហប្រតិបត្តិការក្នុងផ្នែកផ្សេងៗនៃការអភិវឌ្ឍវិស័យហិរញ្ញវត្ថុ ដើម្បីពង្រឹងកិច្ចសហប្រតិបត្តិការក្នុងការអភិវឌ្ឍលើផ្នែកនវានុវត្តន៍ហិរញ្ញវត្ថុ និងប្រព័ន្ធទូទាត់។

អគ្គនាយកដ្ឋានពន្ធដារ កោះហៅម្ចាស់ក្រុមហ៊ុនចំនួន៣ ឲ្យចូលខ្លួនមកទូទាត់បំណុលពន្ធជូនរដ្ឋដោយមិនឲ្យលើសពី ១៥ថ្ងៃ បន្ទាប់ពីការជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី០៦ ខែមេសា ឆ្នាំ២០២៣នេះ ដោយផ្អែកតាមច្បាប់ស្តីពីសារពើពន្ធ និងប្រកាសស្តីពីការគ្រប់គ្រងបំណុលពន្ធ។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) សម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនចំនួន៥ បោះទុនប្រមាណ ៩៨,១លានដុល្លារ ដើម្បីបង្កើតរោងចក្រនិងកសិដ្ឋានក្នុងរាជធានី-ខេត្តចំនួន៥ ដែលអាចបង្កើតការងារបានប្រមាណជាង ១១០០កន្លែង។

គ្រឹះស្ថានឥណទានជនបទចំនួន១០៤ ដែលត្រូវបានធនាគារជាតិនៃកម្ពុជា លុបចេញពីបញ្ជីរបស់ខ្លួន។ ការប្រកាសលុបឈ្មោះគ្រឹះស្ថានឥណទាននេះ ធ្វើឡើងកាលពីថ្ងៃទី១២ ខែមេសា ឆ្នាំ២០២៣ ដើម្បីជូនជាដំណឹងដល់សាធារណជន និងអាជ្ញាធរមានសមត្ថកិច្ចពាក់ព័ន្ធ។

ភ្ញៀវទេសចរជាតិ និងអន្តរជាតិសរុបប្រមាណជាង ១៣លាននាក់ ក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ចាប់ពីថ្ងៃទី១៤-១៥-១៦ ខែមេសា​ ឆ្នាំ២០២៣ បានធ្វើដំណើររកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស​។ ក្នុងនោះក៏ក្រសួងទេសចរណ៍ បានរាប់បញ្ចូលទាំងចំនួនប្រជាជនដែលបានចូលរួមលេងកម្សាន្តនៅតាមទីតាំង ដែលមានការរៀបចំកម្មវិធីសង្រ្កាន្ត ព្រមជាមួយការលេងកម្សាន្តនៅតាមភូមិស្រុក និងកន្លែងជួបជុំនានាផងដែរ។