ចំណេះដឹង និង ព័ត៌មាន

នាយកដ្ឋានកសិឧស្សាហកម្មនៃក្រសួងកសិកម្ម រុក្ខាប្រមាញ់ និងនេសាទ និងជាលេខាធិការដ្ឋាននៃគណៈកម្មាធិការសម្របសម្រួលកិច្ចសន្យាផលិតកម្មកសិកម្មសហការជាមួយសហភាពសហគមន៍បន្លែសុវត្ថិភាពកម្ពុជា បានរៀបចំពិធីចុះកិច្ចសន្យាទិញ-លក់ចំណិតដំឡូងមីស្ងួតរវាងសហគមន៍បន្លែសុវត្ថិភាពកម្ពុជា និងក្រុមហ៊ុន Global Ecological Rice (Cambodia) Co., Ltd របស់ភាគីចិន។ ពិធីចុះកិច្ចសន្យានេះក្នុងគោលបំណងជំរុញការនាំចេញដំឡូងមីស្ងួត ទៅកាន់ទីផ្សារប្រទេសចិន ក្នុងបរិមាណសរុប៥០ម៉ឺនតោន ក្នុង១ឆ្នាំ ដោយយកខេត្តបាត់ដំបងជាទីតាំងគោល។

ក្រសួងប្រៃសណីយ៍ និងទូរគមនាគមន៍ បានចេញសេចក្តីជូនដំណឹងជ្រើសរើសបុគ្គលិកជាប់កិច្ចសន្យាឲ្យចូលបម្រើការងារតាមបណ្ដាអង្គភាព ដែលចំណុះអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល(គ.រ.ឌ.)។

អគ្គនាយកដ្ឋានពន្ធដារ កោះហៅម្ចាស់ក្រុមហ៊ុនចំនួន២ ឲ្យចូលខ្លួនមកដោះស្រាយបំណុលពន្ធជូនរដ្ឋ ដោយមិនឲ្យលើសពី ១៥ថ្ងៃបន្ទាប់ពីការជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី១៣ ខែមីនា ឆ្នាំ២០២៣ ដោយផ្អែកតាមច្បាប់ស្តីពីសារពើពន្ធនិងប្រកាសស្តីពីការគ្រប់គ្រងបំណុលពន្ធ។

កម្ពុជា-ប៊ុលហ្គារី សម្រេចបានទំហំពាណិជ្ជកម្មទ្វេភាគីប្រមាណ ៨,១លានដុល្លារ ក្នុងឆ្នាំ២០២២ កើនឡើង ៧៨% ស្មើនឹង ៤,៥៤លានដុល្លារ ក្នុងឆ្នាំ២០២១។ ពាណិជ្ជកម្មទ្វេភាគីរវាងប្រទេសទាំងពីរ គឺកម្ពុជាបាននាំចេញទំនិញជាប្រភេទ សម្លៀកបំពាក់ ស្បែកជើង ស្ករនិងថ្នាំជក់ទៅប៊ុលហ្គារី ខណៈប៊ុលហ្គារី បាននាំចូលទំនិញមកកម្ពុជាវិញជាប្រភេទជីកសិកម្ម ស្ពាន់ កែវ និងម៉្សៅ។ នេះបើតាមការកត់សម្គាល់របស់ភាគីទាំងពីរ នាជំនួបពិភាក្សាការងាររវាងឯកឧត្តមប៉ានសូរស័ក្តិរដ្ឋមន្ត្រីក្រសួងពាណិជ្ជកម្ម ជាមួយនឹងលោកជំទាវ ម៉ារីនេឡា ផេតកូវ៉ាឯកអគ្គរដ្ឋទូតនៃសាធារណរដ្ឋប៊ុលហ្គារីប្រចាំកម្ពុជា។

សហគមន៍កសិកម្មបានបង្កើតឡើងតាំងពីឆ្នាំ២០០៣ មកដល់បច្ចុប្បន្ននេះ សហគមន៍កសិកម្មនៅតាមបណ្តារាជធានីទាំង២៥ កើនឡើងចំនួន ១២៥១សហគមន៍ ដែលមានសមាជិកសរុប១២០ ២០៨នាក់ ក្នុងនោះស្ត្រីមានចំនួន ១០៧ ៣៨០នាក់ មានដើមទុនសរុបប្រមាណ ២៦លានដុល្លារ និងមានភាគហ៊ុនចំនួន ១២,៨លានដុល្លារ។ នេះបើតាមទិន្នន័យដែលបង្ហាញក្នុងពិធីបិទសន្និបាតការងារសហគមន៍កសិកម្មឆ្នាំ០២២ និងលើកទិសដៅឆ្នាំ២០២៣ ក្រោមប្រធានបទ «សហគមន៍ជាចលករនៃផលិតកម្មកសិកម្មតាមកិច្ចសន្យា»កាលពីថ្ងៃទី១៤ ខែមីនា ឆ្នាំ២០២៣។

២ខែដើមឆ្នាំ២០២៣ អគ្គនាយកដ្ឋានពន្ធដារ​ប្រមូលចំណូលពន្ធ-អាករ តាមប្រព័ន្ធគ្រប់គ្រងទិន្នន័យចំណូលអនឡាញបានចំនួន ២ ១៨៣,៨៩ ប៊ីលានរៀល (ប្រមាណជា ៥៣៩,២៣ លានដុល្លារ) ស្មើនឹង ១៥,១០% នៃផែនការកំណត់។ នេះបើតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំបូកសរុបចំណូលពន្ធប្រចាំខែរបស់អគ្គនាយដ្ឋានពន្ធ នៅថ្ងៃទី១៤ ខែមីនានេះ។

រហូតមកដល់ពេលនេះ មានគ្រឹះស្ថានហិរញ្ញវត្ថុនិងធនាគារ ចំនួន១២ ដែលកំពុងដំណើរការប្រមូលចំណូល និងមានបេក្ខភាពគ្រឹះស្ថានហិរញ្ញវត្ថុចំនួន១១ផ្សេងទៀតផងដែរ ក្នុងគោលបំណងធ្វើឱ្យកាន់តែប្រសើរ និងមានជម្រើសច្រើនដល់ប្រជាពលរដ្ឋ ក្នុងការបង់កម្រៃសេវាសាធារណៈនិងសេវាប្រើប្រាស់ផ្លូវល្បឿនលឿន។

ទំហំពាណិជ្ជកម្មទ្វេភាគីរវាងកម្ពុជានិងអូស្ត្រាលី កើនឡើងជាលំដាប់ពី ២០៥លានដុល្លារ​ ក្នុងឆ្នាំ២០១៩ រហូតដល់ប្រមាណ ៥២៣លានដុល្លារ ក្នុងឆ្នាំ២០២២។ នេះបើតាមការលើកឡើងរបស់ឯកឧត្តម អូន ព័ទ្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងជំនួបជាមួយឯកឧត្តម Justin Kevin Whyatt ឯកអគ្គរដ្ឋទូតអូស្ត្រាលីប្រចាំនៅកម្ពុជាដែលទើបចូលកាន់តំណែង កាលពីថ្ងៃទី០៩ ខែមីនា ឆ្នាំ២០២៣។

ផ្សារមូលបត្រកម្ពុជា (CSX) បានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិនៅទីផ្សារគោលរបស់ក្រុមហ៊ុន ម៉េងលី ជេ. គួច អេឌ្យូខេសិន ម.ក និងពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុល (សញ្ញាបណ្ណបៃតង) របស់ក្រុមហ៊ុន ហ្គ្រីន សឺស្តែនណេប៊ល វេនឈ័រ (ខេមបូឌា) ឯ.ក កាលពីថ្ងៃទី០៧ ខែមីនាឆ្នាំ២០២៣។

សម្តេចនាយករដ្ឋមន្ត្រី ហ៊ុន សែន បានផ្ញើជាសំឡេងអំពីករណីមានជនឆបោកបន្លំជាអ្នកឧកញ៉ា ឃុន សៀ ឆាតទៅសម្តេច ដើម្បីឲ្យផ្ញើលុយតាម ABA នៅយប់ថ្ងៃទី១២ ខែមីនា ឆ្នាំ២០២៣។ ក្រោយមានករណីឆបោកបែបនេះ សម្តេចបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ចំពោះជនខិលខូចបែបនេះ។