ចំណេះដឹង និង ព័ត៌មាន

តំណាងសមាគមមនុស្សចាស់នៅកម្ពុជាស្នើឲ្យរដ្ឋាភិបាល គិតគូរផ្តល់ប្រាក់ឧបត្ថម្ភវ័យចាស់សម្រាប់ពួកគាត់ដើម្បីជួយដោះស្រាយបញ្ហា ជីវភាព សុខភាព ទាំងក្នុងអំឡុងនិងក្រោយផលប៉ះពាល់នៃជំងឺកូវីដ-១៩។

គណៈកម្មាធិការសេដ្ឋកិច្ចនិងធុរកិច្ចឌីជីថលនិងធនាគារជាតិនៃកម្ពុជា រួមគ្នារៀបចំសិក្ខាសាលាស្តីពី«តួនាទីនៃវិស័យធនាគារនិងបច្ចេកវិទ្យាហិរញ្ញវត្ថុក្នុងសេដ្ឋកិច្ចឌីជីថលកម្ពុជា»ដើម្បីផ្សព្វផ្សាយពីឌីជីថលលូបនីយកម្មក្នុងវិស័យធនាគារនៅកម្ពុជា។ សិក្ខាសាលានេះ នឹងធ្វើឡើងនៅថ្ងៃទី២២ខែកញ្ញា ឆ្នាំ២០២២ខាងមុខ នៅសណ្ឋាគារ ហៃយ៉ាត់ រីជិនស៊ី ភ្នំពេញ។

រយៈពេល ៨ខែ ឆ្នាំ២០២២​ អគ្គនាយកដ្ឋានពន្ធដារប្រមូលចំណូលពន្ធ-អាករ តាមប្រព័ន្ធគ្រប់គ្រងទិន្នន័យចំណូលអនឡាញបានចំនួន ៩៨៧៩,១៤ ប៊ីលានរៀល (ប្រមាណជា ២៤៣៩,២៩លានដុល្លារ) ស្មើនឹង ៨៦,៥១% នៃផែនការច្បាប់ស្តីពីហិរញ្ញវត្ថុប្រចាំឆ្នាំ២០២២។ បើធៀបនឹងចំណូលពន្ធ-អាកររយៈពេលដូចគ្នាឆ្នាំ២០២១ កើនឡើង ២១៣៨,៨៦ ប៊ីលានរៀល (ប្រមាណជា ៥១៨,១១លានដុល្លារ) ស្មើនឹង ២៧,៦៦%។

ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា ធនាគារអភិវឌ្ឍន៍អាស៊ី (ADB) ជាដៃគូសហការដ៏សំខាន់របស់កម្ពុជា ចំពោះការផ្តល់ជំនួយ និងហិរញ្ញប្បទានដល់កម្ពុជានាពេលកន្លងមក ដែលរួមចំណែកដល់ការអភិវឌ្ឍសេដ្ឋកិច្ច-សង្គម។

សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានប្រកាសចាត់តាំងឯកឧត្តមសន្តិបណ្ឌិត សុខ ផល ដែលជារដ្ឋលេខធិការក្រសួងមហាផ្ទៃ ដឹកនាំក្រុមការងារដើម្បីសហការបង្ក្រាបល្បែងស៊ីសងខុសច្បាប់គ្រប់ប្រភេទនៅទូទាំងប្រទេសកម្ពុជា។

ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំលើកទី៤ ដើម្បីពិភាក្សាប្រាក់ឈ្នួលអប្បបរមា ផ្នែកវាយនភពន្ឌ កាត់ដេរ ផលិតស្បែកជើងនិងផលិតផលធ្វើដំណើរនិងកាបូបសម្រាប់ឆ្នាំ២០២៣។ ជាលិទ្ធិផលភាគីតំណាងនីមួយៗនៅតែចរចារគ្នាមិនត្រូវ​ ហើយនឹងបន្តប្រជុំសម្រេចចុងក្រោយមុនពិធីបុណ្យភ្ជុំបិណ្ឌ។

បុរសម្នាក់ដែលចោលសំរាមនៅទីសាធារណៈក្នុងក្រុងព្រះសីហនុត្រូវបានចូលខ្លួនសារភាពកំហុសនិងបង់ប្រាក់ផាកពិន័យចំនួន ១លានរៀលទៅដល់មន្ទីរបរិស្ថានខេត្តព្រះសីហនុតាមផ្លូវច្បាប់នៅថ្ងៃទី១៣ ខែកញ្ញានេះ។

សមាគមមីក្រូហិរញ្ញវត្ថុ បានប្រកាសគាំទ្រអំពាវនាវនិងស្មើដល់គ្រឹះស្ថានមីក្រូហិរញ្ញវត្ថុទាំងអស់ផ្តល់ប្រាក់កម្ចីជាមួយអត្រាការប្រាក់ទាបជូនពលរដ្ឋរស់នៅភូមិធម្មជាតិរុនតាឯក ស្ថិតក្នុងស្រុកបន្ទាយស្រី ខេត្តសៀមរាប ដើម្បីឱ្យបងប្អូនប្រជាពលរដ្ឋបានប្រើប្រាស់តាមតម្រូវការនាពេលខាងមុខ។ 

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានអនុម័តចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន៣ បោះទុនវិនិយោគប្រមាណ ១៦,៥លានដុល្លារ បង្កើតរោងចក្រកាត់ដេរសម្លៀកបំពាក់នៅភ្នំពេញនិងខេត្តកំពង់ស្ពឺ ដែលអាចបង្កើតការងារបានចំនួន ៦៦៨៨កន្លែង។

សម្តេចនាយករដ្ឋមន្ត្រី ហ៊ុន សែន បានថែងបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ កាលពីថ្ងៃទី១២ ខែកញ្ញា ឆ្នាំ២០២២នេះ ថាសម្របពេលដែលអាស៊ានបាននិងកំពុងងើបចេញពីវិបត្តិកូវីដ-១៩ ឆ្ពោះទៅរកកំណើនសេដ្ឋកិច្ចប្រកបដោយចីរភាពឡើងវិញក៏ពិតមែន។ ប៉ុន្តែ ស្ថានភាពសង្គម-សេដ្ឋកិច្ចបច្ចុប្បន្នក្នុងតំបន់អាស៊ាន ក៏ដូចជាសាកលលោកកទាំងមូលនៅតែមានភាពផុយស្រួយ នឹងបែកខ្ញែកគ្នា។ សម្តេច ហ៊ុន បញ្ជាក់ថាគឺស្ថានភាពនេះ គឺដោយសារការអូសបន្លាយសង្គ្រាមរុស្ស៊ី-អ៊ុយក្រែន បានបន្ទច់បង្អាក់ការស្តារសង្គមសេដ្ឋកិច្ចឡើងវិញ។