ចំណេះដឹង និង ព័ត៌មាន

គម្រោងចំណតផែកុងតឺន័រទឹកជ្រៅថ្មីជំហានទី១ដែលមានប្រវែង៣៥០ម៉ែត្រ ស្ថិតនៅកំពង់ផែស្វយ័តក្រុងព្រះសីហនុ ត្រូវបានសម្ពោធបើកការដ្ឋានសាងសង់ជាផ្លូវការនាថ្ងៃទី២២ខែធ្នូ ឆ្នាំ២០២៣ ក្នុងតម្លៃសាងសង់ប្រមាណ ២៤៣លានដុល្លារ។ ការបើកដ្ឋានសាងសង់នេះ ស្ថិតក្រោមអធិបតីភាពសម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា។

ធនាគារជាតិនៃកម្ពុជា និងក្រុមហ៊ុន UnionPay International (UPI) បានប្រកាសដាក់ឲ្យដំណើរការការទូទាត់ឆ្លងដែនតាមឃ្យូអរកូត (QR Code) រវាងប្រព័ន្ធទូទាត់បាគងរបស់ធនាគារជាតិនៃកម្ពុជានិងបណ្តាញទូទាត់របស់ក្រុមហ៊ុន UPI (UnionPay QR Code) នាថ្ងៃទី២២ខែធ្នូ ឆ្នាំ២០២៣នេះ។

រយៈពេល ១១ខែ ឆ្នាំ២០២៣នេះ កំពង់ផែស្វយ័តក្រុងព្រះសីហនុ រកចំណូលអាជីវកម្មសរុបបានជាង ៨៥លានដុល្លារ កើនឡើង ២,៧% បើធៀបនឹងរយៈពេលដូចគ្នាក្នុងឆ្នាំ២០២២។ ចំណែកបរិមាណទំនិញឆ្លងកាត់កំពង់ផែស្វយ័តក្រុងព្រះសីហនុមានចំនួន ៧លានតោន កើនឡើង ១១,៣៤%។

រដ្ឋមន្ត្រីក្រសួងកសិកម្ម បានប្រកាសស្វែងរកដៃគូដែលអាចផ្តល់កម្ចីឱ្យកសិករ ក្នុង អត្រាការប្រាក់ទាប ដើម្បីជួយដល់សហគមន៍កសិកម្មមានលទ្ធភាពវិនិយោគបន្ថែម ឈានទៅរកភាពរឹងមាំ និងនិរន្តរភាពសេដ្ឋកិច្ច។

រយៈពេល២សប្តាហ៍ នៃខែធ្នូ ឆ្នាំ២០២៣នេះក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគចំនួន១៥បោះទុនវិនិយោគសរុបជាង២៤៧លានដុល្លារអាមេរិក និងអាចបង្កើតការងារបានជាង១៦,០០០កន្លែង។ គម្រោងទាំង១៥ នេះ បានបោះទីតាំងគោលដៅវិនិយោគរបស់ខ្លួននៅក្នុងខេត្តចំនួន៧ដោយរួមមាន៖ ខេត្តស្វាយរៀង, តាកែវ, កំពង់ស្ពឺ,កណ្តាល, ព្រះសីហនុ, ពោធិ៍សាត់ និងខេត្តកំពង់ចាម។

ពន្ធដារ ប្រមូលចំណូលពន្ធអាករបានជាង ៣,៣ពាន់លានដុល្លារ ក្នុងរយៈពេល១១ ខែនៅឆ្នាំ២០២៣ ស្មើនឹង ៩៣,៧១% នៃផែនការ ខណៈពេលដែលក្នុងខែវិច្ឆិកា ប្រមូលចំណូលពន្ធនេះបានជាង ២៨០លានដុល្លារ។

រដ្ឋាភិបាលជប៉ុនបានឯកភាពផ្តល់ថវិកាសរុបជិត១,៤លានដុល្លារ (១,៣៩០,១១៧ដុល្លារអាម៉េរិក) ដល់អង្គការសកម្មភាពកំចាត់មីនជប៉ុន (JMAS) សម្រាប់បោសម្អាតគ្រាប់មីនមិនទាន់ផ្ទុះនៅក្នុងខេត្តបន្ទាយមានជ័យ។

មន្ត្រីពន្ធដារនៃអគ្គនាយកដ្ឋានព្ធដារ នឹងសហការអាជ្ញាធរមានសមត្ថកិច្ចថ្នាក់ក្រោមជាតិ ត្រៀមចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូនប្រចាំឆ្នាំ២០២៣ នៅតាមគោលដៅសំខាន់ៗមួយចំនួននៅទូទាំងប្រទេស ចាប់ពីថ្ងៃទី១៥ ខែមករា ដល់ថ្ងៃទី៣១ ខែមីនា ឆ្នាំ២០២៤ ខាងមុខ។

ឯកឧត្តម ប៉េង ពោធិ៍នារដ្ឋមន្ត្រីក្រសួងសាធារណការ និងដឹកជញ្ជូន បានសម្ពោធដាក់ឲ្យប្រើប្រាស់នូវគម្រោងសាងសង់ប្រព័ន្ធលូ និងស្ថានីយ៍ប្រព្រឹត្តកម្មទឹកកខ្វក់ក្រុងកំពត នៃគម្រោងអភិវឌ្ឍន៍ទីក្រុងរបៀង២ដែលមានតម្លៃ ២០លានដុល្លារ ត្រូវបានប្រគល់ជូនរដ្ឋបាលខេត្តគ្រប់គ្រងដើម្បីបម្រើជាសាធារណៈប្រយោជន៍ជូនដល់ប្រជាជន។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចុះអនុស្សរណៈនៃការយោគយល់គ្នា ( MOU) លើកិច្ចសហការសំខាន់ៗចំនួន៧ ជាមួយនឹងឯកឧត្តម គីស៊ីដា ហ្វូមីអូ នាយករដ្ឋមន្រ្តីជប៉ុន នៅថ្ងៃទី១៨ ធ្នូនេះ នាឱកាសដែលប្រមុខរដ្ឋាភិបាលកម្ពុជា ចូលរួមកិច្ចប្រជុំកំពូលរម្លឹកខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ ឆ្នាំ២០២៣។