ចំណេះដឹង និង ព័ត៌មាន

ក្នុងឆមាសទី១ ឆ្នាំ២០២៤នេះ កម្ពុជា បាននាំចេញអង្ករចំនួនជាង៣.៣ម៉ឺនតោន ដែលស្មើនឹងប្រមាណ ២៤៧,៦០លានដុល្លារ តាមរយៈក្រុមហ៊ុនចំនួន៥១ ទៅកាន់គោលដៅចំនួន៦៣គោលដៅ។ នេះបើតាមរបាយការណ៍របស់សហព័ន្ធស្រូវអង្ករកម្ពុជា ចេញផ្សាយនាថ្ងៃទី៩ ខែកក្កដា ឆ្នាំ២០២៤។

ក្រសួងពាណិជ្ជកម្មអំពាវនាវឲ្យសហគ្រិនខ្មែរចូលរួមពិព័រណ៍ចំនួនពីរ គឺនៅប្រទេសចិន និងហ្វីលីពីនដោយក្រសួងបញ្ជាក់ថា ការចូលរួមពិព័រណ៍នោះ នឹងផ្តល់ឱកាសដល់ម្ចាស់សហគ្រាសធុនតូចនិងមធ្យម ផ្សព្វផ្សាយលក់ផលិតផល និងសេវាកម្មរបស់ខ្លួនទៅកាន់ទីផ្សារអន្តរជាតិព្រមទាំងអាចស្វែងរកដៃគូអាជីវកម្មថ្មីៗក្នុងទីផ្សារប្រទេសចិន។

មូលនិធិគន្ធបុប្ឆាកម្ពុជា តាមរយៈយុទ្ធនាការ«១ម៉ឺនរៀល ១ម៉ឺននាក់» ២០២៤ ដែលផ្តួចផ្តើម ឡើងដោយលោកជំទាវបណ្ឌិតពេជ ចន្ទមុន្នី ភរិយាសម្តេចធិបតី ហ៊ុនម៉ាណែត នាយករដ្ឋមន្ត្រីកម្ពុជា បានបញ្ចប់យទ្ធនាការនៅត្រឹមថ្ងៃទី១ខែកក្កដា ឆ្នាំ២០២៤ ដោយទទួលបានថវិកាបរិច្ចាគសរុបជាង ៣,៣លានដុល្លារពីសប្បុរសជនចំនួនជាង ២៤ម៉ឺននាក់។

ក្នុងឆមាសទី១ នៃឆ្នាំ២០២៤នេះ កម្ពុជារកចំណូលពីការលក់សំបុត្រឲ្យភ្ញៀវអន្តរជាតិ ដើម្បីចូលទស្សនារមណីយដ្ឋានអង្គរប្រាសាទកោះកែរ និងកំពង់ផែចុងឃ្នៀស បានសរុបប្រមាណ ២៤ ៣៥៧ ៦៩៥ដុល្លារ កើនឡើង ៣៦,២៥% បើធៀបនឹងរយៈពេលដូចគ្នា ក្នុងឆ្នាំ២០២៣។ នេះបើតាមសេចក្តីប្រកាសព័ត៌មានរបស់គ្រឹះស្ថានអង្គរនៅថ្ងៃទី០១កក្កដានេះ។

ធនាគារពិភពលោក បានអនុម័តឥណទាន២៧៥លានដុល្លារ ជួយទ្រទ្រង់ដល់កិច្ចខិតខំប្រឹងប្រែងរបស់កម្ពុជា ដើម្បីជំរុញកំណើននិងភាពធន់នៃសេដ្ឋកិច្ច។ ឥណទាននេះ នឹងត្រូវប្រើសម្រាប់ជំរុញកំណែទម្រង់ដើម្បីលើកកម្ពស់ភាពប្រកួតប្រជែងនៃផ្នែកឯកជន ពង្រឹងជំហរសារពើពន្ធរបស់កម្ពុជានិងផ្តល់ជំនួយដល់ក្រុមប្រជាជនងាយរងគ្រោះបំផុត។ បើតាមសេចក្តីប្រកាសរបស់ធនាគារពិភពលោកនាថ្ងៃទី២០ ខែមិថុនា ឆ្នាំ២០២៤។

រដ្ឋាភិបាលជប៉ុន បានផ្តល់ជំនួយថវិកាជិត៥០ម៉ឺនដុល្លារតាមរយៈអង្គការ Save the Children Japan (SCJ) ដើម្បីអនុវត្តលើគម្រោងលុបបំបាត់អំពើហិង្សាលើកុមារនៅតាមសាលារៀនក្នុងខេត្តកំពង់ចាមដែលជាឆ្នាំទី៣ នៃការអនុវត្តគម្រោងនេះ។

គម្រោងសាងសង់ស្ពានអាកាសភ្លោះមួយដែលចាប់ផ្តើមពីចំណុចប្រសព្វមហាវិថី សម្ដេចតេជោ ហ៊ុន សែន និងផ្លូវជាតិលេខ២ស្ថិតនៅព្រំប្រទល់រាជធានីភ្នំពេញ និងខេត្តកណ្តាល តម្លៃជាង១៦លានដុល្លារ ត្រូវបានសម្តេចធិបតីនាយករដ្ឋមន្ត្រី ហ៊ុន ម៉ាណែត ប្រកាសសម្ពោធបើកការដា្ឋននៅថ្ងៃទី១៧ ខែមិថុនាឆ្នាំ២០២៤នេះ។

ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន២៥ ដែលមានទុនវិនិយោគសរុបប្រមាណជាង២៤៦លានដុល្លារ ក្នុងខែឧសភា ឆ្នាំ២០២៤ ដោយក្នុងនោះ មានគម្រោងថ្មីចំនួន២៤និងគម្រោងពង្រីកផលិតកម្មចំនួន១ ដែលអាចបង្កើតការងារបានប្រមាណ ១៥ពាន់កន្លែង។

សហព័ន្ធស្រូវអង្ករកម្ពុជា ឱ្យដឹងថា កម្ពុជា ទទួលបានចំណូល ២១៩,៩១លានដុល្លារ ពីការនាំចេញអង្ករចំនួន ៣០២ ៥៩២តោន ក្នុងរយៈពេល ៥ខែ ក្នុងឆ្នាំ២០២៤ ដោយបាននាំចេញអង្ករជាង ៣០០ពាន់តោន ទៅកាន់គោលដៅចំនួន៦៣ តាមរយៈក្រុមហ៊ុនចំនួន៤៩។

នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានសម្ពោធដាក់ឱ្យប្រើប្រាស់«កំពង់ផែពហុបំណងកំពត» ជាផ្លូវការនៅថ្ងៃទី០៦ ខែមិថុនា ឆ្នាំ២០២៤នេះ។ កំពង់ផែ ដែលវិនិយោគដោយក្រុមហ៊ុនកំពតផត ក្នុងទំហំទឹកប្រាក់ប្រមាណ១៤០លានដុល្លារ ត្រូវបានរំពឹកថា នឹងក្លាយជាសរសៃឈាមដ៏សំខាន់សម្រាប់ការដឹកជញ្ជូនតាមផ្លូវសមុទ្ររបស់កម្ពុជា។