ចំណេះដឹង និង ព័ត៌មាន

ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរ ក្នុងពិធីបុណ្យសមុទ្រលើកទី១០ ជុំទី៣ នាថ្ងៃទី០១ ដល់ថ្ងៃទី០៣ ខែធ្នូ ឆ្នាំ២០២៣ ខាងមុខ នៅក្រុងកែប ដើម្បីលើកកម្ពស់ផលិតផលក្នុងស្រុកឲ្យមានការទទួលស្គាល់ និងចូលរួមប្រើប្រាស់កាន់តែទូលំទូលាយនៅទូទាំងប្រទេស។

ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោរបស់ក្រុមហ៊ុនចំនួន១២ តាមសំណើសុំវិនិយោគរបស់ក្រុមហ៊ុនទាំងនោះដែលមានទុនវិនិយោគសរុបប្រមាណ ៦៦.៦លានដុល្លារ ដើម្បីបង្កើតរោងចក្រ និងអាចបង្កើតឱកាសការប្រមាណ១២៦១០នាក់បន្ថែម។នេះបើតាមការចុះផ្សាយរបស់ CDC កាលពីថ្ងៃទី៣១ ខែតុលាឆ្នាំ២០២៣ ដោយបានបញ្ជាក់ពីគម្រោងវិនិយោគរបស់ក្រុមហ៊ុននីមួយៗ។

អង្ករម៉ាកសមូហភាពSKOដែលផលិតចេញពី«ពូជស្រូវសែនក្រអូប» បានឈ្នះពានរង្វាន់មាស​ក្នុងកម្មវិធីវាយតម្លៃគុណភាព រសជាតិ ប្រភេទអង្ករសគ្រាប់វែង ចិន-អាស៊ាន​ លើកទី១ ក្នុងចំណោមពូជស្រូវទាំង៦១ប្រភេទដែលមកពីប្រទេសក្នុងតំបន់អាស៊ាន និងប្រទេសចិន កាលពីថ្ងៃទី២៨ ខែតុលាឆ្នាំ២០២៣។

ក្នុងខែតុលា ឆ្នាំ២០២៣នេះ កម្ពុជារកចំណូលបានប្រមាណ ២ ៩២៧ ០៣៨ដុល្លារ ពីការលក់សំបុត្រចូលទស្សនារមណីយដ្ឋានអង្គរ ដោយទទួលបានភ្ញៀវទេសចរបរទេសសរុបប្រមាណ ៦៣ ០០៩នាក់។ ប្រៀបធៀបនឹងរយៈពេលដូចគ្នាក្នុងឆ្នាំ២០២២ ចំនួនភ្ញៀវទេសចរបរទេសទិញសំបុត្រចូលទស្សនាអង្គរមានចំនួន ៧៩,០២% និងរកចំណូលបានប្រមាណ ១០៩,០៩%។

អគ្គនាយកដ្ឋានពន្ធដារ ប្រមូលចំណូលពន្ធអាករបានប្រមាណ១១ ៣៦៥,៨១ ប៊ីលានរៀល (ប្រមាណ ២ ៨០៦,៣៧ លានដុល្លារ)ស្មើនឹង ៧៨,៥៧% ខណៈដែលគិតត្រឹមថ្ងៃទី៣០ ខែតុលាម្សិលមិញគឺសម្រេចបាន ១២ ៣៩៦,៨៤ ប៊ីលានរៀល (ប្រមាណ ៣ ០៦០,៩៥ លានដុល្លារ) ស្មើនឹង ៨៥,៧០% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ 

រដ្ឋបាលរាជធានីភ្នំពេញបានណែនាំឲ្យមន្ត្រីពាក់ព័ន្ធពង្រឹងការមិនយកថ្លៃភាស៊ី ចំពោះអ្នកលក់ដូរតាមកញ្ច្រែងកញ្ចើ ល្អី និងអ្នកលក់ដូរចល័តនៅរាជធានីភ្នំពេញ បន្ទាប់ពីសម្តេចធិបតី ហ៊ុន ម៉ាណែតនាយករដ្ឋមន្ត្រី នៃកម្ពុជា បានដាក់បញ្ជាឲ្យអនុវត្តយ៉ាងម៉ឺងម៉ាត់នូវសារាចរលេខ១១ សរចុះថ្ងៃទី០៩ ខែធ្នូ ឆ្នាំ២០១៦ ស្តីពីការលុបការបង់ភាស៊ី និងការបង់ថ្លៃផ្សេងៗទៀតកាលពីថ្ងៃទី០៣ ខែតុលានេះ។

សមាគមមីក្រូហិរញ្ញវត្ថុកម្ពុជា (CMA) បានបង្ហាញក្រាហ្វីកទិន្ន័យនៃការលុបឈ្មោះគ្រឹះស្ថានឥណទានជនបទ ដើម្បីពង្រឹងវិស័យរបស់គ្រឹះស្ថានដែលផ្តល់កម្ចីហិរញ្ញវត្ថុទាំងនោះ។ CMA បានបញ្ជាក់ថាវត្តមានរបស់គ្រឹះស្ថានឥណទានជនបទទាំងនោះ បាននិងកំពុងរួមចំណែកផ្តល់សេវាឥណទានខ្នាតតូចនៅតាមតំបន់មូលដ្ឋានដើម្បីបំពេញតម្រូវការឥណទានទៅតាមប្រភេទអាជីវកម្មរបស់ប្រជាពលរដ្ឋ។

គិតត្រឹមចុងខែកញ្ញា ឆ្នាំ២០២៣នេះមូលនិធិអភិវឌ្ឈន៍ជំនាញ (SDF) បានផ្តល់ថវិកាបដិភាគលើគម្រោងបណ្តុះបណ្តាលជំនាញប្រមាណ១១១គម្រោង គិតជាទឹកប្រាក់សរុបជាង ១៤លានដុល្លារ ដោយទទួលបានសិក្ខាកាមចំនួន ១៤៤០៩នាក់ (ស្ត្រី ៣៦%)។

កម្ពុជា បាននាំផ្លែមៀនស្រស់ជាង ១ម៉ឺនតោនទៅកាន់ទីផ្សារប្រទេសចិន ដោយគិតចាប់ពីខែមករា ដល់ថ្ងៃទី២៧ ខែតុលា ឆ្នាំ ២០២៣នេះ។នេះបើតាមការឱ្យដឹងពីលោកជំទាំវ អ៊ឹម រចនា អ្នកនាំពាក្យក្រសួងកសិកម្ម​។

អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម និងក្រុមហ៊ុនភីធីធី (ខេមបូឌា)បានសហការគ្នាអនុវត្តគម្រោងជំរុញការលក់ផលិតផលខ្មែរ ក្រោមកម្មវិធីស្តីពី៖ «កិច្ចសហការជំរុញ និងបង្កើនការលក់ផលិតផលខ្មែរ» នៅតាមស្ថានីយ៍ប្រេងឥន្ធនៈភីធីធីតាមបណ្តារាជធានី-ខេត្ត។ ការអនុវត្តគម្រោងនេះដើម្បីលើកកម្ពស់ផលិតផលខ្មែរដែលជាផលិតផលលក្ខណៈគ្រួសារតូចៗលើទីផ្សារក្នុងស្រុកនិងផលប្រយោជន៍សហគមន៍។