ចំណេះដឹង និង ព័ត៌មាន

ការទូទាត់ប្រាក់រៀលតាមរយៈ QR Code Payment នៅប្រទេសឡាវ វៀតណាម និងប្រទេសចិនអាចនឹងសម្រេចបាននៅចុងឆ្នាំនេះ ខណៈពេលដែលកម្ពុជា បានផ្សារភ្ជាប់ការទូទាត់ QR Code Payment ជាមួយប្រទេសថៃរួចមកហើយ។ នេះបើតាមការបញ្ជាក់របស់លោកជំទាវបណ្ឌិតជា សិរី ទេសាភិបាលរងធនាគារជាតិនៃកម្ពុជា នាពិធីដាក់ឲ្យដំណើរការប្រព័ន្ធទូទាត់ខេមបូឌានស៊ែស្វីច(Cambodian Shared Switch- CSS) កាលពីថ្ងៃទី០៤ ខែកក្កដាឆ្នាំ២០២៣។

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនចំនួន៥បោះទុនវិនិយោគប្រមាណ ៥០,៧លានដុល្លារដើម្បីបង្កើតរោងចក្រនៅខេត្តកំពង់ស្ពឺ ខេត្តតាកែវ និងខេត្តកណ្តាលដែលអាចបង្កើតការងារបានជាង ១៣៥០០កន្លែង។

រយៈពេល ៦ខែ នៃឆ្នាំ២០២៣នេះកម្ពុជារកចំណូលបានប្រមាណ ១៧ ៨៧៧ ៤១៨ ដុល្លារពីការលក់សំបុត្រចូលទស្សនារមណីយដ្ឋានអង្គរ ដោយមានភ្ញៀវទេសចរបរទេសសរុបប្រមាណ ៣៨៥៧៦៩នាក់។ បើធៀបនឹងរយៈពេលដូចគ្នាក្នុងឆ្នាំ២០២២ចំនួនភ្ញៀវទេសចរបរទេសទិញសំបុត្រចូលទស្សនាមានចំនួន ៥៤៣,១៣% និងរកចំណូលបានប្រមាណ ៦៣៨,៧១%។

ចាប់ពីខែមករាដល់ខែមិថុនា ឆ្នាំ២០២៣នេះកម្ពុជា ទទួលបានភ្ញៀវទេសចរអន្តរជាតិប្រមាណ ២,៥៧លាននាក់ក្នុងចំណោមភ្ញៀវទេសចរសរុបប្រមាណ ១១,១លាននាក់ កើនឡើង ៤០៩%បើធៀបនឹងរយៈពេលដូចគ្នាក្នុងឆ្នាំ២០២២។ នេះបើតាមការបញ្ជាក់របស់ឯកឧត្តម ថោង ខុនរដ្ឋមន្ត្រីក្រសួងទេសចរណ៍ កាលពីថ្ងៃទី០៧ ខែកក្កដា ឆ្នាំ២០២៣។

អគ្គនាយកដ្ឋាពន្ធដារ កោះហៅម្ចាស់ក្រុមហ៊ុនចំនួន៦ ឲ្យចូលខ្លួនទូទាត់បំណុលពន្ធជូនរដ្ឋ ដោយមិនឲ្យលើសពី ១៥ថ្ងៃ បន្ទាប់ពីការជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី២៩ ខែមិថុនា ឆ្នាំ២០២៣ ដោយផ្អែកតាមច្បាប់ស្តីពីសារពើពន្ធ និងប្រកាសស្តីពីការគ្រប់គ្រងបំណុលពន្ធ។

ក្នុងរយៈពេល៦ខែ នៃឆ្នាំ២០២៣ កម្ពុជាសម្រេចបានការនាំចេញអង្ករទៅកាន់ទីផ្សារគោលដៅចំនួន ៥២លើពិភពលោក ដោយក្រុមហ៊ុននាំចេញចំនួន៥០ បានអង្ករចំនួន ៣២៩ ៦៣៣តោន និងស្រូវចំនួន ២ ២២៤ ៩១៣តោន គិតជាទឹកប្រាក់សរុបប្រមាណ ៨០៧,៩លានដុល្លារ។ នេះបើតាមរបាយការណ៍នាំចេញស្រូវនិងអង្ករ សម្រាប់រយៈពេល៦ខែដំបូង ក្នុងឆ្នាំ២០២៣ របស់សហព័ន្ធស្រូវអង្ករកម្ពុជា នាថ្ងៃទី០៧ ខែកក្កដា ឆ្នាំ២០២៣នេះ។

កម្មវិធី FEAC2023 សូមអបអរសាទរដល់បេក្ខជនទាំង ២០ក្រុម ជាប់វគ្គជម្រុះក្នុងចំណោមបេក្ខជនទាំង ៣៨ក្រុម ដែលសមាជិកសរុប ១០៣នាក់ បានដាក់ពាក្យចូលប្រកួតក្នុងកម្មវិធីប្រកួតប្រជែងពានរង្វាន់ស្តីពី«ចំណេះដឹងហិរញ្ញវត្ថុ(FECA)»ប្រចាំឆ្នាំ២០២៣។ ព័ត៌មានបន្ថែមអំពី FEAC សូមចូលទៅកាន់គេហទំព័រផ្លូវតាមតំណភ្ជាប់នេះ៖ https://feca-cambodia.com/)។

គណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនចំនួន៩ បោះទុនវិនិយោគប្រមាណ ៥៤,៨លានដុល្លារ ដើម្បីបង្កើតរោងចក្រនៅរាជធានី-ខេត្តចំនួន៥ ដែលអាចបង្កើតការងារបានប្រមាណ ១៣៨៤៩កន្លែង។

អគ្គនាយកដ្ឋានពន្ធដារ កោះហៅម្ចាស់ក្រុមហ៊ុនចំនួន៥ទៀត ឲ្យចូលខ្លួនដោះស្រាយបំណុលពន្ធជូនរដ្ឋតាមកាលកំណត់ ដោយមិនឲ្យលើសពី ១៥ថ្ងៃ បន្ទាប់ពីការជូនដំណឹងរបស់អគ្គនាយកដ្ឋានពន្ធដារកាលពីថ្ងៃទី២១ ខែមិថុនា ឆ្នាំ២០២៣ ដោយផ្អែកតាមច្បាប់ស្តីពីសារពើពន្ធ និងប្រកាសស្តីពីការគ្រប់គ្រងបំណុលពន្ធ។

និយ័តករអាជីវកម្មអចលនវត្ថុ និងបញ្ចាំ (ន.អ.ប) កោះហៅម្ចាស់អាជីវកម្ម ចែ ម៉ី ហាងបញ្ចាំ ៩៣ ដែលស្ថិតនៅសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ឲ្យមកបង់ប្រាក់ផាកពិន័យ ១០លានរៀល។ ដោយអាជីវកម្មនេះ បានកំពុងធ្វើអាជីវកម្មបញ្ចាំ និងប្រាតិភោគដោយអនុប្បទានដោយគ្មានអាជ្ញាបណ្ណពី ន.អ.ប ដូច្នេះអាជីវកម្មនេះ បានប្រព្រឹត្តិល្មើសនឹងប្រកាសលេខ ០៣០ សហវ.ប្រក ស្តីពី៖ «ការគ្រប់គ្រងអាជីវកម្មទទួលបញ្ចាំ និងទទួលប្រាតិភោគដោយអនុប្បទាន» ចុះថ្ងៃទី១៣ ខែមករា ឆ្នាំ២០១៧។