ចំណេះដឹង និង ព័ត៌មាន

គិតត្រឹមថ្ងៃទី២៨ ខែកុម្ភៈ ឆ្នាំ២០២៣ អគ្គនាយកដ្ឋានពន្ធដារ រួមជាមួយកងកម្លាំងសមត្ថកិច្ចពាក់ព័នុ្ធបានធ្វើការផាកពិន័យទៅលើយានយន្ត ដែលមិនទាន់បានប្រកាសបង់ពន្ធលើមធ្យាបាយដឹកជញ្ជូននិងយានជំនិះគ្រប់ប្រភេទសម្រាប់ឆ្នាំ២០២២ បានប្រមាណ ៨៥៣៧គ្រឿង ទទួលបានប្រាក់ពិន័យចំនួន ៦ ០៩៥ ០៧០ ០០០រៀល (ប្រមាណ ១,៥២លានដុល្លារ)។

និយ័តករបរធនបាលកិច្ច (ន.ប.ធ) បានផ្តល់អាជ្ញាបណ្ណដល់ធនាគារ ហ្វីលីព ភីអិលស៊ីជាប្រតិបត្តិការបរធនបាលផ្តល់សេវារក្សាសុវត្ថិភាព ឬសេវារក្សាទុក (Escrow Services) ក្នុងវិស័យបរធនបាលកិច្ច សម្រាប់ប្រតិបត្តិការបរធនបាលកិច្ចពាណិជ្ជកម្ម ដោយក្រុមហ៊ុននេះបានបំពេញតាមលក្ខខណ្ឌតម្រូវគ្រប់គ្រាន់តាមច្បាប់និងបទប្បញ្ញត្តិជាធរមាន។

ឯកឧត្ដម ជា ចាន់តូ ទេសាភិបាលធនាគារជាតិនៃកម្ពុជា បានចុះហត្ថលេខាលើអនុស្សរណៈយោគយល់ជាមួយឯកឧត្ដម Luke Forau ទេសាភិបាល ធនាគារកណ្តាលនៃកោះសូឡូម៉ូន និង ឯកឧត្ដម Esala Masitabua ទេសាភិបាលរងនៃធនាគារកណ្ដាលហ្វីជី ដើម្បីដើម្បីពង្រឹងកិច្ចសហប្រតិបត្តិការផ្នែកនវានុវត្តន៍ហិរញ្ញវត្ថុ និងប្រព័ន្ធទូទាត់។

អង្គការ យូអិនឌីភី ប្រចាំនៅកម្ពុជា ប្រកាសផ្តល់មូនិធិធិខ្នាតតូចត្រឹម ៥ម៉ឺនដុល្លារ ដល់អង្គការមិនមែនរដ្ឋាភិបាលក្នុងស្រុកនិងអង្គការ​សហគមន៍ទាំងឡាយដែលកំពុងធ្វើការទាក់ទងនឹងការគ្រប់គ្រងធនធានធម្មជាតិ, គម្រោងបន្ស៉ាំការប្រែប្រួលអាកាសធាតុនៅសហគមន៍និងការកាត់បន្ថយភាពក្រីក្រ។

ផ្លូវល្បឿនលឿនភ្នំពេញ-ក្រុងព្រះសីហនុ រកចំណូលបានជិត១១លានដុល្លារ ក្នុងរយៈពេល៤ខែ។ នេះបើតាមការបញ្ហានៅក្នុងកិច្ចប្រជុំលើវឌ្ឍនភាពការអនុវត្តការងារផ្លូវល្បឿនលឿនភ្នំពេញ-ក្រុងព្រះសីហនុរវាងក្រសួងសាធារណការ និងក្រុមហ៊ុន Cambodian PPSHV Expressway Co., Ltd. (CPEC) កាលពីថ្ងៃទី២៨ ខែកុម្ភៈ ឆ្នាំ២០២៣។

គណៈកម្មការរៀបចំពិព័រណ៍ផលិតផលប្រើប្រាស់អន្តរជាតិចិន នៃរដ្ឋបាលខេត្តហៃណានប្រទេសចិន នឹងរៀបចំពិព័រណ៍ផលិតផលប្រើប្រាស់អន្តរជាតិចិន (ពិព័រណ៍ហៃណាន) លើកទី៣ “The 3rd China International Consumer Products Expo (Hainan Expo)” នាថ្ងៃទី១១-១៥ ខែមេសា ឆ្នាំ២០២៣ ខាងមុខ នៅទីក្រុងហៃគូ ខេត្តហៃណានប្រទេសចិន។

ធនាគារជាតិនៃកម្ពុជា (NBC) និងសមាគមមីក្រូហិរញ្ញវត្ថុ (CMA) ដាក់ដំណើរការសាកល្បងនូវគម្រោង«ការពង្រឹងសុវត្ថិភាពហិរញ្ញវត្ថុក្នុងសហគមន៍» នៅក្នុងខេត្តកំពង់ធំ កំពង់ស្ពឺ ស្វាយរៀង និងខេត្តបាត់ដំបង ចាប់ពីឆ្នាំ២០២៣នេះតទៅ។ គម្រោងនេះ សំដៅដល់ការលើកកម្ពស់ចំណេះដឹងហិរញ្ញវត្ថុ សិទ្ធិនិងកិច្ចការពារអតិថិជនតាមសហគមន៍ក្នុងឃុំ-សង្កាត់។

ឯកឧត្តមបណ្ឌិត អិត សំហេងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាលនៃបេឡាជាតិសន្តិសុខសង្គម បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈនៃការយោគយល់គ្នាស្តីពី៖ «កិច្ចសហប្រតិបត្តិការគ្នាទៅវិញទៅមក» រវាងបេឡាជាតិសន្តិសុខសង្គមនៃក្រសួងការងារនិងបណ្តុះបណ្តាលវិជ្ជាជីវៈ នៃកម្ពុជា និងអង្គភាពសោធនជាតិនៃសាធារណរដ្ឋកូរ៉េ កាលពីថ្ងៃទី២៨ ខែកុម្ភៈ ឆ្នាំ២០២៣នេះ។

អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ មិនយកពន្ធប៉ាតង់រយៈពេល ៥ឆ្នាំ សម្រាប់អ្នកសារព័ត៌មាននិងសារព័ត៌មានអនឡាញ ដែលបានចុះបញ្ជីជាអ្នកជាប់ពន្ធតូច ដែលកំពុងប្រកបវិជ្ជាជីវៈនៅក្នុងប្រទេស។ ការផ្តល់ការអនុគ្រោះនេះ គឺស្របតាមការសម្រេចរបស់សម្តេចនាយករដ្ឋមន្ត្រី ហ៊ុន សែន កាលពីថ្ងៃទី១៤ខែមករា ឆ្នាំ២០២៣ ក្នុងពិធីជួបជុំអ្នកកាសែតលើកទី៥។