ចំណេះដឹង និង ព័ត៌មាន

សម្តេចក្រឡាហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឲ្យដឹងថា រយៈពេល ៥ឆ្នាំ ចាប់តាំងពីឆ្នាំ២០១៨-២០២២ ការផ្ទេរថវិកាជាតិទៅឲ្យរដ្ឋបាលថ្នាក់ក្រោមជាតិ មានកំណើនប្រមាណពី ២,៧ដង កើនឡើងពី ៤១៦លានដុល្លារ ក្នុងឆ្នាំ២០១៨ ដល់ ១១១៦លានដុល្លារ ក្នុងឆ្នាំ២០២២។

ទីស្តីការគណៈរដ្ឋមន្ត្រីបានចេញសេចក្តីប្រកាសស្តីពីការអនុញ្ញាតផ្តល់ការអនុគ្រោះសម្រួលដល់គ្រឹះស្ថានសិក្សារដ្ឋនិងឯកជនទូទាំងប្រទេស ឱ្យរួចផុតពីការបង់ពន្ធលើប្រាក់ចំណូល ប្រាក់រំដោះពន្ធលើប្រាក់ចំណូលពន្ធអប្បបរមា អាករលើតម្លៃបន្ថែម និងពន្ធកាត់ទុកលើសេវា ការប្រាក់ និងភាគលាភ ចាប់ពីឆ្នាំ២០២៤ ដល់ឆ្នាំ២០២៨។

សម្តេច ហ៊ុន សែន និងសម្តេចកិត្តិព្រឹទ្ធបណ្ឌិត បានផ្តល់អាហារូបករណ៍ថ្នាក់បរិញ្ញាបត្រលើជំនាញបច្ចេកវិទ្យាឌីជីថល រយៈពេល៤ឆ្នាំ ចំនួន១០០កន្លែង ឱ្យសិក្សានៅសាកលវិទ្យាល័យអាមេរិកកាំងភ្នំពេញ (AUPP) ដល់សិស្សនិស្សិតដែលបានប្រឡងជាប់សញ្ញាបត្រមធ្យមសិក្សាទុតិយភូមិក្នុងឆ្នាំសិក្សា២០២១-២០២២។

ជំនាញបច្ចេកទេសគឺជាជំនាញត្រូវ​ នឹងតម្រូវការចាំបាច់ នៃសង្គមកម្ពុជាបច្ចុប្បន្ន ដែលយើងត្រូវបង្កើននិងពង្រឹងឱ្យកាន់តែល្អប្រសើរថែមទៀត។ នេះបើតាមប្រសាសន៍របស់សម្តេចនាយករដ្ឋមន្ត្រីហ៊ុន សែន ខណៈដែលសម្តេចបានដាក់ចេញផែនការឱ្យបណ្ដុះបណ្ដាលលើជំនាញវិជ្ជាជីវៈដល់សិស្សនិស្សិតកម្ពុជាប្រមាណ ១,៥ លាននាក់នៅឆ្នាំក្រោយ។

និយ័តករបរធនបាលកិច្ច (ន.ប.ធ)​ បានផ្តល់ការទទួលស្គាល់ដល់ក្រុមហ៊ុនចំនួន៣ជាក្រុមហ៊ុនវាយតម្លៃក្នុងវិស័យបរធនបាលកិច្ច ដោយក្រុមហ៊ុនទាំងបីបានបំពេញតាមលក្ខខណ្ឌតម្រូវគ្រប់គ្រាន់ តាមបទប្បញ្ញត្តិពាក់ព័ន្ធជាធរមាន។

រដ្ឋាភិបាលជប៉ុនបានផ្តល់ហិរញ្ញប្បទានឥតសំណងចំនួន ៣,៩៨៦ យ៉េន(ប្រមាណ ៣០,៦លានដុល្លារ) ដើម្បីអនុវត្ត«គម្រោងពង្រីកប្រព័ន្ធផ្គត់ផ្គង់ទឹកស្អាតនៅខេត្តស្វាយរៀង»។ ហិរញ្ញប្បទាននេះ ត្រូវបានចុះហត្ថលេខដោយឯកឧត្តម ប្រាក់ សុខុនឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃកម្ពុជា និងឯកឧត្តម តាកេ ហ្ស៊ឺនសឹកិ រដ្ឋលេខាធិការនៃក្រសួងការបរទេសជប៉ុនកាលពីថ្ងៃទី២២ ខែកុម្ភៈ ឆ្នាំ២០២៣នេះ។

គណៈកម្មាធិការតំបន់សេដ្ឋកិច្ចពិសេសកម្ពុជា និងគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន៤បោះទុនប្រមាណ ២២,៦លានដុល្លារ ដើម្បីបង្កើតរោងចក្រនៅខេត្តតាកែវ ខេត្តកំពង់ស្ពឺនិងនៅក្នុងតំបន់សេដ្ឋកិច្ចពិសេសខេត្តស្វាយរៀង ដែលអាចបង្កើតការងារបានប្រមាណ៦៨៨២កន្លែង។

ក្រសួងការងារនិងបណ្តុះបណ្តាលវិជ្ជាជីវៈ បាននិងកំពុងអនុវត្តផែនការមេសម្រាប់អភិវឌ្ឍគ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ ឆ្នាំ ២០២១-២០២៥ ដោយផ្តោតលើយុទ្ធសាស្ត្រចំនួន ៤ចំណុច។ យុទ្ធសាស្ត្រនេះត្រូវបានឯកឧត្តមបណ្ឌិតអ៊ិត សំហេង លើកឡើងនៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២២និងលើកទិសដៅការងារឆ្នាំ២០២៣ នៃការអនុវត្តផែនយុទ្ធសាស្រ្តអភិវឌ្ឍន៍វិស័យការងារនិងបណ្តុះបណ្តាលវិជ្ជាជីវៈឆ្នាំ២០១៩-២០២៣ នាថ្ងៃទី២២ ខែកុម្ភៈ ឆ្នាំ២០២៣។

ទំនាក់ទំនងទ្វេភាគីរវាងកម្ពុជា​ និងកូរ៉េខាងត្បូង មានការរីកចម្រើនជាលំដាប់ ដោយឆ្នាំ២០២២កន្លងទៅ ឡើងរហូតដល់ ១ពាន់លានដុល្លារ។ នេះបើតាមការលើកឡើងរបស់ឯកឧត្តម Park Jung Wook ឯកអគ្គរដ្ឋទូតកូរ៉េប្រចាំនៅកម្ពុជា ដែលទើបតែងតាំងថ្មី ក្នុងជំនួបជាមួយនឹងសម្តេចនាយករដ្ឋមន្ត្រីកាលពីថ្ងៃទី២០ កុម្ភៈនេះ ដោយឯកអគ្គរដ្ឋទូត។

ក្នុងវិស័យសេដ្ឋកិច្ចនៅកម្ពុជាស្ត្រី​ បានក្លាយជាកម្លាំងចលករ ដែលបានរួមចំណែកជំរុញកំណើនសេដ្ឋកិច្ចជាតិ និងការអភិវឌ្ឍសង្គម។ បើតាមលោកជំទាវកិត្តិបណ្ឌិត អ៊ឹង កន្ថាផាវី កម្លាំងពលកម្មស្រ្តីមានប្រមាណ៨៤ % ហើយស្រ្តីប្រមាណ ៦១% ជាម្ចាស់អាជីកម្ម ឬអ្នកធ្វើធុរកិច្ចដែលជាអត្រាខ្ពស់ក្នុងតំបន់។