ចំណេះដឹង និង ព័ត៌មាន

ក្រសួងសាធារណការ និងដឹកជញ្ជូនសម្រេចបញ្ចប់សុពលភាពវិញ្ញាបនបត្រចុះបញ្ជីធ្វើអាជីវកម្មដឹកជញ្ជូនផ្លូវគោកចំនួន ១០ក្រុមហ៊ុន ចាប់ពីថ្ងៃចេញសេចក្តីប្រកាសតទៅ ដោយមូលហេតុក្រុមហ៊ុនទាំងនោះ មិនបានស្នើសុំបន្តសុពលភាពលិខិតអនុញ្ញាតធ្វើអាជីវកម្មដឹកជញ្ជូនផ្លូវគោកក្នុងប្រទេសជាច្រើនឆ្នាំកន្លងមក។

អគ្គនាយកដ្ឋានពន្ធដារកោះហៅម្ចាសក្រុមហ៊ុនចំនួន២ ឲ្យចូលខ្លួនមកដោះស្រាយបំណុលពន្ធជូនរដ្ឋដោយមិនឲ្យលើសពី ១៥ថ្ងៃ បន្ទាប់ពីការជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី៣០ និងទី៣១ ខែមករា ឆ្នាំ២០២៣នេះ ដោយផ្អែកតាមច្បាប់ស្តីពីសារពើពន្ធនិងប្រកាសស្តីពីការគ្រប់គ្រងបំណុលពន្ធ។

គណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន១១ បោះទុនសរុបប្រមាណ ៥៧,៩លានដុល្លារ ដើម្បីបង្កើតរោងចក្រនៅរាជធានី-ខេត្តចំនួន៤ ដែលអាចបង្កើតការងារបានប្រមាណ ១២,៧១០កន្លែង។

កម្ពុជា កំពុងស្វែងរកឱកាសក្នុងការនាំចេញអង្ករ ទៅកាន់ទីផ្សារប្រទេសហ្វីលីពីន ខណៈដែលកម្ពុជានិងហ្វីលីពីន បានឯកភាពគ្នានិងធ្វើការសិក្សាពីលទ្ធភាពក្នុងការចុះអនុស្សរណៈយោគយល់គ្នាជាថ្មីស្តីពីការធ្វើពាណិជ្ជកម្មអង្ករ ក្រោមយន្តការរដ្ឋនិងរដ្ឋ ដែលសង្ឈឹមថានឹងអាចចុះហត្ថលេខាជាមួយគ្នាក្នុងពេលឆាប់ៗនេះ។

និយ័តករអាជីវកម្មអចលនវត្ថុ និងបញ្ចាំ(ន.អ.ប) កោះហៅឲ្យលោក ទា ហេងម៉េង និងភាគហ៊ុន នៃម្ចាស់ហាងឡាន អាឡាដាំង ទិញ-លក់បញ្ចាំ បង់រំលស់រថយន្ត ចូលខ្លួនមកបំពេញកាតព្វកិច្ចតាមបទប្បញ្ញត្តិនិងបង់ប្រាក់ផាកពិន័យដូចមានកំណត់ក្នុងលិខិតចុះថ្ងៃទី២០ ខែឧសភា ឆ្នាំ២០២២។ ដោយហាងឡាននេះបាននិងកំពុងប្រកបអាជីវកម្មទទួលបញ្ចាំរថយន្ត ដោយគ្មានអាជ្ញាបណ្ណពី ន.អ.ប។

រយៈពេលពេញមួយឆ្នាំ២០២២ អគ្គនាយកដ្ឋានគយនិងរដ្ឋាករកម្ពុជា ប្រមូលចំណូលបានប្រមាណ ១០,៩៩៨,៩ ប៊ីលានរៀល (ស្មើនឹង ២៦៩០,៥លានដុល្លារ) កើនឡើងប្រមាណ ១៨,៣% ធៀបនឹងរយៈពេលដូចគ្នាក្នុងឆ្នាំ២០២១។ នេះបើតាមការបូកសរុបលទ្ធផលការងារគយនិងរដ្ឋាករ កាលពីថ្ងៃទី០៣ ខែកុម្ភៈ ឆ្នាំ២០២៣នេះ។

ក្រសួងពាណិជ្ជកម្មនឹងបន្តរៀបចំយុទ្ធនាការទិញផលិតផលខ្មែររដូវកាលទី៨ តាមរយៈការដាក់តាំងបង្ហាញផលិតផលខ្មែរ និងបន្លែផ្លែឈើលើកទី១៦ ដើម្បីជំរុញសកម្មភាពពាណិជ្ជកម្មក្នុងស្រុក ឲ្យមានភាពរស់រវើក និងប្រសើរឡើងនូវការទទួលស្គាល់ និងគាំទ្រផលិតផលខ្មែរស្របតាមយុទ្ធសាស្ត្រសមាហរណកម្មពាណិជ្ជកម្ម បស់រដ្ឋាភិបាលកម្ពុជាក្នុងការលើកកម្ពស់វិស័យពាណិជ្ជកម្ម និងការអភិវឌ្ឍវិស័យឯកជន។ យុទ្ធនាការនេះ នឹងប្រព្រឹត្តទៅចាប់ពីថ្ងៃទី២៤-២៧ ខែកុម្ភៈ ឆ្នាំ២០២៣ នៅក្រុងសៀមរាប។

សមាគមផលិតគ្រឿងអេឡិចត្រូនិករបស់ឥណ្ឌា នឹងរៀបចំព្រឹត្តការណ៍ពិព័រណ៍ពាណិជ្ជកម្ម The ELECRAMA EXHIBITIO 2023 ដែលប្រព្រឹត្តទៅចាប់ពីថ្ងៃទី១៨-២២ ខែកុម្ភៈ ឆ្នាំ២០២៣ នៅទីក្រុង Noida រដ្ឋ Uttar Pradesh ប្រទេសឥណ្ឌា អមជាមួយនឹងជំនួបពាណិជញ្ជកម្មរវាងអ្នកលក់ និងអ្នកទិញ លើកទី៦ ផងដែរ។

សម្តេច ហ៊ុន សែន ស្នើសុំឲ្យវិនិយោគិនកូរ៉េជួយជំរុញការវិនិយោគលើវិស័យឧស្សាហកម្មកែច្នៃ និងវិស័យឧស្សាហកម្មជាន់ខ្ពស់នៅកម្ពុជា។ ការស្នើសុំនេះ ក្នុងឱកាសដែលឯកឧត្តមបណ្ឌិត អូ មីយុង អតីតនាយករដ្ឋមន្ត្រី និងប្រតិភូឧស្សាហកម្មកូរ៉េ ជួបពិភាក្សាការងារជាមួយនឹងសម្តេច កាលពីថ្ងៃទី១៤ ខែមករា ឆ្នាំ២០២៣នេះ នៅវិមានសន្តិភាព ខណៈដែលឧត្តមបណ្ឌិត អូ មីយុង សង្កេតឃើញពីអ្វីដែលកម្ពុជាខ្វះខាតនោះ ហើយមានភាពអនុគ្រោះច្រើនសម្រាប់ការវិនិយោគមកពីប្រទេសកូរ៉េ។

គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន២ បោះទុន ប្រមាណ ២០លានដុល្លារ ដើម្បីបង្កើតរោងចក្រនៅក្នុងតំបន់សេដ្ឋកិច្ចពិសេសខេត្តស្វាយរៀង ដែលអាចបង្កើតការងារបានប្រមាណ ១៥០០កន្លែង។