ចំណេះដឹង និង ព័ត៌មាន

«គម្រោងធានាឥណទានដើម្បីស្តារអាជីវកម្ម» ដែលមានទំហំទឹកប្រាក់២០០លានដុល្លារ ត្រូវបានក្រសួងសេដ្ឋកិច្ចនិងហិរញ្ញវត្ថុ សម្រេចឱ្យសាជីវកម្មធានាឥណទានកម្ពុជា (CGCC)​ បន្តដាក់ឱ្យដំណើរការចាប់ពីថ្ងៃទី០១ ខែមករា ឆ្នាំ២០២៣នេះ រហូតដល់គម្រោងត្រូវបានប្រើប្រាស់អស់។ នេះបើតាមសេចក្តីប្រកាសព័ត៌មានរបស់ CGCCនៅថ្ងៃទី០៤ មករា។

ស្ពានឆ្លងកាត់ទន្លេមេគង្គប្រវែងជិត ២គីឡូម៉ែត្រនិងផ្លូវតភ្ជាប់ពីខេត្តក្រចេះទៅខេត្តកំពង់ធំ ចាប់ផ្តើមបើការដ្ឋានសាងសង់នៅថ្ងៃទី០២ ខែមករា ឆ្នាំ២០២៣នេះហើយ។ កញ្ចប់ថវិកាសាង់សង់ជាង​ ១១៤លានដុលា ជាកម្ចីពីរដ្ឋាភិបាលចិននិងបដិភាគរបស់​​ដ្ឋាភិបាលកម្ពុជា សម្រាប់សម្រាប់ការដោះស្រាយផលប៉ះពាល់, បោសសម្អាតគ្រាប់មីនមិនទាន់ផ្ទុះ និងពន្ធអាករផ្សេងៗ។

អនុប្រធានទី១ នៃអាជ្ញាធរមីន បានឲ្យដឹងថា ចាប់តាំងពីឆ្នាំ១៩៩៤មក អូស្ត្រាលី បានផ្តល់ជំនួយជាង១០០លានដុល្លារ ដើម្បីចូលរួមដល់ការងារបោសសម្អាតមីននៅកម្ពុជា។ ក្នុងនោះរំដោះបាននូវផ្ទៃដីប្រមាណ ២៥០គីឡូម៉ែត្រក្រឡា សម្រាប់ផ្តល់សុខសន្តិភាព និងលើកកម្ពស់ជីវភាពរស់នៅរបស់ប្រជាជនកម្ពុជា នៅតាមមូលដ្ឋានប្រមាណជាង ១លាននាក់។

ក្រុមប្រឹក្សាជំរុញការនាំចេញផលិតផលកសិកម្ម នឹងរៀបចំ«ពិព័រណ៍ផលិតផលសិប្បកម្ម និងវត្ថុអនុស្សាវរីយ៍ឥណ្ឌា» លើកទី៥៥ (IHGF) ពិព័រណ៍និទាឃរដូវដេល្លី ២០២៣ នៅថ្ងៃទី១៥-១៩ ខែមីនា ឆ្នាំ២០២៣ខាងមុខ នាទីក្រុងញូវដេល្លី ប្រទេសឥណ្ឌា។ ក្នុងពិព័រណ៍នេះ ក្រសួងពាណិជ្ជកម្ម កម្ពុជា ជូនដំណឹងដល់បណ្តាសហគ្រិនទាំងអស់ដែលមានបំណងចង់ចូលរួមអាចចុះបានតាមរយៈគេហទំព័រ www.ihgfdelhifair.register និងអ៊ីម៉ែល៖ visitors@ihgfdelhifair.in។

នាពិធីបើកការដ្ឋានសាងសង់និងលើកកម្រិតផ្លូវជាតិលេខ៣១ និងផ្លូវជាតិលេខ៣៣ ដែលមានប្រវែងសរុប ១០៦,១គីឡូម៉ែត្រ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ថវិកាដែលយកមកសាងសង់នេះ គឺជាឥណទានសម្បទានពីរដ្ឋាភិបាលចិនជាង ១២១លានដុល្លារ រួមជាមួយប្រាក់បដិភាពរបស់រដ្ឋាភិបាលកម្ពុជា សម្រាប់ការដោះស្រាយផលប៉ះពាល់និងពន្ធអាការផ្សេងៗ។ សម្រាប់ការសាងសង់និងពិនិត្យបច្ចេកទេស គឺធ្វើឡើងដោយក្រុមហ៊ុនចំនួន២ ដែលគ្រោងនឹងបញ្ចប់ការសាងសង់នៅក្នុងឆ្នាំ២០២៦។

និយ័តករអាជីវកម្មអចលនវត្ថុ និងបញ្ចាំ(ន.អ.ប) កោះហៅម្ចាស់អាជីវកម្មអភិវឌ្ឍដីឡូតិ៍ចំនួន១៣ ឲ្យរួសរាន់មកដាក់ពាក្យស្នើសុំអាជ្ញាបណ្ណអាជីវកម្មអភិវឌ្ឍដីឡូតិ៍ និងក្រុមហ៊ុនចំនួន០១ ត្រូវរួសរាន់ផ្តល់ឯកសារតម្រូវផ្សេងៗមកកាន់ ន.អ.បដូចបានកំណត់ក្នុងលិខិតចុះថ្ងៃទី០៨ ខែតុលា ឆ្នាំ២០២១ ឲ្យបានមុនថ្ងៃទី១២ ខែមករាឆ្នាំ២០២៣ ជាកំហិត។

គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន៤ បោះទុនវិនិយោគប្រមាណ ១៦,៣លានដុល្លារ ដើម្បីបង្កើតរោងចក្រនៅក្នុងតំបន់សេដ្ឋកិច្ចពិសេសរាជធានីភ្នំពេញ និងខេត្តព្រះសីហនុ ដែលអាចបង្កើតការងារបានប្រមាណ ៧៤០កន្លែង។

នាពិធីបើកការដ្ឋានសាងសង់និងលើកកម្រិតផ្លូវជាតិលេខ៤១ ដែលមានប្រវែងសុរប ៩៥,២៧គីឡូម៉ែត្រ ដោយឆ្លងកាត់ខេត្តចំនួន៤ ឯកឧត្តម ស៊ុន ចាល់ថុលរដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ថវិកាដែលយកមកសាងសង់នេះ គឺជាឥណទានសម្បទានពិរដ្ឋាភិបាលចិនប្រមាណ ៦៧លានដុល្លារ រួមជាមួយប្រាក់បដិភាពរបស់រដ្ឋាភិបាលកម្ពុជា សម្រាប់ការដោះស្រាយផលប៉ះពាល់និងពន្ធអាករផ្សេងៗ។ សម្រាប់ការសាងសង់និងពិនិត្យបច្ចេកទេស គឺធ្វើឡើងដោយក្រុមហ៊ុនចិនចំនួន២ ដែលគ្រោងនឹងបញ្ចប់ការសាងសង់នៅអំឡុងឆ្នាំ២០២៦។

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចុះកិច្ចព្រមព្រៀងទទួលហិរញ្ញប្បទានសហប្រតិបត្តិការជាមួយធនាគារអភិវឌ្ឍន៍អាស៊ី (ADB) និងទីភ្នាក់ងារបារាំងសម្រាប់ការអភិវឌ្ឍន៍ (AFD) សម្រាប់អនុវវត្តគម្រោង/កម្មវិធីចំនួន៦ ដែលមានទឹកប្រាក់ប្រមាណ ៣៨១,៤៥លានដុល្លារ និងហិរញ្ញប្បទានជំនួយបច្ចេកទេសចំនួន ០១ ដែលមានទឹកប្រាក់ចំនួន ១,៧លានដុល្លារ សម្រាប់គាំទ្រដល់ដំណើរការអនុវត្តកម្មវិធីអភិវឌ្ឍន៍វិស័យថាមពេល។

អគ្គនាយកដ្ឋានពន្ធ នឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទប្រចាំឆ្នាំ២០២២ នៅតាមកំណាត់ផ្លូវសំខាន់ៗនៃរាជធានី-ខេត្ត ចាប់ពីថ្ងៃទី១៥ ខែមករា ឆ្នាំ២០២៣តទៅ។ នេះបើតាមសេចក្តីជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី២២ ខែធ្នូកន្លងទៅ។