ចំណេះដឹង និង ព័ត៌មាន

ខណៈពេលដែលក្រសួងអប់រំ យុជន និងកីឡា ប្រកាសលទ្ធលផលសិស្សានុសិស្សប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ​ឆ្នាំសិក្សា ២០២១-២០២២ រដ្ឋមន្ត្រីក្រសួងប្រៃសណីយ៍និងទុរគមនាគមន៍ ឯកឧត្តម ជា វ៉ាន់ដេត នៅថ្ងៃទី២២ ធ្នូនេះ បានចេញលិខិតអបអរសាទដល់សិស្សថ្នាក់ទី១២ ដែលបានប្រឡងជាប់។ រដ្ឋមន្ត្រីប្រៃសណីយ៍ ក៏បានអំពាវនាវឱ្យសិស្សដែលប្រឡងជាប់ទាំងអស់ពិចារណាជ្រើសជំនាញពាក់ព័ន្ធនឹងបច្ចេកវិទ្យាសម្រាប់ការសិក្សាក្នុងកម្រិតថ្នាក់ឧត្តមសិក្សាបន្តទៀត តាមរយៈអាហារូបករណ៍ជាច្រើន។ ការរៀនចំណេះជំនាញទាំងនេះ ឯកឧត្តមរដ្ឋមន្ត្រី ជឿជាក់ថានឹងរួមចំណែកឱ្យកម្ពុជាសម្រេចចក្ខុវិស័យក្លាយជាប្រទេសមានចំនូលកម្រិតខ្ពស់នៅឆ្នាំ២០៥០។

ក្រសួងទេសចណ៍ ឆ្លើយតបនឹងព័ត៌មានចំនួនដែលនិយាយអំពីការកំណត់លក្ខខណ្ឌឱ្យភ្ញៀវទេសចរបរទេសមានសាច់ប្រាក់តាមខ្លួនចំនួន១ពាន់ ឬ ២ពាន់ដុល្លារ ទើបអាចចូលកម្ពុជាបាន។ ក្រសួងបានចេញសេចក្តីប្រកាសនៅថ្ងៃទី២២ធ្នូនេះ ដោយអះអាងថា រដ្ឋាភិបាលមិនមានគោលនយោបាយណាមួយតម្រូវឲ្យភ្ញៀវទេសចរ ត្រូវបង្ហាញសាច់ប្រាក់បែបនេះទើបអាចចូលមកទស្សនានៅកម្ពុជានោះឡើយ។

កម្ពុជា និងអេមីរ៉ាប់អារ៉ាប់រួម បានឈានដល់ចុះកិច្ចព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងប្រទេសទាំងពីរ (CAM-UAE-CEPA) ក្រោយបញ្ចប់កិច្ចប្រជុំចរចលើកទី២ អស់រយៈពេល៣ថ្ងៃ នៅរាជធានីភ្នំពេញ។ កិច្ចព្រមព្រៀងនេះ នឹងចូលរួមលើកកម្ពស់កិច្ចសហប្រតិបត្តិការទ្វេភាគី ពង្រឹងទំនាក់ទំនងមិត្តភាពរវាងប្រទេសទាំងពីរ និងជំរុញការតភ្ជាប់ពីតំបន់ទៅតំបន់ និងអាស៊ានទៅតំបន់មជ្ឈឹមបូព៌ាឲ្យកាន់តែប្រសើរឡើង។

មូលនិធិគន្ធបុប្ផាកម្ពុជាទទួលបានប្រាក់បរិច្ចាគសរុបចំនួន ១ ០១៧ ២២៤ ៦០០រៀល និង ៣៦១ ៦៨៤ដុល្លារក្នុងខែវិច្ឆិកា ឆ្នាំ២០២២នេះ ពីសប្បុរសជនសរុបប្រមាណ ៥៣១២នាក់។ ថិវកាសរុបជាង៦១ម៉ឺនដុល្លារ ដែលមូលនិធិគន្ធបុប្ផាកម្ពុជាទទួលបានទីសប្បុរជននឹងយកទៅចំណាយលើប្រតិបត្តិការរបស់មន្ទីរពេទ្យគន្ធបុប្ផាទាំង៥ទីតាំង។

ធនាគារពិភពលោក (World Bank) សម្រេចអនុម័តកម្ចី ២៧៤លានដុល្លារបន្ថែម ឱ្យមកកម្ពុជាសម្រាប់ប្រតិបត្តិការគោលនយោបាយកំណើនសេដ្ឋកិច្ច និងអភិវឌ្ឍន៍ភាពធន់។ កម្ចីនេះនឹងជួយដល់កំណែទម្រង់សម្រាប់ជំរុញកំណើន និងពង្រឹងភាពធន់របស់កម្ពុជាតាមរយៈការសម្រួលដំណើរការចុះបញ្ជីអាជីវកម្ម លើកកម្ពស់ការប្រកួតប្រជែងនិងពង្រីកលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម។

ឯកឧត្តម ប៉ាន សូរស័ក្តិ​ រដ្ឋមន្ត្រីក្រសួងពាណិជ្ជកម្ម បានឲ្យដឹងថា ក្នុងរយៈពេល ១០ខែឆ្នាំ២០២២នេះ ទំហំពាណិជ្ជកម្មទ្វេភាគីរវាងកម្ពុជានិងកូរ៉េ សម្រេចបានប្រមាណ ៦៥៩លានដុល្លារ កើនឡើង៤% បើធៀបនឹងរយៈពេលដូចគ្នាឆ្នាំ២០២១។ ដោយឡែក កាលពីឆ្នាំ២០២០ ប្រទេសទាំង២ សម្រេចបានទំហំពាណិជ្ជកម្ម កើនឡើងដល់ប្រមាណ ៧៧២លានដុល្លារ ខណៈឆ្នាំ២០១៩ សម្រេចបានត្រឹមតែ ៧២៩លានដុល្លារ កើនឡើងប្រមាណ ៦% ។

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានអនុម័តចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន៤​ បោះទុនប្រមាណ ២១,៩លានដុល្លារដើម្បីបង្កើតរោងចក្រនៅរាជធានីភ្នំពេញ ខេត្តតាកែវ និងខេត្តកំពង់ចាម ដែលអាចបង្កើតការងារបានជាង ៦០០០កន្លែង។

រដ្ឋាភិបាលឲ្យបញ្ចេញថវិកា ២០០លានដុល្លារ ធ្វើស្ពានតភ្ជាប់ពីផ្លូវជាតិលេខ១ ទៅស្រុកល្វាឯម ដើម្បីតភ្ជាប់ពីផ្លូវល្បឿនលឿនដែលត្រូវធ្វើមួយទៀតពីភ្នំពេញ ទៅក្រុងបាវិត ខេត្តស្វាយរៀង ដើម្បីទៅដល់វៀតណាមតែម្តង។ នេះបើតាមប្រសាសន៍របស់សម្តេចនាយករដ្ឋមន្ត្រី ហ៊ុន សែន ដែលថ្លែងពីទីក្រុងព្រុចសែស នៃប្រទេសប៊ែលហ្សិកក្នុងជំនួបជាមួយពលរដ្ឋខ្មែរនៅទ្វីបអឺរ៉ុប ប្រមាណ ២ពាន់នាក់ នៅថ្ងៃទី១២ ខែធ្នូឆ្នាំ២០២២។

អគ្គនាយកដ្ឋានពន្ធដារ កោះហៅអភិបាលក្រុមហ៊ុនចំនួន២ ឲ្យចូលខ្លួនមកដោះស្រាយបំណុលពន្ធជូនរដ្ឋ ដោយផ្អែកតាមច្បាប់ស្តីពីសារពើពន្ធនិងប្រកាសស្តីពីការគ្រប់គ្រងបំណុលពន្ធ។ ក្រុមហ៊ុនទាំងនេះត្រូវចូលខ្លួនមកបង់ពន្ធដោយមិនឲ្យលើសពី១៥ថ្ងៃ បន្ទាប់ពីការជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី១៥ខែធ្នូ ឆ្នាំ២០២២។

រដ្ឋាភិបាលនឹងតម្លើងប្រាក់បៀរវត្សឲ្យមន្ត្រីរាជការ កងកម្លាំងប្រដាប់អាវុធ និវត្តជន និងអតីតយុទ្ធជន ចាប់ពីថ្ងៃទី០១ ខែមករា ឆ្នាំ២០២៣ តទៅ បន្ទាប់ពីខកខានតម្លើងប្រាក់បៀរវត្សអស់រយៈពេល២ឆ្នាំមកហើយក្នុងអំឡុងពេលជួបវិបត្តិកូវីដ-១៩។