ចំណេះដឹង និង ព័ត៌មាន

នាយកដ្ឋានប្រឆាំងបទល្មើសបច្ចេកវិទ្យា (ACCD) ឱ្យអ្នកប្រើប្រាស់មានការប្រុងប្រយ័ត្នជាមួយនឹងការប្រើប្រាស់កម្មវិធីគេហទំព័រដែលមាននៅក្នុងកម្មវិធី Tik Tok ។ ACCD បានឱ្យដឹងថា កាលពីពេលថ្មីៗនេះក្រុមអ្នកស្រាវជ្រាវបានរកឃើញថា កម្មវិធីគេហទំព័រដែលមាននៅក្នុងកម្មវិធី Tik​ Tok (in-app browser) មានបង្កប់ជាមួយកូដ JavaScript ដែលអាចទាញយកទិន្នន័យដែលអ្នកប្រើប្រាស់បានវាយបញ្ចូលតាមរយៈក្ដារចុច។

គណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានអនុម័តចេញវិញ្ញាបនបត្រចុះបញ្ជីគម្រោងវិនិយោគដល់ក្រុមហ៊ុនចំនួន ៧បោះទុនប្រមាណ ៣២.៧លានដុល្លារ ដើម្បីបង្កើតរោងចក្រនៅរាជធានី-ខេត្ត និងអាចបង្កើតការងារបានចំនួនជាង៣៥០០កន្លែង។

អាមេរិកបានផ្តល់ជំនួយថវិកា ២៥លានដុលារ សម្រាប់អនុវត្តគម្រោង«កម្ពុជាហាវេស III» សម្រាប់រយៈពេល៥ឆ្នាំ​។ គម្រោងនេះ នឹងធ្វើការជាមួយដៃគូក្នុងវិស័យកសិកម្មអ្នកផ្គត់ផ្គងបច្ចេកវិទ្យា ស្ថាប័​នហិរញ្ញវត្ថុ ក្នុងគោលបំណងបង្កើតការងារនិងទីផ្សារក្នុងវិស័យកសិកម្ម។

រយៈពេល ៦ខែនៃឆ្នាំ២០២២ កម្ពុជានិងសិង្ហបុរី សម្រេចបានទំហំពាណិជ្ជកម្ម កើនឡើងដល់ ២.១ ប៊ីលានដុល្លារ ខណៈដែលទំហំពាណិជ្ជកម្មទ្វេភាគីរវាងប្រទេសទាំងពីរនៅឆ្នាំ២០២០ កើនឡើងពី ៣.៥ ប៊ីលានដុល្លារ ដល់ ៥.៣ ប៊ីលានដុល្លារក្នុងឆ្នាំ២០២១។ នេះបើតាមការបញ្ជាក់របស់ឯកឧត្តម ប៉ាន សូរស័ក្តិ នៅក្នុងពិធីអបអរសាទរខួបលើកទី៥៧នៃទិវាជាតិរបស់សាធារណរដ្ឋសិង្ហបុរី។

រយៈពេល ៧ខែឆ្នាំ២០២២ អគ្គនាយកដ្ឋានពន្ធដារប្រមូលចំណូលពន្ធ-អាករ តាមប្រព័ន្ធគ្រប់គ្រងទិន្នន័យចំណូលអនឡាញបានចំនួន ៨៩៥០,៨៩ ប៊ីលានរៀល (ប្រមាណជា ២ ២១០,១០ លានដុល្លារ) ស្មើនឹង ៧៨,៣៩% នៃផែនការច្បាប់ហិរញ្ញវត្ថុប្រចាំឆ្នាំ។ បើធៀបនឹងចំណូលពន្ធ-អាករ ក្នុងរយៈពេលដូចគ្នា ឆ្នាំ២០២១ កើនឡើង ១៩៨៩,៧៤ ប៊ីលានរៀល (ប្រមាណជា ៤៩១,២៩ លានដុល្លារ) ស្មើនឹង ២៨,៦២%។

អគ្គនាយកដ្ឋានពន្ធដារ ប្រកាសហៅនាយកក្រុមហ៊ុនចំនួន៧ ឱ្យចូលខ្លួនមកដោះស្រាយបំណុលពន្ធជូនរដ្ឋ ដោយផ្នែកតាមច្បាប់ស្តីពីសារពើពន្ធ និងប្រកាសស្តីពីការគ្រប់គ្រងបំណុលពន្ធដារ។ នេះបើតាមលិខិតជូនដំណឹងរបស់អគ្គនាយកដ្ឋានពន្ធដារកាលពីថ្ងៃទី០៣ ខែសីហា ឆ្នាំ២០២២នេះ។

រដ្ឋាភិបាលជប៉ុនបានផ្តល់ឥណទានសម្បទានចំនួន ៤១,៣៨៨ ប៊ីលានយ៉េន ស្មើនឹងប្រមាណ ៣៨៣,២២ លានដុល្លារអាមេរិក សម្រាប់សម្រាប់ការអនុវត្តគម្រោងអភិវឌ្ឍន៍ចំណតផែកុងតឺន័រថ្មី នៅកំពង់ផែក្រុងព្រះសីហនុជំហានទី១ ។

គណៈកម្មាធិការជាតិសុវត្ថិភាពចរាចរណ៍ផ្លូវគោក ចាប់ផ្តើមអនុវត្តសាកល្បងកម្មវិធីដកពិន្ទុប័ណ្ណបើកបរ និងការបង់ប្រាក់ពិន័យអន្តរការណ៍នៅថ្ងៃទី០១ ខែកញ្ញា ឆ្នាំ២០២២ និងដំណើរការអនុវត្តពេញលេញនៅថ្ងៃទី០១ ខែមករា ឆ្នាំ២០២៣។ អ្នកបើកបរយានយន្តគ្រប់រូប ត្រូវយកប័ណ្ណបើកបរយានយន្តច្បាប់ដើមតាមខ្លួន ដើម្បីបង្ហាញសមត្ថកិច្ចត្រួតពិនិត្យ និងអនុវត្តការដកពិន្ទុក្នុងករណីមានការប្រព្រឹត្តល្មើស។

ក្នុងរយៈពេលពីរឆ្នាំកន្លងមកពាណិជ្ជកម្មទ្វេភាគីរវាងកម្ពុជា-ថៃ បានកើនឡើងពី ៣.៤៩ ពាន់លានដុល្លារក្នុងឆ្នាំ២០២០ ដល់ ៣.៨៥ ពាន់លានដុល្លារក្នុងឆ្នាំ២០២១ (កើនឡើង ១០.៤%) ។ នេះបើតាមការបញ្ជាក់របស់ឯកឧត្តមរដ្ឋមន្ត្រី ប៉ាន សូរស័ក្តិ ក្នុងជំនួបពិភាក្សាការងាររវាងសភាពាណិជ្ជកម្មកម្ពុជា និងសភាពាណិជ្ជកម្មថៃនិងគណៈកម្មការធុរកិច្ចថៃ កាលពីថ្ងៃទី០៥ សីហានេះ។

កម្ពុជាចម្រាញ់រ៉ែមាសបានចំនួន ២៣២ដុំ ស្មើនឹង ៣,៥៤៣គីឡូក្រាម និងប្រមូលចំណូលសួយសារបានចំនួនជាង ៥លាន ១សែនដុល្លារ ដោយគិតត្រឹមដើមខែសីហា ឆ្នាំ២០២២នេះ។ នេះបើតាមការឱ្យដឹងពីឯកឧត្តម អ៊ឺង ឌីប៊ូឡា អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែនិងថាមពល នៅក្នុងសន្និសីទសារព័ត៌មានស្តីពី៖«សមិទ្ធផលសម្រេចបានរយៈពេល៥ឆ្នាំ របស់ក្រសួងរ៉ែនិងថាមពល» នៅទីស្តីការគណៈរដ្ឋមន្ត្រី កាលថ្ងៃទី៩ ខែសីហា ឆ្នាំ២០២២។